O le iloiloga i le va o le Komiti o le Puipuiga o le Saogalemu Lautele a le Senate ma le Komesina le-tumau a le Matagaluega o Leoleo i le vaiaso nei, na fa’ailoa ai e ni isi o senatoa “le i ai o ni isi o leoleo e le o fa’amaoni i le tulafono”, o le mafua’aga fo’i lea e tuai ai ona maua tagata solitulafono o lo o taumafai leoleo e saili ma molia i le tulafono.

E le gata i leoleo e le o fa’amaoni i le tulafono, ae o faiga fa’aituau ma le fa’a kegi kegi o lo o alia’e mai i le lotoifale o le matagaluega o leoleo, o lo o mafua ai ona tula’i mai le fa’aletonu i le fa’atinoina o le latou tautua i le atunu’u.

Saunoa le afioga i le ali’i senatoa ia Galea’i M. Tu’ufuli, o se tasi sa avea fo’i ma Komesina o Leoleo i ni tausaga ua mavae e fa’apea, ana fa’amaoni uma leoleo i le fa’atinoina o a latou tiute ma tausisi i le tulafono, ua leva na tatau ona maua se fa’aiuga o le tele o mataupu e a’afia ai tulaga o fualaau fa’asaina o lo o alia’e mai i le atunu’u

“O le mea moni lava, o lo o i ai leoleo o lo o latou ta’uina i tagata o lo o faia solitulafono ma fualaau faasaina, taimi e alu atu ai osofaiga a leoleo, o ni isi o leoleo e o i ai, ae o isi fo’i taimi ua le iloa le itu e tutu mai ai, ana fa’amaoni uma leoleo, ua leva ona maua fa’aiuga o mataupu o lo o tutupu i le atunu’u”, o le saunoaga tuusa’o lea a Galeai i le komesina tofia o leoleo ia Save Liuato Tuitele.

Ae na saunoa le afioga i le ali’i senatoa ia Soliai T. Fuimaono e fa’apea, ua tatau ona fai uma suega a leoleo ina ia fa’amaonia latou te le o tagofia fualaau fa’asaina e aofia ai ma le ‘aisa.

Na taua e Soliai i lana saunoaga e fa’apea, e i ai leoleo o lo o latou tagofia le ‘aisa, ma ua avea ia uiga ma auala ua fa’aletonu atu ai ma le tautua a le matagaluega i le atunu’u.

Na fautua Soliai ia Save, ua o o i le taimi ua tatau ai loa ona fai suega i tino o leoleo uma lava e aofia ai ma sui o le Ofisa o Tiute, ma isi fo’i lala fa’amalosi tulafono a le malo, ina ia fa’amaonia ma mautinoa latou te le o tagofiaina fualaau fa’asaina.

O lea fautuaga na lagolagoina e le afioga i le ali’i senatoa ia Mauga Tasi Asuega, lea fo’i sa ia saunoa i le taua o le ola mama o leoleo mai le tagofia o fualaau faasaina.

Saunoa Mauga e fa’apea, afai e le maloloina le mafaufau ma le tino o le leoleo, e  le lelei fo’i le fa’atinoina o ana tiute tauave i totonu o le matagaluega.

“E o o fo’i i loia ma tagata uma o lo o galulue e fa’amalosi le tulafono, su’esu’e uma o latou tino atoa ai ma mafaufau, ina ia mautinoa latou te le o tagofia tulaga o fualaau fa’asaina, aua o le tagata e tago i fualaau faasaina, o le tagata mativa lena”, o le saunoaga lea a Mauga.

Sa ia taua foi e faapea, e tatau ona matua malosi le feau e momoli e leoleo i le atunu’u, aemaise lava ia i latou o lo o fiafia e umia ma gaosi fualaau faasaina, e le o i latou o ni tagata totoa, ae o i latou o tagata palaaai ma le matitiva, ina ua latou fa’alagolago i tupe e maua mai i fualaau faasaina ma soli ai le tulafono, ae ua le o e galulue ma afu i le tautuaina o latou aiga.

Na lagolagoina e le peresetene o le Senate ia Gaoteote Palaie Tofau finagalo o afioga i senatoa e tusa ai o auala e fa’aleleia ai le tautua a le Ofisa o Leoleo.

Na fa’ailoa fo’i e Gaoteote ia Save e fa’apea, e i ai lava “ni isi o leoleo” o lo o faia le amio lenei, ma ua tatau ona fa’amuta lea amio leaga o lo o aafia atu ai ma le atunu’u.