O le aso Gafua o le vaiaso fou, Tesema 15, 2014 o le a tatalaina ai le tautua fou a le falema’i o le LBJ ua fa’aigoaina o le ‘Non Urgent Clinic’, e sui tulaga i le tautua o le ‘Primary Care Clinic’ e pei ona masani ai le atunu’u mai tausaga ua mavae, e pei ona fa’amaonia mai i se pepa o fa’amatalaga sa tu’uina mai e le Foma’i Sili ia Dr. Iotamo Saleapaga i le Samoa News ananafi.

O le mafua’aga autu o lenei fesuiaiga e pei ona saunoa Dr. Saleapaga, ina ia taofia ai le fa’asea mai le mamalu o le atunu’u e fa’atatau i le fiu lea e nofonofo ma fa’atalitali i luma o le ‘ER’ mo le taimi e vaai ai se foma’i.

“O le suiga la lea ua faia nei, e le fa’apea ua tapunia le Primary Care Clinic e pei ona manatu ai ni isi o le atunu’u, ae o lea ua suia mai le tautua lena i le tautua fou ua taua o le ‘Non Urgent Clinic’, ina ia mafai ai ona foia le fa’afitauli ua tele tausaga o fa’asea i ai le atunu’u i le tula’i so o mai”, o le saunoaga lea a Dr. Saleapaga.

Na taua e le foma’i sili i le Samoa News e fa’apea, o le tautua lava ia a le potu o le ‘ER’, e fa’apitoa mo tagata e a’afia i gasegaase matuia, ae a o o mai loa i nai tagata e le o matuia tele tulaga o a latou gasegase, o iina la lea e tula’i mai ai le fa’asea, ona ua manatu le mamalu o le atunu’u o lo o a’afia i ituaiga gasegase mama nei, ua le amanaiaina i latou e le falema’i, ae le iloa e leai.

O le tautua fou la lea ua faamoemoe e tatalaina i le vaiaso fou, o le toe faalauteleina lea o le auaunaga a le ‘ER’, ina ia mautinoa e tofusia le atunu’u ma avanoa taitasi latou te vaaia ai le foma’i, ma taofia ai le toe tula’i mai o fa’asea e pei ona fa’alogoina mai le mamalu o le atunu’u i le tele o tausaga ua mavae.

Ina ua fesiligia la le tautua a le Primary Care pe moni o le a tapunia, ae na saunoa Dr. Saleapaga, o le auaunaga lea sa masani ona vaaia e le Primary Care e pei o le vaaia lea o gasegase sa fa’atulaga a latou ‘appointment’, o le a tu’uina atu uma i lalo o le vaaiga a le Medical Clinic.

“O le mea moni lava ia, e tutusa lava le auaunaga sa fa’atinoina e le Primary Care Clinic ma le Medical Clinic, peita’i o lea ua a’e se manatu, taoto atu loa le tautua lea e fa’aauau pea e le Medical Clinic, ae o le a suia le igoa o le Primary Care, ina ia mafai ai ona fa’aleleia atili le tautua a le falema’i mo le atunu’u.

Na taua e le Pulesili fou o le LBJ ia Taufefe’e John Faumuina i le Samoa News e fa’apea, o se tasi lenei o fuafuaga vaai mamao a le ali’i kovana ia Lolo Matalasi Moliga, o le tu’u atu lea o le tautua a le Primary Care e tauave e le Matagaluega a le Soifua Maloloina, ae tausisi pea le LBJ i le fa’atinoina o lana pito laau, o le vaaia lea ma le tausiga o le soifua maloloina o le atunu’u i aso fai soo.

“Talosia o le a avea lenei suiga fou o se auala e taofia ai le toe tula’i mai o le faasea a le atunu’u”, o le saunoaga lea a Dr. Saleapaga.

O le tautua fou a le Non Urgent Clinic, e faapitoa mo i latou e aafia i gasegase mama e pei o le niniva o le ulu (tulou), tiga le tino, tiga le taliga, po o isi lava vaega o le tino e mana’omia ai se togafitiga vave, e pei ona saunoa Dr. Saleapaga.