TAUVAGA SIPELA O UPU PERETANIA - A’OGA TULAGA LUA

O lo’o fa’asalalauina atu fa’alaua’itele ata o i latou ua manumalo mai a’oga tulaga lua taitasi, ae ua fa’aulu atu nei o latou suafa i le tauvaga Sipela e faia ia Fepuari  18, 2015. O le kamupani a le McDonald’s o lo’o avea ma “major sponsor” o lenei faamoemoe.

Ua ala fa’ailo atu lenei tauvaga, ona ua i ai ni tauvaga laiti fa’ata’ita’i e mafai ona fa’amasani atu ai fo’i le ‘au manumalo mai latou a’oga, ina ia tapena ai lou ola tauva pe a o’o atu ina lutaluta le tai o faiva i le sailiga o le sui e manumalo mai le teritori ma autova’a atu e tauva i le tauvaga sipela a le Iunaite Setete o Amerika atoa.

Ua fa’ailoa mai o nei fa’ata’ita’iga fa’amasani a le fanau e faia ia Fepuari 12, ma Fepuari 17 i le 3:00i le afiafi seia o’o i i le itula e 4:00 i le afiafi i le Ofisa o DOE - Teacher Quality Office, Tasi Street i le Paka Liona.

 TOE FAALELEIA AUAUNAGA A LE KVZK TV

O lo ua tatau ona toe fa’aleleia le so’otaga o le auaunaga a le KVZK TV ma tatou motu i le Manu’atele ona ua mae’a tapena e ;le faletelevise i Utulei le fa’aleleiga o lana auaunaga  sa motusia mo sina vaitaimi.

“Pe afai e atoatoa uma le fuafuaga ua mae’a galuea’ina nei, ua tatau ona toe maimoa le atunu’u i a tatou polokalama o le Alaata PBS i le fa’aiuga o le vaiaso na te’a nei, se tala lea mai le fa’atonu Fagafaga Daniel Langkilde.

E tusa ai ma se tala na mua’i lomia i le Samoa News, sa fa’ailoa atu ai, o se motusia o le eletise ia Ianuari 5, 2015 na fa’aletonu uma ai alaata o le faletelevise, peita’i, ina ua toe ola mai le eletise i lea lava po, sa mu ai nisi o so’otaga o le satelite e pu’e ai ata o le PBS.

Ua mae’a feso’ota’i le KVZK TV ma le PBS, aua o i latou na o lo’o sapalaia mai masini fa’asatelite ma ua fa’ailoa mai, o lo’o ua mae’a meli mai masini mo’omia e le malaga a le va’alele i le fa’ai’uga o le vaiaso na tuanai nei.

 Ua ma’ea o’o atu le vasega o inisinia a le KVZK e sailia le mafuaga tonu ua motusia ai fo’i ma alaata i Manu’a. Ua faailoa mai, o le motusia fo’i o le ea malulu i le potu o lo’o tu’u ai le masini so’otaga fa’apitoa mo fa’asalalauga sa afaina ai le masini ma ua le toe ola ai.

Ua mae’a toe fa’aola lelei lea ‘ea malulu, ma ua toe fa’aola fo’i le masini, o lo’o lelei lava. Peita’i o aiga fo’i sa fa’asea mai ona e le o au atu fa’asalalauga i lo latou fale, ua sailia ma iloa patino ai, e ao ina faia se latou enetena i fafo o le fale.

TALOSAGA POLENISIA SE ISI PEMITA MO MALAGA I MANU’A

Ona e le o toe mautu mai lava se isi kamupani va’alele Amerika e mafai ona tautuaina le va o Tutuila ma le Manu’atele, o lea ua toe fa’aulu ai fo’i le talosaga a le kamupani va’alele a le Polenisia, latou te fa’atinoa lea auaunaga.

O le pemita o lo’o galue ai nei le Polenisia mo Manu’a e mae’a ia Ianuari 30, peita’i, ma o le aso 16 Ianuari i le tausaga nei, ua toe fa’aulu ai fo’i e le Polenisia le talosaga i le fetarale mo le isi 30 aso.

Ua matauina le mana’omia tele o lea tautua, ua iloga e i ai ni malaga fa’afuase’i mo le aumaia o gasegase i Manu’a e va’aia le falema’i i Tutuila ma e siliga ma le selau malaga na fa’atautaia e le Polenisia ia Novema ma Tesema mo Manu’a.