PESIPOLO ASHSAA - CRUSADER MA TAFUNA HIGH

I le ta’aloga faitaulia a Fa’asao Malisi Crusaders ma le Laumua o le Toa a Tafuna High i le malae pesipolo “Tony Solaita” i le afiafi o le aso Lua, na matua iloga fo’i ona fita lea ta’aloga, aua sa taufao lava le manumalo.

I le tataga muamua sa tula’i mai ‘ai o ‘au e lua: Tafuna 5 Crusaders 1. Toe alu le tataga lona lua, e le’i fa’aopopo lava, peita’i i le tataga lona tolu sa maua ai le isi ‘ai o Tafuna. Tula’i mai ua  6-1. Ina ua talitua le Crusaders na latou toe fa’atepa ai Tafuna e le’i taitai le malosi o le latou itu, aua e le’i leva, ae tolu pe soso’o ua lelei le fa’ate’a ae le taina le polo e ‘au tata a Tafuna. O mai loa ma Crusaders e tata, oso lava le ova mamao a le tama fa’ate’a Mana Hunkin, e le’i toe fa’atali uma le to’atolu sa tutu i base i le o mai i totonu e fa’atini, maua ‘ai e lima i le 6 a Tafuna i le fa’aiuga o le tataga lena.

Peita’i ina ua toe sofa’i mai Tafuna e nao le tasi le fa’atini na maua a Crusaders i le latou tataga na soso’o ai, ae oso mai Tafuna maua le isi a latou lua, ma tula’i mai ai ‘ai o le ta’aloga atoa i le Tafuna 7-6 a Fa’asao Malisi Crusaders.

TINO LELEI - ASOSI BODY BUILDING

Ua i ai nei le asosi ua fa’aigoaina o le American Samoa Body Building Association[ASBBA] ua latou tauva e fa’ailo le tino lelei o ali’i ma tama’ita’i o Ameika Samoa.

O le asosi fou lenei ua amata fa’atuina e le tama’ita’i o Ursula Te’o Martin, ma nisi o le latou komiti e aofia ai Ammon Johnson ma Ryan Taifane, ae maise le Coach o Ed Imo,  lea latou te galulue i le ASCC Land Grant Wellness Program.

E to’afa sui ua iloga mai o le a taumafai e fa’ao’o atu i Papua Niu Kini i lenei tausaga i ta’aloga a le Pasefika:

Bert Fuiava (Male): Over 90kg; Stallone Nua (Male): Under 90kg; Laki Tran (Male): Under 85kg; Tupou McEntire (Female): Under 55kg; Ursula Te’o Martin (Female): Over 55gkg: Coach/Athlete

Ua fa’ailoa mai e le tama’ita’i sa ia amatalia ona a’oa’o ala e tausia ai le tino lelei, fa’atasi ma ituaiga o fa’amalositino e faia e fa’aoso ai maso o le tino i ona vaega eseese fa’apea fo’i ma mea’ai ma mea inu e ao ina tausami ai i latou o fa’amalositino, e fa’apea, “O le naunauta’iga ia tino lelei tagata Samoa, ia aoga o latou tino tetele e fa’aoso ai maso, sa fa’aosofia ai lo’u tagata e fa’aauau atu koleniga ia fa’aititia pauna o tagata uma, ina ia fa’aleleia atili ai le va’aiga lautele o tino lelei o tatou tagata, ma fa’atauva ai loa fa’avaomalo i lea fo’i fa’agatama.”

Ua fa’apea fo’i le naunauta’iga o i ai ia Ryan Taifane, o se tasi o lo’o galue lagolagosua ia Ed Imo i le itu o ta’aloga tau si’isi’i u’amea mamafa, ma ua aofia fa’atasi fo’i i polokalama o le “Soifua Lelei” Wellness Center i le ASCC Land Grant. Ua fa’apea fo’i ona o’o mai Ammon Johnson mai Niu Sila, ae augatasia i latou i le manatu autu e tasi, ia tausia loa ma aoa’o lelei alo o Samoa i le “Tino Lelei” ma tauva ai fa’avaomalo..

O le to’atolu lea ua avea nei ma faia’oga i le tino lelei, ua atoa i ai vaega eseese e ao ina tausia lelei ai tino o talavou o le a tauva. E lalamua i le tauvaga, ia iloa ona tausia lelei le tino, ma ia tausia i mea’ai paleni, ia le motusia lau fa’amalositino e mautinoa ai lou soifua laulelei.

“Lea ua iloga nei, ua amatalia se mea lelei, ua maua mai ni alo talavou, e fia fa’ao’o lea fa’agatama i le tulaga o tauvaga fa’avaomalo, o se mea sili ia to’atele fo’i fanau e taumafai mai e fa’apaleni o latou tino, tausia lelei lou tino i me’aai paleni, fa’amomosi foliga ia lalelei, aotelega ole tagata soifua maloloina tino lelei,” se tala a le tama’ita’i faia’oga o le Wellness ia Ursula Te’o-Martin.

“O le avanoa fo’i ua maua e fa’ao’o atu ai nisi o tatou talavou e tauva i le tino lelei i ta’aloga o le pasefika, o se taimi muamua lea ua tatou o atu ai, peita’i, o se taunu’uga lelei lea e ao ina fa’aosofia ai alo o le atunu’u ia tausia lelei o latou tino mo nei fa’aaliga fa’atauva,” o se tala faifia lea a Te’o-Martin.

“O le taumafaiga fo’i lenei, ua liliu ai le taimi ma le tulaga ua masani ona fa’ailo ai lo tatou atunu’u, o tagata tausia lelei, ma e tino ese tagata, peita’i, o le a fa’apea, o tagata tino lelei tele i tatou, ma e soifua paleni i le tausiga o le tino ma le soifua maloloina lelei,” o sana toe fa’aopoopo mai lea!

E tusa ai o le autova’a atu, ua faia latou sailiga tupe, ma ua fa’atutu mai i luma le vaega o latou sui tauva i le tino lelei, ma fa’aalia fo’i o latou tino i le mamalu femalaga’i, a’o tausaili e ala i sau fesoasoani tupe, so latou sao i lo latou pasese ma le tausiga o le ‘au tino lelei i Papua Niu Kini ia Iulai 2015.

“E ui ina e foliga mai o le matou tauvaga e fa’aalia ai tino lelei, tino paleni, ma foliga matagofie o tatou tagata Amerika Samoa, ae matou te ta’i le i’a a Sa Sa’umani ma le agaga maulalo, ae maualuga le fa’amoemoe, e fo’i mai ma se ‘ai o galuega sa fitaituga ai,” o se latou lea mau ua fiafia e tauva ai i ta’aloga a le Pasefika.