O le aso 24 Ianuari 2015 lea ua fa’alauiloa mai e le pulega a le kamupani o le Tri Marine, e tatala aloaia ai le tautua a lana kamupani tu’uapa o le Samoa Tuna Processor, Inc (STP), mo le gaosiina lea o taumafa tu’u apa i Amerika Samoa.

E tusa ma le $70 miliona le vaega tupe lea ua inivesi e le kamupani e fa’aleleia ma amata ai lana tautua i totonu o le teritori o Amerika Samoa.

E tusa ai o se pepa o fa’amatalaga mai le kamupani, o lo o taua ai e sona sui sinia e fa’apea, o ana oloa o le a gaosiaina i Amerika Samoa, o lo o a fa’apipi’i ai le fa’ailoilo “Gaosi i Amerika”.

O le kamupani lenei o le Tri Marine, lea o lo o i ai lona ofisa autu i Bellevue i Uosigitone, sa sainia sa latou lisi ma le malo o Amerika Samoa i le tolu tausaga talu ai, ina ua tapunia le isi kamupani tu’uapa sa latou fa’aaogaina le nofoaga tuai lea i le afioaga o Atu’u.

I le fa’alagolago malosi ai o le tamaoaiga o Amerika Samoa i ana kamupani tu’uapa, o lo o fa’amoemoe e ono o o atu i le to’a 1,500 le aofa’i o tagata faigaluega e mafai ona fa’a faigaluega e le kamupani fou lenei, mo le fa’ataunu’uina o lana tautua fou mo le teritori.

Na taua e le Pulesili o le kamupani a le Tri Marine ia Renato Curto e fa’apea, ua matua maumau tutu lo latou talitonuga i le $70 miliona lea ua mae’a ona latou inivesi e amata ai le latou tautua fou i Amerika Samoa.

“O le mea moni lava ia, o le matou fa’aiuga ina ia inivesi lenei vaega tupe mo Amerika Samoa, sa faavae mai lea i luga o le talitonuga, o le gaosiina o le apa tuna i le teritori, o se atina’e lelei lea ma talafeagai e mafai ona fa’aauau pea mo se taimi umi i totonu o le teritori”, o le saunoaga lea a Curto.

Na taua e le afioga i le alii Kovana ia Lolo Matalasi Moliga le matua lagolagoina malosi e le malo o Amerika Samoa o taumafaiga a le Tri Marine, aemaise ai lava o le latou fa’anaunauga ina ia inivesi lenei vaega tupe tele, e fesoasoani ai i le tau sailia lea o ni galuega tumau mo tagatanuu o le teritori.

Sa ia taua fo’i e fa’apea, o le vaega tupe tele ua mafai ona inivesi e le kamupani i le teritori, ua atagia mai ai le mautu ma le malosi o le auai o le Tri Marine i le tausinioga a isi pisinisi tuna i le lalolagi.

Na taua e le susuga a Lewis Wolman lea sa avea talu ai nei ma taitai fono o le Asosi a Tagata Faipisinisi i le teritori e fa’apea, o se tasi o itu lelei o le a maua mai i le Tri Marine, e ese mai i le maua ai o galuega e tele mo tagata o Amerika Samoa, e le gata o le a latou fa’atauina mai oloa mai pisinisi lotoifale a le atunu’u, ae o le a mafai fo’i ona tu’uina atu sa latou sao e lagolago ai i galuega fa’atino a le Vaega Tosova’a.

Ae sili ai i lo na mea uma, o le tupe o le a mafai ona fa’aaoga e tagata faigaluega mai a latou totogi e faia ai a latou fa’atau mo le tausiga o aiga.

O se tasi o itu na taua e le susuga Curto o lo o taula’i i ai le vaai a le kamupani tu’uapa fou lenei, o le vaavaai lea i maketi i totonu lava o le Iunaite Setete e fa’atau atu ai ana oloa, e lelei ma faigofie e leai se tiute e tau totogiina.

Sa ia taua fo’i e fa’apea, o lea tulaga o le a fesoasoani tele lea i taumafaiga a le kamupani e fa’aitiitia ai lana tupe fa’aalu i le tau gaosiina o ana oloa i Amerika Samoa nei, pe a fa’atusatusa i le tulaga maualalo ma le taugofie o lo o i ai le gaosiina o le apa tuna i atunu’u i Asia e pei o Thailand, Filipaina ma Saina.

“Matou te naunau e taula’i la matou vaavaai i faleoloa ma pisinisi meaai i Amerika, i latou e naunau e fia iloa po o fea sa maua mai ai a matou i’a o le tuna, o le auala na maua ai, ae faapefea fo’i ona gaosi le apa tuna”, o le isi lea saunoaga a Curto.

O lo o i ai fo’i se fuafuaga a le kamupani e gaosi sa latou lava fo’i oloa e ese mai i le apa tuna ua fuafua e gaoi, e pei ona i ai le apa tuna ua mae’a ona tufatufa atu i ni isi o faleoloa i le atunu’u, i lalo o le igoa o le “Ocean Naturals”.

E ese mai i le tautua fou a le Tri Marine lea ua fuafua e tatala i le tausaga fou, o le tausaga na te’a nei na tatala ai le isi tautua a le STP, o le latou pusa ‘aisa tele lea e mafai ona teu i ai i’a mai va’a fagota.

Na taua e Curto e fa’apea, o le taua o le isi tautua lea a le STP, e le gata e faigofie ai ona fagota mai le tele o i’a ma tu’u vaega ai, ae sauni ai fo’i mo le fa’aaogaina e le fale tu’uapa po o le fa’atau atu fo’i i maketi i fafo.

E 10 va’a fagota o loo tauaveina tagavai a le Iunaite Setete o lo o pulea e le Tri Marine i le taimi nei, lea o lo o fesoasoani i le sapalaiina mai lea o le i’a mo le kamupani tu’uapa.

Na taua fo’i e Curto le silia i le $200 miliona ua mafai ona inivesi e le kamupani mo Amerika Samoa, e ala i le tautua a latou va’a fagota ma le kamupani tu’uapa.

O lo o i ai ni isi o atugaluga ma ni isi o ofisa sinia a le malo, i le ono tauva lea o le kamupani a le Tri Marina ma le kamupani tu’u apa i Solomona o le SolTuna Inc, peita’i na taua e Curto e fa’apea, o le kamupani tu’u apa a le SolTuna Inc i Solomona, e le gata e fai paaga ma le Tri Marine, ae ese fo’i maketi o lo o la’u i ai a latou oloa.

fa’aliliu Ausage Fausia