E le o nofo lelei i finagalo o ni isi o tagata matutua o le atunu’u, aemaise lava i latou ua faamalolo mai galuega sa galulue ai i lalo o ni polokalame mai fafo, le fautuaga lea ua tu’uina atu i ai e le Ofisa o le TAOA, ina ia saili ni latou avanoa e galulue ai i ni isi o polokalame o lo o faatupe mai e le feterale mo tagata matutua i le atunuu.

Na taua e le to’atele o tagata matutua i le Samoa News e fa’apea, o le tele o polokalame nei e na o le galulue ai o tagata matutua e aunoa ma ni totogi.

Na fa’amatala e ni isi o tama ma tina matutua i le Samoa News e fa’apea, o le auala lea o lo o faia e le TAOA ia i latou, e na ona faamoe o i latou i faamatalaga e pei o le faatonu lea o latou e agai i polokalame eseese nei e saili ai ni a latou galuega, ae o le mea moni e le o i ai ni totogi o maua e nei tagata.

E tusa ai ma se ripoti sa tu’uina mai i le Samoa News i le masina o Me na te’a nei, e silia i le to’a 100 tama ma tina matutua o lo o galulue i lalo o le Fa’alapotopotoga e taua o le TAMM (Toe Afua mai Matua) e aunoa ma ni totogi, e pei ona fa’amaonia mai e le Peresetene o lea vaega, le susuga ia Petelo Mikaele i se talanoaga ma le Samoa News.

O le mafua’aga o le galulue fua o tama ma tina matutua nei e aunoa ma ni totogi, ona e le o i ai se vaega tupe a le Fa’alapotopotoga e totogi ai i latou, ma le isi tulaga, o le fatu ma le augu o le latou galuega, o le ofo fua atu lea o latou taimi e fesoasoani ai i fanau aoga e le o lava ni a latou mafutaga ma matua.

O le masina na te’a nei na tofu mai ai i le Samoa News le mataupu lenei, peita’i na toe faaalia e ni isi o tagata matutua i le vaiaso nei, ina ua pisapisa ni isi o i latou i le faamutaina lea o a latou avanoa o lo o galulue ai i le polokalame a le TAOA lea ua tele tausaga o latou galulue ai.

Na fa’ailoa e foi e ni isi o tama ma tina matutua o lo o galulue i le polokalame a le TAMM i Aoga Tulaga muamua, atoa ai ma Aoga Maualuluga i le atunuu, le silia i le ta’i 5 masina o galulue pea e aunoa ma ni o latou totogi, ma taumafai ai loa le Samoa News le vaega o lo o galulue ai tama ma tina matutua nei, mo le fa’amalamalamaina o le mataupu.

Saunoa Mikaele e fa’apea, e le o nofonofo le TAMM mai le fa’ailoaina i tama ma tina matutua nei o lo o galulue i Aoga Tulaga maumua, o le latou galuega o lo o ofo fua atu mo fanau aoga e aunoa ma se totogi.

“Ua uma ona fa’ailoa i tama ma tina matutua nei i le tele o a matou fonotaga, o le matou galuega o lo o fai fua mo le manuia o fanau aoga e aunoa ma se totogi, aua e leai se vaega tupe a le TAMM e fa’atupe ai le polokalame,” o le saunoaga lea a Mikaele.

O tama ma tina matutua o lo o galulue i aoga eseese i le atunuu, ua uma ona a’oa’oina i latou i lalo o ni polokalame fa’apitoa sa faia e avea ai i latou ma Faufautua mo fanau aoga, ma ua i ai le tomai fa’apitoa ia te i latou e mafai ai ona latou fautuaina fanau i auala e tatau ona ola pulea ai i totonu o aoga ma nofoaga faitele, aemaise ai fo’i totonu o aiga.

“Ina ua mae’a aoaoga na fa’au’u mai ai tama ma tina matutua nei ma ua sauni e aga’i atu i totonu o aoga e tautua ma galulue ai, sa matou fa’ailoa i ai tulaga uma e fa’atatau i le matou galuega, o i matou e galulue fua e aunoa ma se totogi, ou te le iloa la pe aisea ua toe fa’asea ai ma o atu i le nusipepa a o lea ua uma ona fa’ailoa i ai tulaga o le galuega,” o le saunoaga lea a Mikaele.

