SILI I LE 100 AUTAALOA TERITORI I TAALOGA A LE PASEFIKA

E tusa ai ma le fa’asalalauga fa’alaua’itele mai le ASNOC e to’a 100 sui ta’a’alo i mai le Amerika Samoa mo taaloga o le Pasefika e faia i Papua Niu Kini ia Iulai.

O ta’aloga e tauva ai Amerika Samoa: Body Building, Basketball tama ma teine, Volleyball Tama ma teine, Boxing, Golf, Rugby, Softball tama ma teine, Tu’uga A’au, Table Tennis, Tennis, Weightlifting ma le Beach Volleyball.

Ua amatalia nei ona siakia sui ua mae’a filifili mai mo nei ‘au ta’a’alo ina ia mautinoa o lo’o tulaga lelei uma pepa malaga, ma le agava’a. O le a toe fa’alauiloa atu i latou ua mautu e malaga e tauva mo Amerika Samoa.

O le tau mo le tagata e to’atasi e malaga ma tausia mo nei ta’aloga e $2,000 e aofia ai fo’i ma latou toniga mo’omia mo ta’aloga. Ma o le a faia sailiga tupe mo lea faamoemoe e aofia ai Uokafoni, fufuluga ta’avale, ma ‘aiga fa’atau atu i le mamalu lautele.

E ese mai lea ua fa’atulaga e le ASNOC le latou ‘aiga fa’apitoa e faia ia Aperila 11, 2015 ma e faia tusi vala’aulia fa’apitoa mo i latou e auai, o le Ta’amilosaga Tapolo ia Me 16, 2015 mo le fa’amoemoe lava e tasi.

O le sui ua tapena ele ASNOC e avea ma Fa’atonu o le Aumalaga o Manu’a Chen, lea e malaga ma le ‘au ta’a’alo, e nonofo fa’atasi ma le ‘au ta’a’alo i le latou nofoaga i Papua, ma o ia fo’i na te va’aia fa’apitoa le ‘au ta’a’alo atoa o le a masi’i atu.

Ua talosaga mai fo’i le ASNOC, ia alofagia e le atunu’u ma aiga, ia sapaia fa’afatueleele nai a tatou fanau ma latou taumafaiga, ina ia a’e manuia o latou faiva.

7 ALO AMERIKA SAMOA SAINIA FEAGAIGA

E to’afitu alo o le atunu’u ua mae’a sainia latou feagaiga i le aso Lulu i le Ofisa o le Fa’atonu o A’oga a le malo, ina ia amata ta’a’alo ai i latou i a’oga ua latou pikia mo le tausaga a’oga fou. O ia feagaiga mo taaloga o le lakapi i kolisi ma iunivesite i Amerika.

O i latou nei ua sainia feagaiga: Logan Tago -  Washington State University; Eperone Moananu - University of Hawai’i Manoa; Amosa Sakaria - Washington State University; Aukuso Tua - New Mexico Military Institute; Lyle Siu - New Mexico Military Institute; Eldon Aydon - Oregon State University; Navy Mulipola - New Mexico Military Institute.

saunia: Leua Aiono Frost