O ripoti e fa’atatau i fa’afitauli o lo o tula’i mai i totonu o le toese i Tafuna i le va o pagota ma Leoleo, na saunoa ai le afioga i le Sui Komesina le tumau a le Matagaluega o Leoleo ia Save Liuato Tuitele e fa’apea, “e le tatau ona i ai se tulaga fa’apea e ola ai pagota ma leoleo i totonu o le toese”.

“E le tatau ona tutupu ni mea fa’apea i totonu o le toese i Tafuna, so o se tagata ua fa’aigoa o le pagota, ua i ai tulafono e tatau ona ia usitaia ao tuli ai lona fa’asalaga, e fa’apena fo’i i le leoleo o le falepuipui, e i ai fo’i ona ia tiute tauave e tatau ona fa’atino”, o se vaega lea o le saunoaga a Save i se fa’atalatalanoaga ma le Samoa News i le vaiaso nei, e tusa ai o fa’afitauli o lo o tutupu i le toese i Tafunaj, lea na aofia i le saunoaga a le afioga i le Fa’amasino Sili i le taimi na lau ai le fa’asalaga a se ali’i pagota i le vaiaso na te’a nei.

Na taua e le afioga i le fa’amasino sili ia Michael Kruse i le taimi na lau ai le fa’asalaga o le ali’i pagota o Leuma Malala i le vaiaso na te’a nei, o molimau mai pagota fa’apea ai ma ripoti mai le Ofisa Nofova’ava’aia, ua lava lea e fa’amaonia mai ai o lo o i ai mea o lo o tutupu i le va o leoleo ma pagota i totonu o le toese i Tafuna.

Na taua e Kruse i se vaega o lana saunoaga mataupu e pei ona tuuaia ai se ali’i leoleo, i lona fa’aoolima lea i se ali’i pagota i luma o le isi leoleo o le toese, aemaise ai ripoti i pagota e ulufale ma ulufale i totonu o le toese e aunoa ma le fa’atinoina o tiute a leoleo o le toese o le siaki lea o latou tino i le taimi e toe ulufale atu ai.

Sa taua fo’i e Kruse i le isi vaega o lana saunoaga e fa’apea, e i ai le pagota o lo o pei o se sifi i totonu o le toese, e fai uma fo’i e leoleo mea e mana’o i ai le pagota lea.

E le i taua e Kruse po o ai le igoa o lea pagota, a o ai fo’i leoleo o lo o fa’atinoina mea o lo o ia mana’o i ai.

Saunoa Save e fa’apea, e le tatau ona tuu aunoa e leoleo o le toese pagota e fai le mea latou te loto i ai, aua o pagota o tagata o lo o nonofo i lalo o le tulafono.

“E faigofie lava le mataupu, soo se pagota e alu i fafo e tatau ona su’e uma lona tino pe a toe fo’i atu i totonu, e le tatau fo’i ona tuu avanoa leoleo o le toese i pagota, ae tatau ona tutusa pagota uma i le vaavaai a leoleo”, o le isi lea saunoaga a Save.

Ae ui i fa’afitauli e pei ona taua, o ni isi o itu na taua e le afioga Save o lo o mafua ai ona tutupu nei faaletonu, e le gata e le lava leoleo o lo o galulue i le toese ae fa’aletonu le nofoaga o lo o taofia ai pagota.

Saunoa Save, ua galulue nei le matagaluega mo le sailia o auala e foia ai fa’afitauli o lo o tula’i mai i le toese i Tafuna.