Ads by Google Ads by Google

Ta’utino Togiola e le faatau agavale malo Tausala a Amerika Samoa

O le le faaaogaina o le Lalelei o Amerika Samoa i nisi o polokalama o le fu’a na te’a atu nei, e pei o le paluina o le ‘ava i le aso na umusa ai le Fale Samoa a le malo i Utulei, na saunoa ai le alii kovana e faapea, e le’i faia lea tulaga ona o le faatauagavale o le malo, i le Lalelei o le atunuu, ae ona o tofiga lava na tuuina mai e le Ofisa o Mataupu Tau Samoa.

O lea mataupu na tomua i ai mataupu i luga o le polokalama a le afioga ia Togiola Tulafono, i le faaiuga o le vaiaso na te’a nei.

Na taua e se tina na muamua valaau atu i le polokalama e faapea, sa tulaga lelei mea uma o le fu’a i lana vaavaai, sei vagana ai lava lana faasea e tasi e faatatau i le le faaaogaina e le malo o le Tausala a Amerika Samoa, na te paluina le ‘ava i le taimi na faaulufale ai le Fale Samoa.

Na taua e le tootoo e faapea, ua ia maitauina i le tele o mea fai a le malo, e faaaoga ai lava  le alo tamaitai o le tofa ia Nanai Afuola, ae o lea o lo o i ai le Tausala o Amerika Samoa, o lona tiute tonu lea e tatau ona fai.

Na taua foi e le tootoo e faapea, e i ai lona talitonuga e toatele isi tagata o le atunuu e le o fiafia i le mea sa tupu, ma ua maitau mea foi le atunuu i le taimi o soo se mea  fai a le malo.

Na taua e le molimau e faapea, e oo lava foi i taimi na ta’i ai sua mo malo, sa faaaoga ai foi le alo tamaitai o le Sui Failautusi o le Ofisa o Mataupu Tau Samoa.

Na faamalulu le alii kovana i le tootoo pe  afai ua avea lea tulaga ma itu ua oo ai se tulaga le fiafia ia te ia, peitai sa ia faamanino e faapea, i lalo o le Faavae o loo lima taitaiina ai galuegaa le malo, soo se taimi lava e faia ai gaioiga tau i le aganuu a le malo, o le matafaioi lena a  le Ofisa o Mataupu Tau Samoa.

“O a mea uma a le malo ma le kovana e fia fai, ae a paia loa le tulaga o le aganuu, ona taoto atu loa lea o le tulaga lena i le Ofisa o Mataupu Tau Samoa, ona o le tulaga faaaloalogia o le Faavae ma  le Aganuu,” o le saunoaga lea a le alii kovana.

Saunoa Togiola Tulafono, e i ai lona talitonuga sa mama lava  le agaga na mafua ai ona filifilia le alo tamaitai o le tofa Nanai na te faatinoina tiute e pei ona faasea i ai le tootoo ma nisi o le atunuu, ae i ai foi lona talitonuga, o le faia o lea filifiliga e le faigofie, aemaise lava pe afai e lafo atu i se alo tamaitai o se isi tamalii o le atunuu, o lona uiga e faasea foi le isi tamalii ma faapea  mai, sa tatau ona filifilia lona afafine e faatinoina tiute ia.

“O le faaiuga sa faia e lei manatu e faailoa atu ai lea alo tamaitai e pei ona taua, ae o se  faaiuga poto sa faia ina ia taofia ai le tulai mai o nisi manatu aua o le tatou atunu, o se atunuu e finau tele i tulaga faapenei, aua e manao lava le e sili atu o ia nai lo le isi tagata,” o le saunoaga lea a le alii  kovana.

Mo se faataitaiga e pei ona taua e le alii kovana sa ia taua ai e faapea, afai o le malae i Lupelele sa fai ai le faamoemoe, atonu o le a faapea mai tamalii o le itumalo o Tualauta, e tofia se tasi o a latou alo tamaitai aua o loo faia lea faamoemoe i o latou eleele, e faapena foi i le malae o le Siugaula a le Atuvasa, o loo maimoa mai foi le afioga  i le Maoputasi, ma e ono mafai ona faapea ane sona taofi, e tatau ona tofia lona alo tamaitai e faatinoina tiute e pei ona taua.

O le pale lea ua tuuina atu i le Lalelei o Amerika Samoa, o se tofiga lava ua faaee atu i ai i tulaga faaonaponei, peitai o le matafaioi lava ia a le Ofisa Mataupu Tau Samoa, o le filifilia lea o i latou e gafa ma le faatinoina o tiute mo aso faapitoa a le malo.