I fusu'aga AFC MMA i le Alaska Airlines Center na faia i le aso 13 Fepuari, 2019 na to'atele sa peti - 81% - mo le ali'i o Douglas McFresh lea sa fa'alauiloa o le "Diabolical" ma fa'ailoa numera i luga o laina feso'ota'i a le Google e tusa ma le 19% sa peti e malo i le "Samoan Lion" Onosa'i Iosefo Moana mai Leone, Amerika Samoa.

O lea fusu'aga e i ai ali'i fa'atonu ma faia'oga o le "Diabolical" ae na fe'emo lava moli ma le toe te'i mai i le 1.03minute o le ulua'i ta'amilosaga ina ia laveia Moana.

I le taimi nei ua tula'i mai lana fusu MMA/UFC ua amata ona fefefe i ai le to'atele o lo'o aofia i lana paga.

O Onosa'i sa soifua a'e i Leone, ma a'oga ai, lea ua malaga atu i Alaska ma si ona aiga - si ona toalua ia Tauataase Toli -Tafua Moana ma sia ma fanau Lion, Qpid, Samson, Leila, Kymaiah.

O Faia'oga fo'i nei a Onosa'i, o lana fanau tama e to'alua, Lion ma Qpid, o i la'ua ia e tutu ma le solo ma le faguvai i le tulimanu e malolo mai ai si o la'ua tama i taimi o ana fusuaga MMA.

I lea po na to'ele ai le ali'i malosi o McFresh ia Moana, na matua mata'ina le fa'afeiloa'iga e nei aloali'i e to'alua o si o la'ua tama, avatu le agiagia a lona malo e na te la'eia ina ua sisi'i i luga ona lima, o le fa'ailoga o lona manumalo a'ia'i i le TKO ia McFresh.

I lana saunoaga fa'apitoa mo lona atunu'u ma le tapua'iga a aiga, sa saunoa ai Moana, "E muamua ona si'i le vi'iga ma le faafetai i le Atua,ona o le ola ma le malosi, o le fa'amoemoega o lo'u nei tagata o le fusu i totonu o le UFC aua fo'i se manuia o Aiga, Nu'u, Ekalesia ma le Atunu'u e pele i lo'u loto o Amerika Samoa."

"O lo'u tuputupu a'e sa faigata lava le ola to'atasi, ae peitai lea ou te faafetai tele ia Ieova i lona puipui malu ia te a'u i ona aao faalavalava mai tiga, pologa, mativa, ma le fa'atauva'a. Sa ola a'e e masani ma le tiga mai le la'ititi, e fa'afetaia ai pea le alofa o le Atua, ua ia molita'i le tagata i sona fa'aeaga."

Sa ia fa'ailoa lona aiga, "Si o'u Tama Iosefo Moana, Peni Niualofa Ape ma Junior Ape, Avegalio Aigamaua family, Helsham family, Pua Puapuaga family,Vaimoe Vaimoe family, Faifeau Faamanu Onolina Malama. Si o'u to'alua ma le fanau ou te alofa tele ia te outou uma, ia alofagia e le Atua lenei fo'i ala e fa'aeaina ai i tatou fa'atasi i ana fa'amanuiaga. Fa'afetai tele le tapua'i, fa'afetai tatalo mai."

E koleni lava Moana i ona taimi avanoa i le Alaska Club Gymnasium, ae leai se tasi na te fa'atonutonuina o ia i lana sipa ma le ala fusu. O ia mea sa soifua a'e lava o ia e fiafia i ai e koleni ai lona tino. O lo'o galue o ia o se Ave Loli a le Gensco Inc. i le aso atoa.

E taua ia Moana lona aiga, e le manatu o ia e fa'avaivai lana tausiga i si o la'ua aiga, ma e tau faigaluega uma i la'ua ma Tauata'ase ona o lea fo'i ua tuputupu le aofa'i o le fanau.

E auai atu i laua i le latou Ekalesia "Water of Life" lea e avea ai le susuga Pr Fa'amanu ma Onolin Malama ma latou faife'au tausi ekalesia. I le taimi nei ina ua malo a'ia'i Onosa'i Moana i lana fusuaga lea ma McFresh, ua atoa i ai le 17 o ana fusuaga. Ua 10 malo, 5 faiaina ae 2 tutusa. Peita'i o McFresh ua na'o le 5 fusuaga 3 manumalo ae 2 faiaina.