Tala ‘oto’oto mai Samoa
Na fa’aalia sui pule sinia a le Ofisa o Femalagaaiga a Samoa, o Aualiitia Fa’afouina Milford, le toe tipoti ese atu o ni tagata Bangladesh, sa i totonu o Samoa, i le fa’ai’uga o le tausaga ua mavae, ina ua masalomia i le auai i ni taumafaiga e feavea’i fa’amalosi i ni auala tau fa’anana, ni tagata.
Na saunoa Aualiitia e tusa ai ma se ripoti mai i Ausetalia, na lapata’ia mai ai le si’itia o le fuainumera o fa’alavelave fa’apenei i totonu o le Pasefika.
O lo o ta’ua i lea ripoti e fa’apea, i le ono tausaga ua tuana’i, na ripotia ai e Samoa fa’apea ma ni isi motu e iva, ia le masalomia o le aveina atu i se auala fa’amalosi ma tau fa’anana ia ni tagata i totonu o latou atunu’u.
Na fa’aalia e Auali’itia e fa’apea, o tagata ia mai i Bangladesh, sa fa’amaonia lo latou ulufale fa’asolitulafono i totonu o Samoa. Ma o le mae’a o se su’esu’ega na tipoti ai loa lea vaega.
Na ta’ua e Aualiitia le mafai ona fa’amaonia o le tupu o lenei ituaiga fa’afitauli i totonu o Samoa ma ua avea ma se atugaluga i le ofisa o femalagaaiga a Samoa.
FAAMALOLO PATELE KATOLIKO SE TO’ALUA
E to’alua ni patele Katoliko ua fa’apea ona fa’amalolo mai i o la tofiga, ina ua molia i le faia o ni amioga ua le talafeagai ai ma o la tofiga fa’alelotu.
O lo o molia se tasi o nei patele i le a’afia i se tulaga fa’aleulugali’i ma se tama’ita’i o le aulotu, ae o lo o te’ena malosi e le patele ia tu’ua’iga.
Ae o leisi patele ua ta’ua le fa’amalolo ona o le le usita’ia o se fa’atonuga a le ekalesia ina ia fa’amuta se la pisinisi ma se tama’ita’i o le aulotu.
(Source: Samoa Observer)
TAUNU’U I DUBAI IA MANU SAMOA
Ua ta’unu’u nei i Dubai ia le ‘au lakapi Ta’ito’a Fitu a le Manu Samoa ma se fa’amoemoega o le a sili atu le latou ta’aloga o le a alo atu i ai, nai lo le latou taumafaiga i Ausetalia i le vaiaso ua mavae.
O lo o fa’agasolo nei le Ta’amilosaga o le Lalolagi mo le Fitu.
I se ripoti pu’upu’u mai i le ta’ita’i o le ‘au, le susuga Tausa Fa’amaoni Lalomilo, sa ia ta’ua ai le tele o a latou sasi i le vaiaso ua mavae, ma o le a galulue malosi e toe fa’asa’o ia sasi.
O le vaiaso nei ua fa’amoemoe e fa’atasi mai ai ma le kapeteni o le ‘au, le ali’i o Uale Mai lea na malolo talu ai se fa’afitauli i lona a’ao.
O le Aso Tofi o le a fetaui ai Samoa ma Emirates, ae o le Aso Faraile o le a ta’a’alo ma Argentina fa’apea ma Fiti.
(Source: Samoa Rugby Union)