Na fa’ailoa e le Fa’atonusili o le Matagaluega o Uafu ma Malae Vaalele, le afioga a Taimalelagi Dr. Claire Tuia Poumele e fa’apea, ua matua manaomia lava e Amerika Samoa i le taimi nei ni isi e i ai ni tusi pasi ma ni tusi kapeteni mo le fa’afoeina o va’a i luga o ogasami a le atunu’u, ina ia avea ma auala e mautinoa ai le saogalemu o femalagaaiga i le va o motu o le teritori i aso ta’itasi.

O lea saunoaga na tu’uina atu e Taimalelagi i le taeao ananafi, i se fa’atasiga ma i latou na lolofi atu e fia maua ni a latou tusi laisene ma tusi fa’amaonia latou te fa’afoeina ai va’a i luga o le sami, e pei ona mana’omia mai i lalo o le tulafono a le vaega a le US Coast Guard.

Mai le silia i le to’a 50 o i latou sa auai i le aso ananafi, o le silia i le to’a sefulu o i latou nei o tagata faigaluega a le Matagaluega o Uafu ma Malae Vaalele, o i latou fo’i ia e ave muamua i ai le avanoa mo le ulua’i vasega e to’a 20 le aofa’i, e amata aoaoina ai i auala eseese e saili ai tusi pasi ma tusi kapeteni mo luga o le sami.

O ni isi o tagata faigaluega a le Matagaluega sa auai e aofia ai le susuga a Silila Patane, le Harbour Master, atoa ai ma i latou o lo o galulue i le va’a o le MV Sili.

Saunoa Taimalelagi e fa’apea, e na o le to’afa lava Kapeteni o lo o i ai i le taimi nei mo le fa’atautaia o le MV Sili, ae a o o loa i le taimi e pisi ai Kapeteni nei e to’afa mo le fa’afoeina o isi va’a e pei o va’a toso va’a, ona mana’omia loa lea o le tautua a le ali’i kapeteni ia Wally Thompson mo le fa’afoeina o le MV Sili mo Manu’a i ni isi o taimi.

“Ua matua mana’omia lava ni isi e i ai tusi pasi kapeteni mai Amerika Samoa nei latou te fa’atinoina le galuega, o le tele o va’a o lo o aga’i mai i le atunu’u e leai ma se kapeteni mai Amerila Samoa nei o lo o galue ai, ae o se avanoa lelei la lenei ua mafai ona faia e le malo e saili ai loa ni kapeteni mo le atunu’u”, o se saunoaga lea a Taimalelagi.

Sa ia taua foi, o lo o i ai le fuafuaga a le malo e fa’atau se isi va’a fou mo Manu’a, ma o lo o i ai le fa’anaunauga e tatau ona taunu’u mai le va’a fou lea mo Manu’a ae ua maua ni kapeteni latou te fa’afoeina lea va’a.

O se tasi la o fuafuaga fa’ataoto mamao a le matagaluega mo le aoga lenei, ua mafai ai ona aofia ni isi o a latou tagata faigaluega mai Manu’a i le aoaoga lenei, o ali’i talavou ua i ai le tomai i auala e fa’atautaia ai galuega i luga o le sami, pau le tulaga o lo o manaomia o le sailia o a latou tusi fa’amaonia e agava’a ai ona latou fa’atinoina lea galuega.

O le polokalame lenei e pei ona taua e le tama’ita’i fa’atonusili, ua tele tausaga o taumafai le malo e fa’atulaga mai, peita’i o le fa’afitauli na mafua ai ona tuai, o le leai lea o se tupe e fa’atino ai le polokalame, toe faigata fo’i le tau sailiina o se tasi na te fa’atautaia le aoga.

O le aoga la lenei e pei ona saunoa Taimalelagi, ua fa’atupe e le malo mo le atunu’u, e ui e i ai ni nai vaega tupe laiti lava e moomia ona totogi e i latou o le a auai mo le fa’aleleia o isi vaega o le aoga.

O le polokalame lenei o lo o fa’atupeina e le malo, o tagata faigaluega uma fo’i a le matagaluega o Uafu ma Taulaga o le a auai i le ulua’i vaega o le aoaoga e 2 vaiaso, o le a maua pea a latou totogi masani, ma ua fautuaina fo’i tagata lautele ina ia fa’aaoga tatau le avanoa pe a tuuina atu e auai ai i lenei aoga.