Ua solofua e le fa’amasinoga fa’aitumalo i le taeao ananafi moliaga sa tu’uaia ai e le malo se ali’i leoleo o le toese i Tafuna atoa ai ma ni ali’i pagota se to’atolu, ina ua manatu le malo e mana’omia se isi taimi e fa’aauau ai a latou su’esu’ega e fa’atatau i lenei mataupu.

O le tama’ita’i loia ia Jessica Bargman na fa’aleoina le talosaga mo le malo, i le taimi o le iloiloga fa’apitoa lea sa faia i luma o le afioga i le ali’i fa’amasino ia Elvis P. Patea, ina ia solofua moliaga fa’asaga i le ali’i leoleo ia Fatu Enari, atoa ai ma ali’i pagota e to’atolu ia Matafua Mataipule, Tolupo Hodges ma Ioane Filipo.

O Enari na tu’uaia e le malo i moliaga mamafa e lua o lona fa’ataga lea o se pagota e sola i tua ma le toese, ma lona fesoasoani e fa’asola se pagota i tua, ma le moliaga mama o lona faia o ni gaioiga e fa’aleaga ai mea molimau a le malo, ae o ali’i pagota e to’atolu na tu’uaia i le moliaga e tasi o le sola i tua mai le toese.

Na taua e Bargman i le fa’amasinoga e fa’apea, talu ai o lo o i ai ni isi o fa’amatalaga e mana’omia e le malo mai lenei mataupu, ua manatu ai e solofua le mataupu lenei ae sei fa’aauau a latou su’esue’ga i le mea tonu sa tupu.

E le i fa’ailoa e le loia a le malo i luma o le fa’amasinoga po o a isi fa’amatalaga fou o lo o latou va’ava’ai i ai.

O le mataupu e pei ona tu’uaia ai Enari ma pagota e to’atolu, na afua mai i le fa’alavelave lea na taofia ai e leoleo o le Vaega o Leoleo Su’esu’e (CID) le Van a le toese numera (PS-52) i Aolofau i le afiafi po o le aso 27 Tesema 2014, o lo o ave mai e Enari fa’atasiai ma ali’i pagota e to’atolu o lo o i totonu o le Van.

Ina ua fesiligia e leoleo o le CID ia Enari fa’atasi ai ma pagota i le mafua’aga o le latou malaga i le Van, na taua ai e Enari e fa’apea, o se fa’atonuga mai le ali’i sui pule o le toese ia Lt. Fasi Ta’ase, na mafua ai ona latou malaga ma pagota i Alofau, e fai le paipa o le sai pua’a a le ali’i o Hodges sa fa’aletonu.

Na teena e Lt. Taase lona fa’ataga o Enari e alu e momoli ali’i pagota i Alofau e fai le paipa o le sai pua’a sa fa’aletonu. O ali’i pagota e to’atolu sa molia i lenei mataupu, o lo o tuli nai a latou fa’asalaga fa’afalepuipui, ina ua ta’usala i latou e le fa’amasinoga i le umia fa’asolitulafono lea o vaega o fualaau fa’asaina.

Ua toe tatala nei i tua Enari mai le toese sa taofia ai, ae o ali’i pagota e to’atolu sa tu’uaia fa’atasi i latou i lenei mataupu, o lo o taofia pea i le toese mo le tuli fa’amae’aina o a latou fa’asalagao lo o tuliina nei.