Ads by Google Ads by Google

Saunoa le Lutena Kovana i le taofia o sauaga

“Fa’auma sauaga ae fa’aofi atu manatu fou...”

 

Sa matagofie le fa’asoa a le Sui Kovana Lemanu Mauga e tusa ai o se sao mai le Taiulu o le Faigamalo a Amerika Samoa i le usugafono a sui iloga mai fafo ma sui fo’i i’inei, mai fa’alapotopotoga ma matagaluega o lo’o nafa ma le puipuiga pe o lo’o mataituina fo’i le anoanoa’i o afaina eseese o lo’o pagatia ai ituvai o tina i totonu o mafutaga a aiga i o latou setete ma teritori.

 

O le saunoaga sa tu’usa’o lava i le fa’afitauli, ua manino e le o misia le a’afia ai fo’i o le tatou atunu’u, ma ua ala fo’i ona fa’atula’ia nisi o fa’alapotopotoga ma polokalama e tima’ia ai tina ma fanauiti i o latou pagatia i totonu o aiga, aua ua fa’atupula’ia pea, ma ua faigata ona toe fofo lea fa’afitauli i le taimi nei.

 

“E le faigofie ona ‘alo se tasi mai nei afaina, pe afai o tupu mai totonu o le aiga, o se li’o sili ona itiiti e fa’aatagia ai le mafutaga vavalalata i le alofa ma ia ola mai ai fanau ae a le lumana’i.”

 

Peita’i, sa ia saunoa e tusa ai ma ala ua amata fa’ailo ai nei sauaga, ma ua le toe ufita’ia le maoga ane i luga o nei faiga mataga, ma ua tautatala mai tina, e fa’ailoa le pagatia i le tele o taimi.

 

“Ua le toe gugu le ituvai o tama’ita’i, ua fa’ailoa mai uma afaina o lo’o lofia ai i latou ma fanau i totonu o aiga, o le ala fo’i lea o le tu’usa’o mai o le fe’au mai le vaega o Fa’amasinoga, ina ia faia le pitola’au a le Matagaluega o Alamanuia mo Tagata Lautele, ia fa’atula’ia se nofoaga mo le tausiga fa’apitoa o Tina ma Fanauiti, ae maise o se nofoaga e tausia ma toe fa’asa’osa’o ai e na fa’ao’olima.”

 

Na fa’aauau lona taofi fa’aalia e fa’apea, “Ua o’o mai le taimi e tula’i ai ma fa’ailoa mai fa’afitauli, fa’auma sauaga ae fa’aofi atu manatu fou e toe amata fafau ai le tagata fou, ua saunia mo lu’itau o le olaga!”

 

“Taofi le so’ona fai o tina ma tama’ita’i i ala fa’aleituaiga e le talafeagai ma le tulafono, taofi le fa’apologa o tina ma tama’ita’i ona ua le maua ai se tupe, ae ia fa’ataua i latou, saunia avanoa e toe a’otau ai o latou olaga i taleni fou, ma ia fa’ataua o latou lagona e outou a latou pa’aga!”

 

Ua saunoa fo’i Lemanu e tusa o le tele o le tamaoaiga o le Malo ma polokalama a le Malo tele ua saunia fa’apitoa, e toe tau fa’asa’osa’o ai ni tausiga mo tina ma fanauiti ua a’afia i sauaga!

 

“E matua tele se tau ua totogia e le Malo ona o sauaga ua tutupu pea i totonu o mafutaga fa’aleaiga, ua fa’atumulia le falepuipui ia i latou ua sauaina tina i ala fa’aleituaiga po’o le fa’ao’olima.”

 

I lana fe’au fa’apitoa, sa ia fa’ailoa mai ai sitepu e 4 ua ia manatu e ao ina fa’ao’o ai se tautua mo tina uma ua sauaina.

 

Puipuia Tina mai Sauaga:

 

- Ia taofi manatu fa’aitu’au e fa’atupu vevesi, ua avea ai le aia tatau a tina uma i sona olaga fiafia ma faia o latou sao i totonu o lona malo, i lana galuega, i ana fa’alapotopotoga ma lona aiga.

 

- Ia puipuimalu aia tatau a tina e mafai ai ona aia tutusa i galuega pe afai e agava’a, ma ia mafai fo’i ona ia galue i so’o se galuega ua agava’a ai.

 

- Ia fa’afalepuipuia i latou ua sauaina tina, ia faia fa’asalaga e tusa ma tulafono ma ia mautinoa ai le saogalemu o tina i totonu o latou mafutaga fa’aleaiga.

 

- Ia fa’ao’o i tina tautua eseese ua mae’a fa’atulaga e le Malo Amerika Samoa ma le Malo tele ona ua manino lelei ua fa’asauaina i latou.

 

“E ui ina ua maoga ane i luga le tetele o sauaga sa a’afia ai tina ma tama’ita’i talavou, ae ua le ‘alo le Malo o Amerika Samoa e faia lo latou tiute, o le va’ai toto’a i fa’afitauli nei, ma fa’ao’o le tautua mo tina ma tama’ita’i o sauaina. Ua iloga mai ua fa’aitiitia lea faitau aofa’i i’inei.”