ai totogi ...

E silia i le to’a 600 faiaoga mai le Matagaluega o Aoga a le malo ua mae’a ona toe fa’atulaga a latou totogi, i lalo o le polokalame lea sa fautuaina e le afioga i le ali’i kovana ia Lolo Matalasi Moliga, e fuafua ai le si’i o le totogi o le faiaoga i le fa’ailoga o lo o ia umia.

O lea mataupu na mafai ona fa’amanino e le Fa’atonusili o le Matagaluega o Tagata Faigaluega a le malo ia Sonny Thompson, ma le Fa’atonusili o Aoga ia Vaitinasa Dr. Salu Hunkin-Finau, i se iloiloga sa faia i luma o le komiti o aoga a le maota o sui i le vaiaso na te’a nei, mo le talanoaina o ni isi o mataupu sa fia malamala i ai afioga i ali’i faipule.

Ina ua fesiligia e le ta’ita’i komiti a le maota o sui ia Vaetasi Tuumolimoli Saena Moliga le susuga a Thompson i se tulaga ua oo i ai le polokalame a le kovana mo le toe fa’atulagaina o totogi o faiaoga, na taua ai loa e le molimau le toatele o faiaoga ua maea ona auai i le polokalame lea, e $23,000 mo faiaoga ua maua fa’ailoga BA, ae $27,000 mo faiaoga ua maua fa’ailoga MA.

E tusa ma le $5 miliona le vaega tupe ua fuafua e fa’atino ai le toe fesuia’iina o totogi o faiaoga, lea e aofia ai le vaega tupe e $3 miliona mai le feterale, ae $2 miliona e aumai i tupe lotoifale, ma ua i ai fo’i se fuafuaga a le ali’i kovana e pei ona saunoa Thompson, e tu’uina mai ai se paketi fa’aopoopo mo le Ofisa o Aoga i se taimi o i luma, e talosagaina ai le fono mo le fa’asoasoaina atu o se vaega tupe e fa’atupe ai lenei fa’amoemoe taua.

E ui na taua e le to’atele o faipule le taua tele o le fuafuaga ua faia e le ali’i kovana, peita’i na saunoa le Fofoga Fetalai ma ia fesiligia molimau, po o i ai se fuafuaga a le malo mo faiaoga fai fa’ailoga ua silia i le ta’i 10 tausaga ma luga atu le umi o latou umia pea totogi maualalo, po o i ai se fuafuaga a le kovana ma le faigamalo e tu’u atu ai ni nai mea alofa mo le latou tautua i le tele o tausaga.

Mo se fa’ata’ita’iga e pei ona saunoa Savali Talavou Ale, o le polokalame lea ua faia e le kovana mo faiaoga e i’u mai ma le fa’ailoga, o se tulaga lelei lea ma manaia mo alo ma fanau a le atunu’u o lea fa’atoa i’u mai i aoga ma a latou fa’ailoga, ae tatau fo’i la ona i ai se fuafuaga a le malo mo nai faiaoga ua leva ona i ai fa’ailoga, ae sa alu lava i le totogi maualalo.

“E taua le polokalame ua fa’atula’i e le kovana mo nai aoga, pau le atugaluga, o nai faiaoga ua tele tausaga o i lalo o latou totogi, a’o lea ua si’i fa’atasi ma le vaega fou fa’atoa i’u mai ma fa’ailoga, afai o le a se finagalo a le faigamalo, a’o sina fa’aopoopoga fo’i i o latou totogi e tusa ai o le latou tautua i tausaga e tele”, o le finagalo lea o Savali.

O se tasi o mataupu na fesiligia i tulaga o totogi o faiaoga, o le fa’atusatusaina lea o totogi o faiaoga a Amerika Samoa ma totogi o faiaoga mai Samoa lea ua aumai e galulue iinei, e pei ona fesili Fatulegae’e Palepoi Mauga.

E le gata na fesiligia e Fatulegae’e totogi o faiaoga mai Samoa o lo o umia faailoga BA, ae sa ia taua fo’i e fa’apea, e tatau fo’i ona silasila le malo, o fa’ailoga a faiaoga i Samoa o lo o sailia lava i totonu o le latou Iunivesite, lea fo’i e tutusa ma le Kolisi Tu’ufa’atasi a Amerika Samoa, ae o a latou kolisi e tutusa ma aoga maualuluga i le atunu’u

Na fa’amanino e Vaitinasa e fa’apea, e le tutusa ma fa’ailoga BA o lo o umia e faiaoga a le malo, aua e ese lava le sau o le faiaoga ma lana faailoga BA, ae tatau fo’i ona aloaia ma fa’amaonia ua agava’a le faiaoga e a’oa’o fanau i totonu o le potu aoga.

Na lagolagoina e Vui Florence Vaili Saulo le finagalo o Savali i siitaga o totogi o faiaoga ua leva ona tautua, atoa ai ma lana talosaga ia Vaitinasa, ina ia alofagia aoga i lona itumalo, lea e o o mai lava i le taimi nei o lo o nonofo pea lava fanau aoga i luga o le fola o le fale, e mafua mai e le o lava kesi ma nofoa e aooga ai latou.

O se tasi o mataupu taua a fesiligia e le tama’ita’i faipule fou ia Atalina Asifoa, o le aofa’i o tamaiti aoga i totonu o le potu aoga, aua o iina e fuafua i ai le lelei o le aoaoina o fanau aoga, pe afai e le toatele naua i totonu o se potu aoga.

Saunoa Vaitinasa e fa’apea, o le tulaga sa’o lava e tatau ona i ai aoga i le atunuu, e tatau ona to’a 20 fanau aoga ae tasi le faiaoga (1:20), peita’i o le fa’afitauli o lo o tula’i mai i le taimi nei, ua avea le le lava o potu aoga ma faiaoga ma itu ua o o atu ai lava i le ta’i 30 tamaiti aoga ma luga atu i le faiaoga e tasi.

Ua fautuaina fo’i e le maota o sui ia le fa’atonusili o aoga, ina ia silasila toto’a i le fa’afitauli o faleaoga i ni isi o itumalo, aemaise lava i le itumalo o Alataua lea na a’afia aoga i galulolo, lea lava e oo mai i le taimi nei o lo o fa’atali pea le fausiaina o faleaoga.

Saunoa Savali e fa’apea, o le tali masani lava lea o lo o fa’amoe mai ai le itumalo ma le Fono pe a fesiligia tulaga o faleaoga, e fai mai lava ‘ua toeititi mae’a’, peita’i o le tali lava lea na tu’uina mai i le isi 3 tausaga talu ai, lea lava e fa’aauau mai i le taimi nei.

O le agaga o le fono e pei ona saunoa Savali, a lelei faleaoga e manuia fo’i ma lelei nofoaga e aoaoina ai fanau a le atunu’u.