O FEA LE KAPETENI O LE MANU SAMOA?

O le le auai o le kapeteni o le Manu Samoa Taitoafitu, le susuga Fautua Otto, i le ata aloaia o kapeteni o au sa tausinio i le taamilosaga taitoafitu sa faia i Glasgow, Sikotilani i le lua vaiaso talu ai, ua fesiligia ai le pulega o le Iuni Lakapi a Samoa e le au tusitala i totonu o le atunuu. Na o le kapeteni lava o le Manu Samoa e lei auai i lea puega ata aloaia ae lei amatalia le taamilosaga i Glasgow.

I se feiloaiga ma le au tusitala i le amataga o le vaiaso nei, na faaalia ai e le ofisa sili o pulega o le Iuni Lakapi a Samoa, le susuga Fred Amoa e faapea, na mafua lea faaletonu ona sa tuai ona taunuu uma mai le oka o toniga a le au mo lea taamilosaga. Na saunoa Amoa, e taunuu mai le oka o toniga mai le kamupani sa saunia, e lei atoa mai toniga a le au. O lea sa malaga faapitoa ai se tasi o sui sinia o le iuni, le susuga Tuala Matthew Vaea, i Sikotilani e momoli le toniga. Peitai, e taunuu atu Tuala ua uma ona faia le puega ata aloaia o lea taamilosaga i Sikotilani, ma e lei mafai ona auai le kapeteni o le Manu Samoa ona e lei taunuu atu le toniga.

Na fesiligia Amoa pe le o aitalafu a le iuni lea ua lipotia mai le lata i le miliona tala na mafua ai ona tuai taunuu mai le toniga. Na tali Amoa, e moni o lo o i ai aitalafu a le iuni e lei totogia, ae le o le mafuaaga lea na tuai ai le taunuu mai o le toniga. E lei faailoaina mai e le iuni le aofaiga o le tupe na alu i le totogiina o le pasese o Tuala e malaga ma toe foi mai ai e momoli le toniga a le au, ae na faaalia i suesuega a le au tusitala, e lata I le $30,000 tala le totogi o le malaga alu ma le toe foi mai i Sikotilani.

LAGOLAGO E TUILAEPA SE ALII UA MOLIA

O lo o tetee malosi le alii palemia, le susuga Tuilaepa Lupesoliai Sailele Malielegaoi, i faitioga faasaga ia te ia, ona o lona tusia o se tusi e lagolago ai se alii ua faamaonia lona moliaga o le faiaiga faamalosi i se tamaitai i Niu Sila. Ua fesiligia foi e le alii palemia le sa’o o moliaga faasaga ia Fatu Seti, ona e le lelei se tautala faaperetania a lea alii.

Na saunoa Tuilaepa, e tele lava le avanoa e sese ai le faiga o se faaiuga a le Faamasinoga i Niu Sila, ma o le mafuaaga lea sa ia tusi ai ma ia faatuina le tipoti mai i Samoa o lea alii pe afai e faamaonia ona moliaga. Fai mai a ia, o ituaiga mataupu faapea, e le manumalo i taimi uma le mea moni. “A lelei lava lau pepelo, e te manumalo lava,” o a Tuilaepa lea.

O le alii o Fatu Seti na sola ese mai Niu Sila i le valu tausaga talu ai ina ua tuuaia o ia i lona faiaiga faamalosi i se tamaitai e 19 tausaga mai le motu o Waiheke Island. Peitai, sa toe auina faamalosi atu o ia i Niu Sila e tulai i le Faamasinoga Faaitumalo i Aukilani i le amataga o le masina nei, lea sa faasalaina ai o ia i le fa tausaga ma masina e fitu, ae sa toe faaopopo lea faasalaga i le pe a ma le ono tausaga i le falepuipui.

LE TU LE TAAVALE

E 32 tausaga o se alii mai Alamagoto na maliu i le aso Toonai na tea nei ina ua alu ai luga se taavale. E lei tu lea taavale ina ua tupu le faalavelave. Na faaalia e le komesina le tumau o leoleo, le afioga Fauono Talalelei Tapu e faapea, sa foi atu le tafaoga a lea alii mai se falekalapu, ma o le faasua’ava tele o lea alii na iu ai ina pa’u i luga o le auala ma moe ai lava. Na faaalia, sa tau atu i ai se tagata sa uliina atu se taavale o le ituaiga o le minivan.

O lea taavale sa malaga atu mai Apia agai atu u Sinamoga, ma sa tu lea taavale ma faa’e’e le pu ina ia ala ai lea alii. Peitai sa masau mai se isi taavale mai uta e agai i Apia, ma alu ai i luga o lea alii ma toso atu ai lona tino mo se vaega o le auala. Sa auina atu lea alii i le potu mo gasegase tigaina i le falemai i Motootua i lena lava po, ae o le vaveao o le aso Gafua na maliu ai o ia. O lo o tau sailia pea e leoleo lea taavale.

SOLITULAFONO E FAAAOGA AI UPEGA TAFAILAGI

O le vaiaso atoa lenei ua faatauaina ai le tetee atu i soligatulafono e faaaoga ai upega tafa’ilagi ma o lo o galulue soosootauau ai le Matagaluega o Leoleo ma Falepuipui ma kamupani telefoni feaveai e lua i totonu o le atunuu, le Blue Sky ma le Digicel.

Na tatalaina lea faamoemoe i se sauniga faapitoa sa faataunuuina i le lotoa a le Matagaluega o Leoleo i Apia. Na saunoa le susuga i le faafeagaiga o le Ekalesia Metotisi, le susuga Lone Urima, lea sa taitaia le sauniga lotu puupuu e tatala aloaia ai lea faamoemoe, ma ia faamamafa le tele o soligatulafono ua tulai mai i nei onapo ona o le televave o le tekonolosi ua maua e le tupulaga talavou.

Sa saunoa foi le komesina le tumau o leoleo, le afioga Fauono Talalelei Tapu ma ia faaalia le toatele o i latou ua taofia nei i le toese I Tafaigata ona ia ituaiga solitulafono. Fai mai a ia, e matuia solitulafono ua faia e nisi e faaaoga ai telefoni feaveai ma ua le iloa ai le va tapuia i le va o matua ma fanau faapea tuagane ma tuafafine.

Saunia: Lilomaiava Andrew Fa’asau, Naenae Productions