Ua sola nei le fautasi o le Manulele Tausala #I mai le afioaga o Nuuuli ma le fa’ailoga tupe e $20,000, ina ua avea ma siamupini o tuuga fautasi o le sisiga fu’a o lenei tausaga, i se finauga faigata ma le Sa malosi o le Aeto mai le afioaga o Pago Pago i le aoauli ananafi.

E ui na mua atu lava le Aeto ina ua latalata atu i le vaega e tini ai le tuuga i lalo o Pulu tetele i luma o le ASCO Motors, peita’i na toe tao tao tua atu lava le Manulele Tausaga #1 ma muamua ai loa taunu’u i le tini.

E le i taitai o o i le taimi fa’atulagaina o le tuuga i le taeao ananafi, ae ua vaaia le tumu tumu atu o le atunuu i luga o le api tagalu mo le tapuaia o Sa sa lautogia mo le tuuga o lenei tausaga.

O le to’atele o afioaga sa faia a latou toniga e fa’ailoa ai lo latou lagolagoina o a latou fautasi ma auva’a, o isi ua faalelea solo fu’a e tusia ai igoa o fautasi a o latou afioaga, ae o isi o le atunu’u ua na o le sa o ma tapua’i gugu ina ia tini lau o le fa’amoemoe o fautasi mo lenei tausaga.

Pe tusa toe 100 mita le mamao o le Aeto ma le Manulele Tausala #I mai le tini, sa vaaia ai le tapuaiga a ni isi o le afioaga o Pago Pago ua aga’i atu ma fu’a i luga o le sami, ma talo talo fa’amalosi atu i le tofa a Va’amua Henry Sesepasara ma le auva’a a le Aeto e fa’amalolosi i le tini, a’o tao tao tua mai ai fo’i i tua le tofa a Manutafea Taufete’e ma lana au va’a.

Na amata lava le tuuga i le motu mai i luma o le Paepaeulupoo II, peita’i e le i umi ae tao tao tua mai ai loa ma le Manulele Tausala #I, sosoo mai ai ma le Aeto, ma amata mai ai loa finauga mo le tulaga muamua, seia o o ina taunuu mai i le tini, ma sola ai Nuuuli ma le siamupini o faigamea i le tai o lenei tausaga.

O le faaiuga la lenei o le tuuga fautasi o lenei tausaga, na fa’amaonia mai e le taitaifono o le Komiti o Tuuga Fautasi o le fu’a o lenei tausaga, le afioga a Lualemaga E. Faoa.

O le tulaga muamua ua sola ma le fautasi a le Manulele Tausala #I mai Nuuuli; tulaga lua le Aeto mai Pago Pago; tulaga tolu le Paepaeulupoo II mai Aua; tulaga fa le Fuao mai Vatia, o le siamupini fo’i lea o le tuuga fautasi o le 2013; Fetu o le Afiafi mai Fagaalu; Manulele Tausala II mai Nuuuli; Matasaua mai Manu’a; Fealofani Samoa II mai Fagasa, ma le Fa’asaulala mai Vailoatai.