ITULA TATALA AI TAUTUA FALEMELI

Talu mai le aso Gafua e oo ma i le aso, e amata tatalaina ai le falemeli i le 7:30 i le taeao ae fa’ato’a tapunia lava i le 4:00 i le afiafi ina ia mafai ona taua’aoina uma meli ma afifi a le mamalu o le atunu’u e fia fa’amomoli i aiga i fafo mo le vaitau o le Kerisimasi ma le Tausaga fou, ae maise meli taunu’u mai aiga i fafo.

Ua fa’ailoa mai fo’i, ua mae’a fa’atulaga  e tapunia le falemeli i le aso Tofi, o le Kerisimasi fa’apea ma le aso Tofi o le Tausaga fou, Ianuari 1, 2015. Peita’i, e tatala i ona itula masani i le aso Faraile, 26 Tesema, 2014, fa’apea fo’i i le aso Faraile, 2 Ianuari 2015. E tatala fo’i i aso To’ona’i e pei lava ona masani ai i le tausaga atoa.

Ona o le agaga ia fesoasoani i aiga o lo’o fia fa’ao’o fa’amomoli a’o le’i o’o mai nei aso fiafia, o lea ua toe fa’ailoa atu ai nei suiga, ia utagia e i latou e mo’omia lea tautua.

TOE TASI MALAGA LADY NAOMI O LE 2014

Toe tasi le malaga a le Lady Naomi mo lenei tausaga 2014 o totoe, o lana malaga lea i le aso Gafua a sau, Tesema 29, 2014. Ua mae’a malaga a’o loma le Kerisimasi, o lea malaga sa o ese atu ai se va’a tumu na’ua, e fai o pasese i tagata malaga, ae o uta fo’i o fa’amomoli mo aiga i Samoa ma uta lava i latou na malaga.

E tusa ai ma se fa’aaliga mai a le Polynesian Shipping lea e fa’atautaia malaga uma a le “MV Lady Naomi,” sa fa’ailoa mai, “O lenei tausaga ua suia, e tele lava ina tu’ufa’atasia malaga a va’a nei afai e va’aia le to’atele o tagata e le o maua se avanoa e malaga ai, fa’atasi ai ma uta ma fa’amomoli, e toe fa’aopoopo se malaga a le va’a, peita’i, o lenei tausaga, ua va’aia e le mo’omia, ona o i latou na tu’uese mai ua le maua se avanoa e to’aititi pe tusa ma le 20 o i latou, e le gafatia ona totogia ai le ulufale mai o le va’a ma toe tu’uva’a ese atu.”

O le kamupani va’alele a le Polenisia, o lo’o latou tautuaina le va lea i Faleolo ma Fagali’i, ua va’aia le pisi tele, i le tusa i le 15 malaga i le aso i le va o Amerika Smaoa ma Samoa, talu mai le aso 15 o Tesema e oo mai i le aso lenei.

O lo’o tautuaina foi e le Polenisia malaga i Manu’a ma ua toe talosaga fo’i e le Polenisia e ala i a latou loia i Amerika, se isi soso’oga o le latou pemita mo le 30 aso e tautuaina ai pea le Manu’atele, ona e le o maua lava se kamupani va’alele e femalaga’i i lea va.

Mo malaga i le va o Honolulu ma Pago Pago, e lua malaga faaopoopo a le Hawaiian Airlines lea sa taunu’u i le po anapo ma le isi malaga i le aso Lua o le vaiaso fou.

 O lona uiga e le o fa’aitiitia lava le to’atele o i latou e malaga mai, ona o lo’o tatou talimalo fo’i i ta’aloga a le fanau talavou i le va o Hawaii, Kalefonia ma Utah, o lea e le fa’avaivai ai le to’atele o i latou e fia o mai ile tatou malo nei mo lea fa’amoemoe. O le ulua’i tausaga lenei ua fa’ailoa mai o le a i ai ma le ‘au mai Samoa o le ‘au volipolo, o se isi lea mea lelei tele, ona o lo’o, fa’aigoa lenei ta’amilosaga football ma le Volipolo o le “Samoa Bowl.”

FILIFILIA ROBINSON TAITAI FA’ALAPOTOPOTOGA A LE AU FAI PISINISI

I le fonotaga e sailia ai se tasi e avea ma Taitaifono o le fa’alapotopotoga a le au fai pisinisi i le teritori, ua tula’i mai ai le ali’i o Dave Robinson. Sa ia nofoia muamua fo’i lea nofoa taua i tausaga ua fano.

Saunoa Robinson e faapea,  ua i ai poloketi lelei ua una’ia malosi e lenei faigamalo, e aofia ai le Kamupani I’a ua toe fa’atula’ia nei i le nofoaga o le Samoa Packing, TRI Marine, ina ia fa’ateleina avanoa faigaluega mo le mamalu lautele o le atunu’u, o lea ua va’aia ai se ata matagofie o le tamaoaiga maua o le atunu’u i le 2015.

Ua fa’atulaga e tatalaina faitoto’a o le Tri Marine International o le “Samoa Tuna Processors Inc.” i le masina fou, ma o se kamupani e tusa ma le $70 miliona ua inivesi i ai le Tri Marine.

O le Samoa Tuna e tusa ma le 1,500 ona tagata faigaluega pe a o’o ina atoatoa lelei ona fa’atautaia le kamupani i’a.

O Dave Robinson o lo’o avea fo’i ma Taitaifono o le Shipyard Services Authority, o lona sui ta’ita’ifono ua tula’i mai ai Taotasi Archie Solia’i ma Charles Warren o le failautusi ae teutupe ai Tom Drabble.

saunia: Leua Aiono Frost