Ads by Google Ads by Google

Tala mai Hawaii

Tina mai Hawai Fasia Teine Va’alele Anchorage

Mai ANCHORAGE, Alaska ua fa’ailoa mai e le Associated Press ua tu’ua nei le fa’amasinoga o le tama’ita’i mai Hawaii sa molia ona ua ia fasia se tama’ita’i tautu i luga o va’alele a lea setete.

O le tina Hawaii lea e 56 tausaga o lona soifua, ma ua fa’ailoa mai e faia le fa’amasinoga lea e le vaega o Siuri i le setete o Alaska ma e tauau e na’o se fa’asalaga mama e fa’ae’e ia te ia.

O le tama’ita’i loia mai U.S. Karen Loeffler sa ia fa’ailoa mai o Kyong Cha lee o Aieana ia poina le tama’ita’i o le va’alele a’o malaga atu mai Hawaii mo Anchorage Alaska, ma sa fa’alua na ia poina le tama’ita’i lea i ona luma fo’i e lua i le aso 19 Aokuso, 2012.

E le gata ina tapo le gutu o si teine tautu i luga o le va’alele, ae toe fetogi i ai ma upusa, ma ua alagatatau ai ona fa’asala i lea tina mai le setete o Hawaii. O le fa’asalaga ua va’ai atu i ai mo lea tina Hawaii emafai ona o’o i le ono masina i le to’ese, pe o le totogi o le sala tupe e $5,000. po’o na fo’i mea e lua.

O le vaega a le FBI i Alaska o lo’o latou faia su’esu’ega o lea mea na tupu i luga o le va’alele i le va o nei tama’ita’i.

“Tagata Muamua i le Masina” Fa’avaeloto ai Fu’a Amerika

Mai Honolulu ua fa’ailoa mai fo’i e le Associated Press ua fa’atonu uma setete o le Malo tele ina ia mautinoa e fa’avaeloto fu’a a le Malo e fa’ailo ai le tautua matavela a le Ulua’i Tagata ua tulau’ele’ele i le Masina” Neil Armstrong.

O lenei fa’atonuga sa mafai ona maua mai le ali’i Kovana o le Malo o Hawaii, Neil Abercrombie.

O le susuga le ali’i Saeanisi lauiloa a Amerika, Neil Armstrong na maliu o ia i le aso To’ona’i na te’a nei, Aukuso 25, 2012, ae na tulau’ele’ele o ia i le masina i le aso Iulai 20, 1969.

O le fesili ua tu’u mai i tagata uma o le lalolagi ae maise o le malo o le Iunaite Setete o Amerika ma ona teritori, “O fea sa e i ai i le taimi tonu na tulau’ele’ele ai Neil Armstrong i le masina, ma fa’atu ai ma le agiagia a le Malo o Amerika i le Masina?”

I lo’u sui, o le taimi lea o la’u vasega mulimuli i le A’oga fa’atulagalua a le Malo i Aleisa, ma sa matua tutu le fanau a’oga uma i lea afi’oaga la’ititi, i fafo i le malae ma o latou faia’oga uma, ma tepa taula’i i le lagi, pe mata e va’aia se suiga i le kelope, a’o sina fa’ailo fo’i o le mea o lo’o tupu, ae o lo’o fa’amatala mai luga o le leitio, le tulau eleele o Neil Armstrong i le masina.”

O se aso ese i le mafaufau o le fanau a’oga, ia te a’u fo’i ia, sa ou mana’o ai ou te sili i so’o se mataupu fa’asaeanisi e a’oa’oina ai mai lea tausaga se’ia o’o mai i le Kolisi o Samoa ma fa’asolo atu ai i Iunivesite.

Fa’afetai fo’i ia Amerika ma ana saeanisi, o i’ina na fa’amau fa’ailoga ai le lagona, e mafaia e le tagata ma lona atamai, “ona fa’asavali o ia i le masina!”

O pine fa’amau o lea aso, toetoe lava o pepe uma na soifua i lea aso i le vasa pasefika, ma le Iunaite Setete o Amerika, po’o lea lava fo’i tausaga, na fa’asuafaina ia Neil, o Armstrong po’o Neil Armstrong fo’i isi, e avea ma fa’amanatu, i tagata soifua uma, sa latou tapua’ia ma sapaia faiva o le “Ulua’i Tagata i le Masina.”

E ese mai lea, sa fa’aigoaina se tasi o falepia e fiafia i ai tua’a ua faiilagi le sofia ma le to’atele o tamaloloa e tafafao ma fetufa’i ai o latou lagona o le “Apollo 11” ma sa fa’afoea lea e le afioga Polataivao Fosi i Saleufi, Samoa, le nofoaga lea sa toe suia mai i le ‘Toys R Us.” Lea ua faiilagi le folauga a lea ali’i ta’uta’ua ae sili ona matamuli ona uiga, ae o se igoa e le o fa’agaloina e so’o se tamaititi a’oga i le lalolagi, aua o nei nafa na o le lalolagi i lana ulua’i tagata ua tulaueleele saogalemu i le masina.

I se saunoaga fa’apitoa a le ali’i Kovana o Hawaii sa ia fa’apea ai, “E le galo i le lalolagi ae maise le Malo o Amerika le tala’aga o le olaga o Neil Armstrong, o se fa’ailo maualuga lea o se fa’ata’ita’iga fo’i i tagata o le lalolagi, o galuega e mafai ona fa’ataunu’u e tagata soifua o so’o se malo, pe afai e maua le galulue fa’atasi, ma le loto e tasi.”

“O se fa’ataunu’uga lea o se galuega sili lava ua mafai ona fa’atino e se tagata ola ona ua galulue fa’atasi ia fa’atino o latou tuite ma le fa’amaoni peita’i, i le gaoioiga atoa, o lo’o tu’ufa’atasia uma i ai matata ititi e tele ua fa’atino i le taimi tonu e ao ina faia ai, ma ua loto tagata uma ia mafai ona fa’ataunu’u le taunu’uga!”

saunia: Leua Aiono Frost