Na taua e ni isi o tama ma tina matutua o lo o galulue i le polokalame a le TAMM e le i finagalo e fa’ailoa o latou suafa e fa’apea, so o se tagata lava e galue i se galuega e tatau ona ia maua se totogi.

“O lenei ua silia i le ta’i 5 masina o fa’atalitali ni siaki a isi o i latou, ae o le tali lava lea e aumai, e onosa’i pea ma fa’atalitali atonu e maua mai se tupe mai le malo, ae ou te mautinoa lelei lava, e uma atu fo’i lenei tausaga e leai lava ma ni totogi e maua,” o le tomumu lea a le isi tina i le Samoa News.

E to’atasi le isi tina sa ia fa’ailoa i le Samoa News e fa’apea, ua uma ona fa’ailoa atu e le latou ta’ita’i ia te i latou, o le masina o Setema o le tausaga nei e maua ai a latou totogi.

“O a’u na amata galue mai ia Fepuari, e o o mai lava i le taimi nei e le i maua lava se totogi, ae o lo o alu tupe i aso uma e pasese mai ai atoa ai ma le tupe ou te ‘ai ai i le galuega, talosia ae mo ni nei fa’aupuga e o o atu ia Setema ua maua ni totogi,” o le saunoaga lea a le isi tina e le i finagalo fo’i e fa’ailoa lona suafa, ona o puipuiga lava i ono itagia atu ai o ia e le latou polokalame.

E ova i le to’a 100 tama ma tina matutua o lo o galulue i lalo o le polokalame lea a le TAMM, e pei ona fa’amaonia mai e le susuga a Mikaele i le Samoa News.

E silia laititi lava ma le to’a 40 o i latou nei o lo o galulue i Aoga Maualuluga, ae o le isi to’atele o lo o galulue i Aoga Tulaga Muamua.

E o o lava fo’i ia i latou o lo o galulue i Aoga Maualuluga e pei ona saunoa Mikaele e leai fo’i ni totogi sa maua, ae o se fesoasoani tupe sa mafai ona maua mai i le Matagaluega o Aoga a le malo, na mafai ai loa ona totogi tama ma tina e to’a 40 talu mai le tausaga na te’a nei seia oo mai i le amataga o le tausaga nei.

“E o o mai la i le taimi nei, ua silia i le 4 masina e le i toe maua ni totogi o nai tama ma tina matutua ia o lo o galulue i Aoga Maualuluga, e ui sa maua a latou totogi talu mai le tausaga na te’a nei, ina ua mana’omia e le Fa’atonusili o Aoga a le malo ia Vaitinasa Dr. Salu Hunkin Finau le fesoasoani a le TAMM e fesoasoani ai i fanau aoga, ina ua tula’i mai le misa i le va o Aoga Maualuluga i le tausaga na te’a nei ma manunu’a ai ni isi o fanau aoga, ma ofo mai ai loa e Vaitinasa avanoa e totogi ai tama ma tina matutua nei ina ia fesoasoani e fai ma faufautua mo fanau aoga,” o le saunoaga lea a Mikaele.

O le taimi nei e pei ona saunoa Mikaele, o lo o galulue pea le TAMM mo le sailia o ni auala e maua ai ni fesoasoani tupe mai le malo, tauala mai i ni isi o Matagaluega a le malo, ina ia maua ai se fesoasoani mo nai tama ma tina matutua o lo o galulue i lalo o le polokalame e aunoa ma ni totogi.

Na taua e le ali’i peresetene lona lagonaina o lagona mafatia ma le fa’asea o lo o fa’aalia e tama ma tina o le polokalame, peita’i sa ia taua e fa’apea, ua uma ona fautuaina i latou i so o se taimi e faia ai a latou fonotaga, afai ua i ai le tagata ua fia malolo mai le galuega ona e le o i ai ni totogi, e mafai lava ona malolo le tagata, po o le alu fo’i i le Ofisa o Tagata Matutua (TAOA) e saili ai sona avanoa, e lelei le TAOA o lo o maua tupe e totogi ai tagata faigaluega.

Talu ona galulue tama ma tina matutua i totonu o aoga eseese i le atunuu, ua maitauina le tele o le latou fesoasoani ao se sao fo’i i olaga o ni isi o fanau aoga, e ala i le ofo atu i ai o fautuaga lelei mo le manuia o latou olaga.

Saunoa Mikaele, e ui e le o i ai ni totogi o lo o maua e le silia i le to’a 100 tagata matutua, ae vaaia pea lo latou galulue fiafia i le galuega.