TUTUSA MANU SAMOA MA TONGA TA'I 18

Na tutusa e ta'i 18 'ai o le ulua'i ta'aloga o le Ta'amilosaga a le Pasefika lea ua fa'agasolo i le taimi nei, i le va o le Manu Samoa ma le au malosi o le Ikaletahi mai Tonga, i 'ai e ta'i 18-18.

Na matua faatumulia le malae taalo i le Apia Park i le mamalu o le atunuu na lolofi atu e tapua’i ma maimoa i lana au, lea ua lua tausaga faatoa toe taaalo lea i lona malae.

Na tau fai misi kiki i le pou mo sala a au uma e lua, ae fa’ateia loa le Manu Samoa i se osofaiga mataina a Tonga ma latou laasia ai le laina sikoa, ma tula’i mai ai ‘ia Tonga e 7 ao Samoa e 0.

E ui i le laasia muamua e Tonga o le laina sikoa a tama o le lanu moana, peita’i e le i fa’avaivai ai, ae sa finau malosi pea ma i’u ina la’asia ai e le uigi saoasaoa i le numera 14 ia Fautua Otto le laina sikoa a Tonga, ma tula’i mai ai ‘ai Tonga 7 - Samoa 5.

Na toe fa’apili e Tonga le Manu Samoa i le isi ana osofaiga malosi ma latou toe laasia ai le laina sikoa, ma tula’i mai ai loa ‘ai Tonga 12 - Samoa 5 ae ta loa fo’i ma le malologa.

Na fesoasoani le vae o le ali’i o Pisi i ‘ai a le Manu Samoa, e ala i le lelei o lana kiki i le pou, e pei ona ova ai le isi sala ina ua amata le afa lona lua o le ta’aloga, fa’atasi ai ma le sikoa lona lua a le Manu Samoa mai le ali’i kapeteni o David Lemi sa taalo i le uigi 11, ma tula’i mai ai ‘ai o le ta’aloga, Tonga 12 - Samoa 15.

Na toe finau mai fo’i Tonga mo se isi a latou ‘ai fa’aopoopo, ma ova ai le latou a’a i le pou mo le sala a le Manu Samoa, ma tutusa ai ‘ai o le ta’aloga i le ta’i 15 - 15, peita’i na toe suia ina ua ova le isi sala a le Manu Samoa mai le ali’i o Pisi, ma tula’i mai ai ‘ai o le ta’aloga Tonga 15 - Samoa 18.

Ae o nai minute fa'ai'u o le ta'aloga na toe ova ai le sala a Tonga i le pou, ma tutusa ai loa 'ai o le ta'aloga i le ta'i 18 - 18, ma mae'a ai loa le ta'aloga.

O le isi taaloga a le Manu Samoa o le aso 21 Iuni i le malae o le ANZ Stadium i Fiti, lea o le a feiloa'i ai ma le au malosi a Fiti.

Lisi o le au: 1 Sakaria Taulafo; 2 Wayne Ole Avei; 3 Logovii Mulipola; 4 Kane Thompson; 5 Teofilo Paulo; 6 Faifili Levave; 7 Jack Lam; 8 Tuiasina Tuifua; 9 Jeremy Su’a; 10 Tusi Pisi; 11 David Lemi (C); 12 Johnny Leota; 13 Alapati Leiua; 14 Fautua Otto; 15 Faatoina Autagavaia. Fa’aleoleo; Tii Paulo; Anthony Perenise; Cencus Johnston; Daniel Leo; Ofisa Treviranus; Kahn Fotuali’i; George Pisi ma Anitele’a Tuilagi.

TOE FO'I ALEX LEAPAI E FA'AFETAI IA SAMOA

E ui e lei manuia taumafaiga a le alii fusu mai Lauli'i i Samoa ma Ausetalia i le fusi o le lalolagi i le paga mamafa, peita'i  e lei avea lea ma itu na taofia ai le toe fo'i atu o le susuga a Alex Leapai e momoli faapitoa le fa'afetai i le tapuaiga a lona aiga aemaise ai le atunu'u i Samoa, e tusa ai o lona fa'amoemoe.

Na faiaina Leapai i le ta'amilosaga 5 i le tu'i oti i le siamupini o le lalolagi i le paga mamafa, i le ali'i o Vladimir Klitschko i le la fusuaga sa faia i Siamani i le masina na te'a nei.

