Ads by Google Ads by Google

Ta’utino Pule Vaega Pasi Aoga e mafai ona latou faia galuega

Ua fa’aalia e le Pule o le Vaega o Pasi Aoga a le Ofisa o Aog a le malo ia Epati Lang, le gafatia lea e Inisinia o lo o galulue i le vaega o pasi aoga ona fa’atino le galuega mo le tausia ma le va’ava’aia o pasi aoga ina ia mautinoa e lelei pea mo le tautuaina o fanau aoga i le atunu’u.

 

“O lea lava e mafai e matou o lo o i ai ona fa’atino le galuega, siaki pasi ma vaai tulaga e moomia ona fa’aleleia, o lo o matou feso’ota’i lava fo’i ma sui o le kamupani na oka mai ai pasi aoga mai Amerika i le tele o aso i luga o le initaneti, mo le fa’ailoaina mai o vaega e tatau ona matou faia ina ia mautinoa ai le fa’aauau pea lea o le tulaga lelei o pasi mo le tautuaina o fanau aoga”, o se saunoaga lea a Lang i se fa’atalatalanoaga ma le Samoa News i le aso Faraile na te’a nei.

 

O le vaiaso na te’a nei na fa’alauiloa ai se fuafuaga a le Ofisa o Aoga, i le tau sailia lea o se inisinia ua i ai lona tomai i le tausiaina o le fausaga fou lea ua i ai pasi aoga i le taimi nei, ina ua mautinoa o lo o lelei ma saogalemu pasi aoga sa tu’uina atu i fale inisinia tua i le atunu’u.

 

Ae ina ua fesiligia Lang i le fausaga fou o pasi aoga ua i ai, pe gafatia i le tomai o inisinia o lo o i ai a le Ofisa o Aoga, na tali o ia, “matou te manaomia fo’i se fesoasoani a se isi tagata mai tua ua i ai lona tomai i ituaiga fausaga fou lea ua i ai pasi aoga i le taimi nei, atonu fo’i e fesoasoani i le matou galuega fa’atino”.

 

Na ta’utino Lang, o fausaga o pasi aoga fou lea ua i ai pasi aoga i le atunu’u, e tatau ona i ai se tagata e lava lona tomai i le fausaga fou lea ua i ai e tausia ma vaaia lelei pasi aoga.

 

Ina ua fesiligia e le komiti o Aoga a le maota o sui ia Lang i le masina o Aperila na te’a nei, pe gafatia e ana inisinia o lo o i ai ona fa’atino le galuega, na tali Lang e le gafatia e inisinia o lo o i ai ona fa’atino le galuega, e leai fo’i ni a latou mea faigaluega e siaki ai afi o pasi, ona o le fausaga fou lea ua i ai, e mana’omia ai mea faigaluega fou fa’aonaponei.

 

E to’atolu ali’i inisinia o lo o fesoasoani i le susuga a Lang i le tausia ma le vaaia lelei o pasi aoga.

 

Ina ua fesiligia e le Samoa News i lana molimau i luma o le maota o sui i le masina na te’a nei, e fa’atatau i ni isi o ali’i inisia e le o i ai ni pusa faigaluega e fa’atino ai le galuega, na tali le ali’i pule o pasi aoga, “o lo o matou galulue pea ma le ofisa mo sina fesoasoani e fa’atau mai ai ni pusa faigaluega mo isi ali’i inisinia e le o i ai ni mea faigaluega”.

 

Ui o lea, sa ia taua le galulue fa’atasi pea o i latou o inisinia e ala i le fa’asoa o mea faigaluega e fa’atino ai le tausiga o pasi aoga.

 

I le silia ai ma le 20 tausaga o galue Lang i le Kolisi Tu’ufa’atasi o se inisinia, sa ia taua ai e fa’apea, ua fai lava si televave o le tomai ua i ai le lalolagi i le taimi nei, e mana’omia fo’i le toe fa’alautele o le malamalama e fa’atino ai le galuega.

 

Talu mai le aso Faraile na te’a nei, e 13 pasi aoga o lo o lelei ma mafai ai ona tautua fanau aoga, peita’i na saunoa le susuga Lang, e mafai ona suia le numera i soo se taimi, fuafua lava i le tulaga lelei pea o pasi o lo o tautuaina fanau aoga.