Ads by Google Ads by Google

Tala i Vaifanua

ASO TIMA’I MO GALUEGA - FA’ASAO/MALISI

 

O le taeao ananafi sa fa’atasi atu ai nisi o sui iloga o matagaluega ma kamupani eseese i le teritori e tali i o latou vala’aulia, ina ia latou tima’ia le fanau a’oga i le A’oga Maualuga a Fa’asao Malisi i Leone, i so’o se ituaiga galuega ua latou galulue punoua’i ai, ma e ao ina agava’a ai fo’i nisi o i latou, “Ina ia le motusia le auaunaga i o outou fo’i taimi!”

 

“O i matou, ua tutula’i ma faia tiute nei i le taimi nei, o outou o taeao, le taimi ua outou matutua ai, ma ua fa’alagolago ia te outou nei galuega ia fa’ataunu’uina mo le aluga lelei o le fa’agasologa o le olaga o tagata lautele o le tatou atunu’u!” O se toe tima’i mulimuli lava lea a le ali’i inisinia sinia a le ASPA Mr. J. Fong.

 

O le vasega o galuega e mafai ona ofoina i le fanau, sa lelei fo’i ona fili i latou e tofu sao i le aso ananafi e fa’asoa ia i latou i lea a’oga, “ina ia mautu le fa’amoemoe, to’aga i le a’oga, fai meaaoga ma le usita’i ma fa’alogo i faia’oga, e le vale sou taui lelei, e maua le galuega o e fia tautua ai!”

 

O le vasega o le Ami Fa’aleoleo  sa o’o ane ai le susuga J. Uiagalelei mo i latou ma fa’ailoa le tele o avanoa lelei, e matua fesoasoani fo’i le US Army i ou pili o a’oga, “pe ete avea fo’i ma fitafita e mitamita ai lou atunu’u i lau tautua, o mea uma na e fa’amoemoe i lou mana’o po’o fea o aga i ai!”

 

O le vaega o inisinia a le ASPA sa latou fa’ailoa, le tama’ita’i inisinia fa’ato’a mae’a mai a’oa’oga, ae ua ulufale nei i le aufaigaluega a le ASPA, Ms. T. Vaouli, o ia o lo’o umia le fa’ailoga  maualuga i le Electrical Engineering.

 

Sa auai foi sui o le Faletupe o Atina’e o Amerika Samoa ma tima’ia le fanau i lea fo’i ituaiga tautua, e ala lea i le “fesoasoani i le mamalu o le atunu’u o lo’o gasolo atu ina ia talosagaina ni nogatupe mo latou falenofo. O le taimi nei o lo’o i ai fo’i le avanoa ua fa’agasolo ai nisi nogatupe. O lenei ituaiga o galuega, e mo’omia le lelei o lau a’oga i mataupu o le Igilisi, ma ia maua fo’i sou fa’ailoga mai Kolisi e te agava’a ai.”

 

O se isi polokalame fa’atautaia e le Faletupe o Atina’e, o le Section 1602 - o se polokalame a le fetarale.

 

I le vasega a le Ofisa o Fa’ato’aga i le vaega o lafu manu, sa o’o atu ai fo’i le latou sui ma tima’ia le fanau, “Ia muamua lava lelei a outou a’oga, ina ia outou avea le kosi o Fa’ato’aga, ae ia le palapala o outou lima e toto fa’ato’aga, ae sau oe nofo i le Ofisa, ma fa’ailoa i faifa’ato’aga ala e toto ma fua lelei ai latou fa’ato’aga.”

 

Mai le kamupani va’alele a le Hawaiian Airlines sa o’o atu ai nisi o sui iloga, ma latou fa’ailoa le tele o ituaiga galuega e amata atu lava i le pailate, galuega i luga o le va’alele (flight attendant), tagata la’u uta ma isi galuega.“E tatau ona outou avea le Physics ma le Numera ia lelei, ona fa’ato’a maua lea o se tatou pailate,” fautuaga ia a sui o le Hawaiian Air.

 

FA’AILOGA FA’APITOA MO LEALAIFUANEVA FOUNDATION

 

Ona o le tele o meaalofa tupe e fesoasoani mai ai le “Lealaifuaneva Reid Foundation” i le a’oga a St. Theresa i lenei tausaga a’oga, ua latou saunia ai le Fa’ailoga Fa’apitoa “Plaque” mo lea tama - Lealaifuaneva Peter Reid ma le fanau atoa ma pisinisi o lo’o latou fa’atautaia, ona o le agalelei e ala i le tinoitupe ua taua’aoina $26,000 e fa’atau ai nofoa ma kesi fou mo le a’oga i Malaeloa.

 

“O lenei meaalofa, e ala ona faia, ona ua iloa o lo’o i ai le mana’omia i le tatou a’oga, ma o le agaga o le matou tama, ua atoa nei le 81 ona tausaga, ia tofusia outou uma le fanau a’oga, ma avanoa lelei e saili ai le atamai, ia mautu ni ta’ita’i i le lumana’i mo le tatou Malo ma le Ekalesia.” O se fa’amatalaga lea a le tama’ita’i o Olivia Reid-Gillet - le afafine o Lealaifuaneva sa o’o atu e talia lenei fa’aaloalo taua.

 

Na patipatia e le fanau le avanoa ua latou maua e fa’afetaia ai Reid-Gillet ma lona aiga ma latou pisinisi uma, ona o le agalelei. “Ua le gata ai i le tatou a’oga, ae ua faia fo’i foa’i i le Fa’asao Malisi High ma isi a’oga, ae maise o Ekalesia eseese e fa’atutuina a le Pule’aga.” O se saunoaga lea Patele Kolio Etuale.

 

Na tima’i Reid-Gillet i le fanau a’oga, “Ia outou to’aga i le a’oga, fa’alogo ma usita’i i faia’oga, mata’u i le Atua - ona outou maua lea o le poto, ma atili fa’amautu ai se aoga o lenei meaalofa na saunia mo outou ma la tatou a’oga!”

 

Na fa’afetaia e ia le meaalofa, ae sili ai ona taua ia te’i ia, “Ia outou tinou i a’oga i aso ta’itasi, ma ia tausaili le atamai, e maua ai e outou galuega lelei i le lumana’i.”

 

AVANOA I LE VAEGA O LE F.A.A.

 

Ua fa’alauaiteleina mai e le vaega a FAA, le ofisa o le malo tele e gafa ma feoaiga i le ea, sa latou tautua fou, e faailoa ai fuafuaga mo le sailia lea o ni tagata faigaluega i latou “Olo fa’atonu Va’alele” (Air Traffic Control). O nei avanoa faigaluega o le a mafai ona faalauteleina i le aso 10 o Fepuari i le upega tafailagi, USAJOBS.GOV.

 

E ui la ona e le o i ai se Olo fa’atonu va’alele i le malae va’alele i Tafuna, ae o le isi lea avanoa matagofie e mafai ona faigaluega ai se alo o le atunu’u i nisi malae va’alele i Amerika.

 

Ua fuafua nei e le FAA e faia se latou fa’aaliga o Galuega e mafai ona e talosaga mai ai mo le lua aso, ma e mafai ona feso’ota’i uma atu i ai i latou e maua le so’otaga tau tafa’ilagi po’o le initeneti. O le ulua’i fa’aaliga na faia ananafi, ae o le isi e faia i le 12 o Fepuari mo isi e le’i maua lea avanoa. O isi fa’amatalaga uma e mo’omia e mafai ona e maua i le uepesite: www.faa.gov/jobs.