A o lumana'i ai le fusuaga a Leapai i le fusi o le lalolagi, sa ia asia lona aiga i Samoa e tapa sa latou faamanuiaga, lea fo'i na to'atele le mamalu o le atunu'u na lagolagoina lona fa'amoemoe.

FA'ASI'USI'U MATA MAA NONU IA MANU TUILAGI

Ua faalauiloa e le center a le All Blacks ia Maa Nonu lona le tuu mamaina o le center a le au malosi a Enelagi, le ali'i Samoa o Manu Tuilagi, i le ta'aloga faitaulia muamua a le All Blacks ma Enelagi i le fa'aiuga o le vaiaso nei i le malae o le Eden Park i Aukilani.

Na taua e le ali'i o Nonu e fa'apea, na te le toe fa'atagaina le mea lea sa faia e Manu Tuilagi ma lana au ina ua latou fa'ato'ilalo le All Blacks i le tausaga na te'a nei i se ta'aloga finau.

VAAIA LE LELEI O AU O LE SUPER 15

O se tasi o vaaiga mataina ua maitauina i au o lo o tausinio i le ta’amilosaga o le Super 15 i le va o Niu Sila, Aferika i Saute ma Ausetalia, ua amata ona toe lelei mai le tele o au ae ua latalata ina mae’a le ta’amilosaga.

O le tulaga lea ua i ai le Crusaders ma le Waratahs ua matua ese le sau lea ua sau ai, ae le o tuu mamaina fo’i e le Sharks lea o loo tumau i le tulaga muamua o le taamilosaga i le taimi nei.

E 15 au o lo o tausinio i le taamilosaga lenei, ma ua maitauina le tau fai malolosi uma o au nei i le latalata ai i le faaiuga o le taamilosaga.

TAMA FUSU E MANANA'O UMA I AI TAGATA

O le fusuaga e sau lava le tagata ia ma lana faiga, o le tagata e pei e maua uma mea la e lelei ai Floyd Mayweather Jr, o MikeTyson, Sugar Ray Leonard, o Muhammad Ali ia ma isi lava tama fusu e lelei tele a latou fusu.

I le tele o tausaga ua tauau ina uma atu le tele o nai tama fusu ia, aua ua matutua foi i le taimi nei, e le toe mamao foi ni tausaga o totoe ona malolo lea, i ai le tama o Ali lea na fusu mai i le 60s e oo i le 70, ae te'i ane ua oo lelei lava i le 80s o fusu lava.

Lea na ritaea i le 198, ua nofo ma le maualuga o le tilotilo ai o tagata matamata i le fusu foi o lena tagata ia, ia na matuai matamata uma tagata i le 'welterweight' pei a o se paga pito e tele tama fusu e fetaui ai, e i ai Sugar Ray Leonard, Thomas Hearns, Roberto Duran ia Marvelous Marvin Hagler.

Ia uma atu le na vaega ae tula'i mai ia Mayweather Jr ia ua 37 nei ona tausaga, Manny Pacquiao ua 35, Wladimir Klitschko ua 38, Juan Manuel Marquez ua 41, Sergio Martinez ua 39, ia ma le tama o le 'au fusu o Bernard Hopkins ua 50 ia ma isi tama fusu.

Ae o le tama lea o Felix Vardejo, faatoa 21 ona tausaga, ua vaai ai tagata i le vave tele o lima a le tama o le Felix Verdejo, toe laititi, ua talitonu foi le tele o tagata faia fusuaga, e le toe mamao ae siamupini foi i le latou 'au paga, 'lightweight'.

Fai mai le alii lea o Felix Trinidad, "E pei lava o vaitaimi ia na fusu mai ai, le malolosi o ona lima, vave o le vaai, toe vave lana sola ae 'osofai mai lava i le uma o lona paga. E tele le lumanai lea ua ou vaai atu ai ia Felix, pe a alualu ai lava pea."

O Felix Verdejo ua (12-0, 9KOs) o le fetaui nei ma Engelberto Valenzuela i le aso Toanai nei e tatala ai le fetauiga a Cotto ma Martinez. O Felix Verdejo o se tagata ua leva foi ona fusu mai i fusuaga foi ia e le'i polofesa, na vaai lava i le 'ae'ae mai e faatusa uma e tagata Puerto Rico ia Felix Trinidad,  le umi o lona tino, o le vave toe malosi uma ana lima.

faaliliu: Toleafoa H. Auva'a