PILI E AVEESE AI LE LAFOGA O TOTOGI 2%

Ua i luma nei o le Fono Faitulafono i le maota o sui se pili mo se tulafono, e fa’amalolo ai le lafoga o totogi e 2% o lo o totogi e tagata faigaluega, ma ia faamutaina ai lea vaega o le tulafono i le aso 30 Setema 2014.

O lea tulafono sa faaulufaleina e afioga i ali’i faipule ia Larry Sanitoa; Taotasi Archie Soliai ma Vailoata E. Amituana’i.

O le tausaga e 2012 na pasia ai e le Fono Faitulafono se tulafono ma sainia e le kovana, e totogi ai e tagata faigaluega uma i le atunuu le lafoga e 2%.

O le tupe sa maua mai i lea lafoga, sa totogi ai le nonogatupe e $3 miliona na aumai i le Teugatupe o Taui o Tagata Faigaluega ma tuuina atu i le falema’i o le LBJ ma le tuutuuga, o le tupe e totoe pe a mae’a ona totogi le nonogatupe, e tuuina atu le 50% i le faatautaiga a le LBJ, ae o le isi 50% e faatupe ai le polokalame lea e auina atu ai gasegase i fafo mo togafitiga.

Ua taoto atu nei le pili i le komiti o le paketi a le maota o sui, mo le faatulagaina o se aso e faia ai se iloiloga i lenei mataupu.

Na taua e le Teutupe a le malo ia Dr. Falama’o Phil Pili i luma o le komiti o le Paketi a le Senate i le vaiaso nei e fa’apea, o le tulafono lenei e le talafeagai mo tagata faigaluega uma i le teritori, ona e le o tagata faigaluega uma o lo o latou totogiina lea lafoga.

Mo se faataitaiga e pei ona saunoa Pili e i ai tagata o lo o galulue konekarate i ni totogi tetele latou te le o totogiina lea lafoga, ae o lo o aafia ai tagata faigaluega e maualalo le tamaoaiga, aemaise lava pe afai o se aiga e toatasi le tagata faigaluega ae to’alima sui o le aiga.

Na taua e le teutupe e faapea, ua maea ona ia fautuaina le alii kovana ina ia taofi lenei tulafono, ae saili se isi auala e mafai ai ona maua e le falema’i o le LBJ se fesoasoani tau tupe.

FA’AFETAI MAUGAOALI’I I LE KOVANA

Na faafetaia e le afioga i le alii faipule ia Maugaoali’i Leapai Tusipa Anoa’i le ali’i kovana ma lana faigamalo, ina ua talia aloaia se talosaga a le afioaga o Fagaotogo, mo se malae taalo e tua i ai tupulaga talavou.

Na taua e Maugaoalii i sana tusi i le alii kovana e faapea, o lenei faamoemoe sa talosagaina i nofoaiga ua mavae atu i le silia ma le 20 tausaga talu ai, peitai o se tala fiafia ina ua talia e Lolo ma Lemanu ma le la nofoaiga le talosaga.

O le vaiaso na te’a nei na amata galulue ai le kamupani fau auala a le Paramount Builders mo le fausiaina o le malae taalo i Fagatogo, i le va o le faleva’a a le Iseula ma le Fagatogo Square Building.

“E ui o lenei faamoemoe sa talosagaina i le silia i le 20 tausaga talu ai, peitai e le i atoa se tausaga talu ona faataoto atu se talosaga a’o lea ua lua tali mai, o le mafuaaga lena e avatu ai le faafetai ia te oulua ma le faigamalo,” o se vaega lea o le tusi a Maugaoalii ia Lolo.

O le malae taalo lenei e pei ona saunoa Maugaoalii, e le faapitoa mo tupulaga a Fagatogo, ae o tupulaga uma o Amerika Samoa, ma ua tuli mata’i fo’i le silasila a le afioaga i le aso e tatala aloaia ai lenei galuega tele.

LE FIAFIA FAIMEALELEI I FA’ATONUSILI

Na fa’aalia e le alii faipule ia Faimealelei Anthony Fu’e Allen i luma o le maota o sui i le vaiaso ua te’a, lona le fiafia i le le tali atu o Faatonusili a le malo i le taimi e poloaina ai i latou e le Fono e tatau ona oo atu ai mo taimi o iloiloga.

Saunoa Faimealelei e faapea, o uiga le mafaufau o ni isi o faatonu ua atagia mai ai lo latou le aloaiaina o taimi o iloiloga i le 8:30, ae oo atu i le maota ua ta le 8:45.

O se tasi fo’i o itu na faasea ai Faimealelei, o le faatonusili sa poloaina e tatau ona oo atu i le iloiloga, ae emo ane le ata ua malaga atu le sui faatonusili, ae toe tuai atu fo’i.

Saunoa le alii faipule mai Aua e faapea, e le o se taimi muamua lenei ua tula’i mai ai uiga le talafeagai nei i le silasila a le maota, ma ua tatau fo’i ona fai i ai se fuafuaga a le fofoga fetalai ma le mamalu o le maota.

Saunoa Savali Talavou Ale e faapea, o le faanaunauga lava o le alii kovana, soo se taimi e poloaina ai faatonusili e oo mai i luma o le Fono e molimau ai, e tatau ona oo mai le faatonusili, aua pau lea o le tagata o lo o naunau le fono e maua mai ai tali i mataupu o lo o fia malamalama ai.

Saunoa Savali e faapea, afai e faaauau pea ona tula’i mai lea faaletonu i afioga i faatonusili, ua tatau loa ona fai i ai se fuafuaga a le maota.