E silia i le $80,000 le tupe na fa’aalu e le Matagaluega o Fa’atoaga a le m alo e fa’atupe ai fa’ailoga mo le Farm Fair a le aufai fa’atoaga lea na faia i le masina na te’a nei, e pei ona fa’amaonia mai e le Fa’atonusili o lea matagaluega, le afioga a Lealao M. Purcell

O le vaiaso nei na amata tufatufa ai siaki mo le aufai fa’atoaga na tauva i lenei fa’amoemoe, lea na amata mai lava i le $1,800 le maualuga o siaki sa tufatufa e o o atu i le ta’i $500, e pei ona fa’amaonia mai e Lealao.

Saunoa Lealao e fa’apea, o se tasi o mafua’aga na tuai ai le tufatufaina atu o siaki mo le aufai fa’atoaga, e le gata sa tau tu’u fa’atasi togi mo vaega taitasi na tausinio uma i ai le aufai fa’atoaga, ae sa manatu fo’i ua talafeagai le tufatufa atu o siaki i le taimi e latalata ai i le kerisimasi, ina ia mafai ai ona fesoasoani i fa’atauga a aiga mo aso fiafia.

“E le i faigofie le galuega a le komiti i le tau tuu faatasia o togi mo vaega taitasi uma sa tausinio ai le aufai fa’atoaga, e ui lava fo’i sa i ai ni isi o le aufai fa’atoaga sa fa’asea i le tuai ona maua o fa’ailoga, ae o le itu taua o lea ua fo’i ma le agaga fiafia ina ua maua a latou siaki”, o le saunoaga lea a le ali’i fa’atonu ina ua mae’a ona tufatufa siaki i le aso Lulu na te’a nei.

Na soisoi le afioga a Lealao ao ia fa’amatala i le Samoa News le fa’ateia o ni isi o le aufai fa’atoaga ina ua vaai i le tetele o a latou siaki na maua.

“O le isi toeaina fai fa’atoaga na matua te’i lava ina ua tu’u atu i ai lana siaki, ae vaai atu e tele le siaki, na ofo le toeaina ma fai mai, sa i ai lona manatu e le tele fa’apea sana siaki, ae sa ou fai atu i ai, mea lena e taua ai le onosa’i ma fa’atali”, o le saunoaga lea a Lealao ma soisoi ina ua toe to manatu i fetufaaiga sa faia ma ni isi o le aufai fa’atoaga.

O le tausaga lenei ua atoa i ai le tolu o tausaga sosoo o fa’atinoina pea e le Ofisa o Fa’atoaga le Fa’aaliga mo le aufai fa’atoaga.

O le tausaga na te’a nei na ave ai le fa’amuamua i le taro peita’i o le tausaga nei e pei ona saunoa Lealao, o fualaau ‘aina lea sa ave i ai le fa’amuamua, ma sa vaaia fo’i le tele o ituaiga fualaau ‘aina eseese na mafai ona fa’alauiloa i lenei fa’amoemoe.

Saunoa Lealao, o le agaga atoa o le Ofisa o Fa’atoaga ma le malo, ia tofu uma le aufai fa’atoaga sa lesitala mo lenei tauvaga ma sina meaalofa e fesoasoani ai i le atina’eina o a latou fa’atoaga.

E silia i le to’a 100 le aufai fa’atoaga a le atunu’u sa mafai ona lesitala o latou suafa i le fa’aaliga o lenei tausaga.

Saunoa Lealao e fa’apea, o se tasi o suiga mo fa’ailoga o lenei tausaga, ua manatu le Matagaluega e taofi le toe tu’uina atu o fa’ailoga i mea faigaluega, ae sili pe a fa’atupe fa’ailoga ina ia mafai ai fo’i ona fesoasoani i le aufai fa’atoaga i auala e atia’e ma fa’aleleia atili ai a latou fa’atoaga.