Ua sola nei le Sa o le Fuao mai Vatia ma le siamupini o tuuga fautasi mo le vaiaso o le si'osi'omaga o lenei tausaga, i le mae'a ai lea o se la tuuga finau ma le Sa mai le afioaga o Aua, le Paepaeulupoo II.

O le lona tolu ai lenei o tausaga talu ona amata mai le polokalame fou lea a le Matagaluega o Fefa'atauaiga ma Alamanuia a le malo, e fa'alauiloa ai taumafaiga mo le puipuia ma le fa'amamaina o le si'osi'iomaga e aofia ai auvai ma matafaga, lea o lo o galulue fa'atasi ai le malo ma ni isi o afioaga i le atunu'u, e aofia ai ma afioaga o lo o i ai a latou fautasi.

O le vaiaso na te'a nei na faia ai le ulua'i tuuga e saili mai ai fautasi e lima e tausinio i le sailiga siamupini, ma tula'i mai ai Sa e lima na aofia i le tuugai le aso Lulu  e aofia ai le Fuao, Paepaeulupoo II, Fetuoleafiafi mai Fagaalu, Fealofani Samoa II mai Fagasa, fa'apea ai ma le Manulele Tausala II mai le afioaga o Nu'uuli.

O le tu'uga na amata atu i Pago Pago, le vaega e tini mai ai, ma aga'i atu ai lea i tai atu o le 'ava ma le fa'amoemoe e toe mimilo mai ai ma toe aga'i mai ai loa i uta i le tini.

Na matua mataina gaioiga sa faia e le Fuao mai Vatia, o le fautasi fo'i lea na sola ma le siamupini o le tuuga lenei i le tausaga na te'a nei, ina ua fa'alua ona ia taumafai e taofi gaioiga a le Paepaeulupoo i le taimi o le tuuga, ma sola ai loa le Tama'ita'i o le Ao ia Gaoteote Palaie Tofau ma lana auva'a ma le siamupini o lenei tausaga.

E afa fautasi na mua ai le Fuao i le Paepaeulupoo na mauaina le tulaga lua, ae pe sau ma le 10 fautasi na va ai le tulaga lua ma le tulaga tolu, le Fealoafani Samoa II mai Fagasa, o le tulaga fa na maua e le Fetuafiafi mai Fagaalu, ma le tulaga lima na maua e le Manulele Tausala I mai le afioaga o Nu'uuli.

O le taua o lenei tu'uga e pei ona saunoa le Fa'atonusili o le Matagaluega o Fefa'atauaiga ma Alamanuia i le vaiaso na te'a nei e fa'apea, e unaia ai sui o afioaga ina ia galulue fa'atasi ma le malo, i le fa'amamaina lea o mataga aemaise ai o auvai i le atunu'u, ina ia fa'amama ma fa'amatagofie laufanua o Amerika Samoa.