Ads by Google Ads by Google

SAVE: E le o lava leoleo e fa’amalosia le tulafono

Na fa’amanino e le Komesina o Leoleo i se iloiloga sa faia i luma o le maota o sui i le vaiaso na te’a nei e fa’apea, e le o taitai lava leoleo e fa’atinoina galuega i totonu o le atunu’u i le taimi nei, ae maise lava i le fa’amalosia o tulafono o lo o atugalu i ai ni isi o afioga i faipule.

 

“E le o se alofaga la’u molimau lea e fai atu, ae o le mea moni lava o lo o tupu i le Ofisa o Leoleo, e le o taitai lava leoleo e fa’amalosia le tulafono, e le o lava fo’i ta’avale e fa’atino ai le galuega,” o le tali atu lea a le afioga a Save L. Tuitele i le fesili fa’asea a le sui fofoga fetalai ia Fetui Fetu Jr, i le tele o tulafono e le o mafai e le ofisa o leoleo ona fa’amalosia.

 

Saunoa Fetui Jr, o se tasi fo’i sa avea ma Leoleo i tausaga ua mavae, e tele naua tulafono ua mae’a ona pasia e le Fono ma sainia e le kovana e avea ai ma tulafono, a o lenei lava e le o lelei ona fa’amalosia e leoleo.

 

Mo se fa’ata’ita’iga o le tulafono e fa’asa ai le soo ona fa’aleotele laau pese a ta’avale la’upasese, fa’apea ai ma le tulafono e fa’asa ai ona ulaula i nofoaga faitele, o tulafono fo’i ia e lua na mafua ai ona valaauina le iloiloga a le maota o sui, i se auala e mafai ai ona tu’u atu le malosi i isi fo’i ofisa o le malo e pei o le AS-EPA ma le Soifua Maloloina latou te fa’asalaina ai tagata e maua ma tu’uaia i le soliina o le tulafono.

 

Saunoa le sui fofoga fetalai e fa’apea, talu lava ona pasia lenei tulafono, e leai lava se isi ua molia ma fa’asala e le tulafono, ma ua le iloa fo’i la le mafua’aga na ala ai ona fau le tulafono ma pasia.

 

Sa ia talosaga i le afioga i le komesina mo se avanoa e galulue ai leoleo mo le fa’amalosia o le tulafono, ae na saunoa Save e fa’apea, e leai se mea e mafai e le Ofisa o Leoleo pe afai e vili mai le atunu’u mo se fesoasoani ae o lo o pisi leoleo e tau foia se isi fa’afitauli o lo o tula’i mai fo’i i le taimi lava lea e tasi.

 

“A to’atele leoleo e galulue i le sifi e tasi, o le to’a 3 i le to’a 4, afai la e vili mai se aiga i Pago Pago o lo o mana’omia se fesoasoani, ae alu atu i ai le tali e fa’atali mai mo se afa itula ona e le o avanoa se ta’avale toe leai ni leoleo, o le a tula’i mai se fa’afitauli i lea aiga, ae o le mea tonu lava lena o lo o tula’i mai, e le o lava leoleo ma ta’avale e fa’atino ai le galuega,” o le saunoaga manino lea a le afioga a Save i luma o le maota o sui.

 

Ae na fa’amanino e le sui loia sili ia Mitzie Jessop-Ta’ase e fa’apea, e i ai pepa sala ua mae’a ona tu’uina atu e leoleo i luma o le fa’amasinoga e molia ai i latou o lo o tu’uaia i le soli o le tulafono o le ulaula tapa’a, peita’i na toe solofua e le fa’amasinoga ona o lo o i ai se vaega e le o sa’o ona fa’aupu i totonu o le tulafono, lea o lo o mafua ai le fa’aletonu.

 

O le fautuaga ua toe taoto atu i le Fono Faitulafono, ia toe vaavaai i le tulafono ina ia toe fa’amalosia le vaega o lo o tula’i mai ai le fa’aletonu, ina ia mautinoa e mafai ona fa’amalosia ma molia ai i latou e le usita’i i le tulafono.