FA’ATULAGA FA’AMASINOGA AUTU ALI’I TU’UAIA FA’AMALOSI LONA TO’ALUA

Ua talia e le Faamasinoga Maualuga se talosaga na faaulu e le loia o lo o fautuaina le alii lea o lo o tuuaia i lona faamalosia o lona toalua, ina ia toe faatulaga se isi aso e faataunuu ai le faamasinoga autu o lenei mataupu, ona o lo o mananao loia e toe soalaupule lenei mataupu.

E le o mafai ona faalauiloa e le Samoa News le igoa o le alii o loo tuuaia i lenei mataupu, ona o puipuiga i le to’alua o le ua molia.

O lo o tuuaia lenei alii i le moliaga mamafa o le faamalosi tamaitai, tagofia o itutinosa o se isi tagata, taumafai e ave faamalosi se tagata, faapea ma lona taofia faapagota faasolitulafono o se tagata.

O tuuaiga faasaga i lenei alii na afua mai ina ua masalosalo le ua molia o lo o fai se faanunumi a lona toalua ma se isi tamaloa, o lea na ia taumafai ai e saili se auala na te maua ai ni faamaoniga, peitai na avea ma itu na fefe ai le fafine ia te ia ma sola ese ai, e pei ona taua i faamaumauga a le faamasinoga.

Na ta’ua le toe mauaina e le ua molia, o le fafine ma ia taumafai loa e fa’amalosi le fafine la te faiaiga e ui e lei manao i ai le fafine.  Sa ia taumafai foi e ave faamalosi lona toalua i totonu o se taavale faapea ai ma lona taofiofia o ia, ae fetaui loa ma le taunuu ane o leoleo ma taofia ai loa le ua molia.

Sa i ai le ofa na tuu atu e le malo i le alii ua molia, peitai ina ua fesiligia e le alii faamasino sili lagolago ia Lyle L. Richmond le ua molia pe na te ioeina tuuaiga faasaga ia te ia, sa ia faailoa ai i le faamasinoga e faapea, o lo o ia taumafai e taofi gaioiga faa Sotoma ma Komoro o loo faia e lona toalua, peitai e faigata ona o loo taofia o ia i le toese.

O lo o taofia pea le ua molia i le toese ina ua le mafai ona ia totogiina le $35,000 na faatulaga e tatala ai o ia i tua.

FAASA ONA TOE FESOOTAI I LONA TOALUA

O le tama talavou lea o lo o tuuaia e le malo i lona titinaina o si ona toalua, ina ua fesiligia e le fafine le la ata ma le isi fafine sa pu’e i se aso, ua fa’asa e le ali’i fa’amasino ia John Ward II, ona ia toe taumafai e faafesootai le fafine, sei vagana ua tuu atu e le faamasinoga se isi faatanaga.

O le vaiaso nei na faila ai e le malo moliaga faaopoopo faasaga i le ula lea, ma ua tuuaia nei o ia i le moliaga o le faaoolima i le tulaga tolu, faatasi ai ma le moliaga o le faatupu vevesi i totonu o lona aiga e pei ona uluai molia ai o ia e le malo.

Na avea le fesili o si fafine i le ula lea e uiga i le la ata ma le isi tamaitai ma itu na po ai e le ua molia lona toalua, peitai sa fai i ai le fafine, e toe pa’i atu loa ia te ia ona ia vili loa lea o leoleo, peitai na avea ma itu na ita ai le ua molia ma ia titina ai le ua o le fafine e pei ona tuuaia e le malo.

SITAU OFOIA JR

O le aso 26 o Setema lea ua toe tolopo i ai le ulua’i iloiloga a le alii o Sitau Ofoia Jr, ina ua talia e le Faamasinoga Maualuga talosaga a loia, ina ia toe tuu atu se isi taimi e faaauau ai talanoaga o lo o faia mo se maliliega aufaatasi e faamuta ai lenei mataupu.

O Ofoia Jr o lo o tuuaia i moliaga o le taumafai e fasioti se tagata, lua moliaga o le faaoolima i le tulaga muamua, faatupu vevesi i nofoaga faitele, atoa ai ma pepa sala mo solitulafono i luga o le alatele.

O nei moliaga na afua mai i se faalavelave na tulai mai i le aso 8 o Setema 2011 i Tafuna, lea na manu’a tigaina ai se alii na so’a e Ofoia i lana taavale.

I faamaumauga a le faamasinoga o lo o taua ai e faapea, ina ua uma ona soa e Ofoia le alii na lavea i lana taavale, na oso i fafo ma ia faaaogaina ai se pate kirikiti e sasa ai lona ulu.