UMUSA MALUMALU KATOLIKO I APIA

O le aso Toonai nei o lo o faamoemoe e umusa ai le malumalu a le Ekalesia Katoliko i Mulivai i Apia lea ua pe a ma le tolu tausaga o faagasolo lona fausiaina e le agaiotupu, le afioga Patele Ricky Bernard ma lana au tufuga. E pei ona silafia, o lea malumalu ua suia le malumalu tuai sa i ai ua atoa le 130 tausaga. E lei faailoaina mai e le sui sooupu o le ekalesia, le afioga Patele Ioane Ono, le tau atoa o lenei galuega tele. Peitai na ia faaalia, ua leva ona sauniuni sui o le ekalesia mo lenei faamoemoe ma e toatele sui mai atunuu i fafo o le a auai. 

Na saunoa Patele Ono, o le sui aloaia o Pope Penitito XVI o le a auai o le afioga o Akiepikopo Charles D. Balvo. O le a auai foi isi Akiepikopo e to’afa mai Amerika Samoa, Niu Sila ma Toga. O le aso Faraile o le a faagasolo ai taalolo ma isi faaaloaloga masani i le maota o le Tofamamao, ao le sauniga o le faaulufalega o le malumalu o le a faataunuuina lea i le itula e 10 I le taeao o le aso Toonai. O le malumalu sa i ai muamua sa fausia i le 1884 ma na o le to’a 400 i le 500 tagata sa ofi ai. Peitai o le malumalu fou ua fausia nei e ofi ai le pe a ma le to’a 2,000 tagata.

FO’I MAI ALEX LEAPAI E FAAFETAI

Ua toe fo’i mai le alii fusu o Alex Leapai e momoli aloaia lana faafetai i le tapuaiga a lona aiga, nuu ma le atunuu aoao i lana taumafaiga sa ia l’uiina ai le fusi o le paga mamafa o le lalolagi i Siamani i le masina na te’a nei. Na faaalia e se sui o le aiga, Leapai Pasika, na taunuu mai Alex i le aso Sa na te’a nei ma e le o mautinoa po o le a le umi o lana asiasiga. Fai mai a ia, e ui ina malolo Alex i lana fusuaga ma le siamupini o le paga mamafa o le lalolagi, o Vladimir Klitscho, ae o ia lava o le siamupini i o latou loto ma agaga. Na ia taua foi e faapea, o lo o fuafua le latou aiga e faasuafa Alex i se tasi o suafa o le latou aiga potopoto.

E ui ina malolo le alii o Alex Leapai i lana taumafaiga mo le fusi o le paga mamafa o le lalolagi, ae na ia faaalia i le au tusitala faavaomalo i le masina nei lana fuafuaga e toe fia ulufale i le maea e iloilo ma le alii fusu Amerika o Shannon Briggs. E ui na malolo le alii o Alex Leapai i le la fusuaga ma Klitschko, ae e $1.3 miliona tala Amerika po o le silia i le $3 miliona tala Samoa na ia maua.

PATELE NA PEPELO IA SAMOA

Ua lipotia mai i Ausetalia le faasalaina i le falepuipui mo le tolu ma le afa tausaga, o le alii patele sa galue i Samoa seia oo ina toe tipoti i Ausetalia i le 2004. Na faaalia i lona faamasinoga e faapea, ua leva tele ona faia amioga mataga faafeusuaiga a lea alii o Patele Frank Klep. Na amata mai i le vaitausaga o le 1970 ma le 1980 na amata faia ai e ia amioga mataga i tamaiti aoga ao avea ma pule aoga i se tasi o aoga a le ituaiga Salesio a le Ekalesia Katoliko i Ausetalia.

O le 1994 ina ua faamaonia ona moliaga o le faia o uiga mataga i ni tamaiti aoga i le aoga sa pule aoga ai, sa faasola mai ai o ia e le pulega o le ituaiga Salesio i Samoa nei e galue faapatele ai. Na faaalia i suesuega e faapea, na pepelo Klep i ofisa a le malo Samoa sa faatagaina lona ulufale mai i le atunuu e galue ai, e uiga i ana soligatulafono i Ausetalia. O le 2004 na Malaga mai ai se alii tusitala mai Texas i Amerika sa ia tuufaatasia se polokalama faapitoa e faailoa ai patele Katoliko o lo o manaomia i ia ituaiga soligatulafono. Sa faapea ona Malaga faatasi lea alii tusitala ma se sui o le Samoa News i Samoa ma faatalanoa ai Patele Frank Klep lea sa galue i le nofoaga o le ekalesia i Moamoa. Sa faasalalau faalauaitele lea polokalama faapitoa i luga o upega tafailaga ma iloa ai loa ma Klep, ma sa faapea ona toe tipoti ai loa o ia e le malo Samoa i Ausetalia. O le 2006 na aveesea uma ai ona tofiga.

Saunia: Lilomaiava Andrew Fa’asau, Naenae Productions