E tusa ai ma se ripoti sa tu’uaia e le kamupani Su’etusi o le “Moss Adams” i Amerika, lea sa gafa ma le su’eina o le tulaga o lo o i ai teugatupe o le litaea a le malo o Amerika Samoa, ua atagia mai ai le si’itia o teuga tupe o le litaea i le $2.8 miliona, talu mai le va o le tausaga e 2013 ma le 2014.

O lea si’itaga e pei ona taua i le ripoti a le kamupani Su’etusi, e mafua mai tulaga o lo o i ai tupe tului mai maketi o lo o inivesi ai tupe a kamupani i fafo.

E tapunia le tausaga tupe 2014, e $213.7 miliona le aofa’i o le teuga tupe a le litaea o lo o fa’amaumauina ai, fa’atusatusa lea i le $210.9 miliona sa i ai i le 2013, ma le tausaga e 2012 e $200.1 miliona.

Na taua i le ripoti mai le Fa’atonu o le Ofisa o le  Litaea a le malo ia Filisouaiga F. Ta’afua e fa’apea, o le taua o tupe o lo o i totonu o teugatupe a le Litaea, e mafai ona fa’atupe ai le totogiina atu o penefiti mo i latou uma o lo o agava’a i le litaea a le malo.

I tulaga o tupe sa totogi atu e le Litaea mo penefiti i le 2014, o lo o taua ai le aofa’i e $20.1 miliona, fa’atusatusa lea i le $19.7 miliona sa totogi atu i le tausaga e 2013, ae i tulaga o tupe fa’aalu mo le pulega (administrative expenses), e $1.4 miliona sa totogiina i le tausaga e 2014, fuafua i le $1.2 sa totogi atu i le 2013 e pei ona taua i totonu o le ripoti.

I tulaga o tupe maua mai saofaga a tagta litaea atoa ai ma teugatupe fa’aopoopo, ua maitauina le si’itia i le tausaga tupe e 2014 i le aofa’i e $10.9 miliona, pe a fa’atusatusa i le $10.5 miliona sa i ai i le tausaga e 2013.

O lo o taua fo’i i se vaega o le ripoti e fa’apea, o le teuga tupe o le Litaea na fa’avae i le 1971, ma le fa’amoemoe e totogi atu ai saofaga ma fa’amanuiaga i tagata faigaluega a Amerika Samoa ua malolo litaea mai a latou galuega fa’atino.

O le tausaga tupe e 2014, e to’a 1,801 le aofa’i o i latou o lo o tali penefiti mai le teuga tupe a le litaea, fa’atusatusa lea i le to’a 1,762 sa i ai i le 2013 e pei ona taua i le ripoti.

O le tagata e agava’a i le litaea atoa, ua atoa le 65 tausaga o lona matua, ma ua atoa fo’i le 30 tausaga o lana tautua i le malo pe sili atu fo’i, po o se tasi fo’i ua atoa pe sili atu fo’i le 30 tausaga o le tautua, ae ua 55 tausaga o lona soifua, o i latou la ia e agava’a i le penefiti atoa o le litaea.

Ae mo i latou e vave malolo litaea i le 55 tausaga le matua ae ua atoa fo’i le 10 tausaga o le tautua pe sili atu, e le agava’a i latou i fa’amanuiaga atoa e tatau ona maua.

O le fonotaga fa’a le tausaga a le Litaea i Hawai’i, e ta’ilua tausaga ma usuia, lea fo’i e malaga ai sui o le Fono Faitulafono fa’apea ai totino o le Komiti Fa’afoe o le Litaea a le malo, mo le mata’ituina o le tulaga o lo o i ai lea teuga tupe taua a le malo.