Ads by Google Ads by Google

Polokalama a le Watersports tu’uga a fanau talavou - fa’amalositino

Tusia: Leua Aiono Frost

Pago Pago, AMERICAN SAMOA — Ua iloga ona fa’afiafiaina fanau talavou i le latou tu’uga fa’apitoa na tu’ufa’atasia e le Pulega o le South Pacific Watersports & Fitness i Utulei. O nei ta’aloga ua matua fa’amalosia ai le fa’amalositino ia tino lelei ma agava’a le fanau i so’o se ta’aloga ua filifili e ta’a’alo fa’atauva ai ae maise ai lava ta’aloga e fa’atautaia i luga o le sami.

I le ta’amilosaga na fa’amalosia nisi o le fanau na fili fa’apitoa e tauva ai i le aso Faraile na te’a nei e valu lelei ona la’asaga sa fa’atulaga e tatau ona ausia e le tama ma le teine tauva.

Na muamua lava pa le fanau e toso ai le masini alo va’a e tatau ona talafeagai lau toso lea ma le 500mita le mamao e te alo ai le va’a i luga o le sami. Lona lua ua fa’atulaga ai le koleni fa’asuicide  e aofia ai le totolo i le oneone e tau i le laina o cones ua fa’atulaga, soso’o ma le oso i le Kayak e alo, uma sau koleni i laina o pa’u ta’avale ua fa’ata’atitia e te tamo’e ai i le va o pa’u.

A maea o’o fo’i i le sami e a’au, taliu mai toe toso le isi 500 maila e alo ai le va’a, toe totolo i le oneone ma fa’asolo atu ai e fa’amae’a i le folau i le va’afaila.

O i latou na tauva ua matua fai lava loto ina ia tini ma manumalo, ua taua tele le tulaga o le fa’atini muamua mai, a’o le ausia ona usita’ia uma o le tele o lu’iga o lenei tu’uga fa’apitoa.

Ua iloga e fa’amalositino toe fa’aleleia atili ai le alova’a, ua a’oa’o atu ai ma le manava ia lava mo i latou e koleni fa’apitoa mo fa’atama i le tai.

O le tamaitai o Paula Stevenson McDonald, le fa’atonu o le ta’amilosaga fa’apitoa o ta’aloga i le tai ma koleniga fa’apitoa sa ia fa’atautaia le ta’amilosaga i lea taeao mo le fanau. Ua iloga fo’i le tutu a’ai o fanau i so’o se mea e fai e tapena ai le amataga o le ta’amilosaga fa’apitoa.

Ua i ai fo’i le vasega o e fa’amalosi’au i a latou pa’aga ua ofo e tutu’u. I le taimi a’o toso le masini alova’a, na va’aia le naunau o le fanau ia vave ona mae’a le 500m fa’atulagaina e le masini, ae ina ua latalata lava i le toe toso, ua va’aia le gagase o lima ma le faigata ua i ai ona fa’amae’a le 500m o le toso.

O le totolo fo’i i le oneone e le o se mea faigofie ma ua leai se tasi e fa’avaivai aua o le igoa tonu o lea ta’aloga, ua le manumanu i le ola. O le fanau ua kolenia fa’apitoa nei e le Watersports e mautinoa lava le tula’i mai i le lumana’i i alogava, paopao, kayak poo fautasi, ua tulaga tutusa lava na mea uma i le sogasoga o fanau e fia mautu o latou iloa o koleniga fa’apitoa mo fa’agatama i le tai.

Fa’ailoa e se tasi o fanau o lo’o auai i le tu’uga, “O le taimi lenei e le o ese tama ese teine, ua tele fo’i ina to’ele tama i teine i ta’aloga nei. O le lava o le manava ma le lelei o le alo lea e fai iai le tu’uga lenei. E o fa’atasi a matou i mea uma.”

I nisi o polokalama o lo’o fa’atautaia i le tuuaga umi lenei o a’oga, o lo’o i ai le polokalama valiata ma tusi ata a le fanau, ma ua fesoasoani mai ai le faia’oga o le Arts sa ia fa’atautaia vasega i le ASCC, Regina Meredith.

O le isi polokalama o le faitau tusi, ma ua faitauina tala e fa’afiafiaina ai loto o le fanau ia to’aga e faitau tusi, ua faitauina fo’i tala fa’asolopito ina ia silafia e le fanau tala’aga o Amerika, tala’aga o Samoa ma isi fo’i atunuu o le lalolagi.

Ae o se isi polokalama fiafia tele i ai le to’atele o le fanau, o le sopo lea i le mauga o Faga’alu, ma to’ai taunu’u i le tumutumu mauga ua i ai fana ma tanetau a le USArmy ma le USMarines mai le vaitau o le taua lona lua o le lalolagi.

O le sopo lea ua avea ma fa’amalositino, o le nofoaga o ia tanetau tuai ma fana i le tumutumu mauga o se toe fa’amanatu lea o le tala’aga o Amerika Samoa ma le filifilia ai e le USNavy e avea ma Uafe tele ma le sefe mo latou Fuava’a. Peita’i o se mea fiafia i le fanau ina ua gafatia e i latou ona a’ea le mauaga o lo’o feagai ma i latou.

O nisi na o polokalama o lo’o ua fa’afiafiaina ai le fanau ma fa’amautu ai nisi o tomai ma agava’a, ia a’e le a’oga a’o tumau lo latou fiafia e a’oa’oina i latou i Amerika Samoa lo latou atunu’u pele.

Fa’atulaga pa’u mo le isi vaega o le tu’uga fa’apitoa. [ata: Leua Aiono Frost]