SAINI LIMA LE MALO MA LE BUMBLE BEE

O le afiafi o le aso Tofi na sei mavae atu nei na feiloai ai le alii palemia ma le au tusitala ma sa ia faaalia ai e faapea,  o le aso 27 of Iuni e sainia ai le Feagaiga o le Malamalamaaga (Memorandum of Understanding) i le va o le malo Samoa ma sui o le kamupani gaosi apa i’a mai Amerika o le Bumble Bee Foods, mo le fausia o le latou fale faamama i’a i le uafu I Matautu-tai. Na saunoa Tuilaepa, o se taimi o le tausaga nei lava o lo o faamoemoe e faataunuu ai le sauniga mo le asuina o le palapala e faailoga aloaia ai le amataga o lea galuega, ona o le manao o le kamupani ina ia faavave le faagasologa o lea galuega tele.

Na faamanino foi e le alii palemia, o le kamupani o le Bumble Bee Foods o se kamupani mai Kalefonia i Amerika ae le o Amerika Samoa ma o le mafuaaga lena e le tau feutagai ai o ia ma taitai o le faigamalo a Amerika Samoa. Na saunoa Tuilaepa, o lo o lagolago malosi le malo Samoa i lea fuafuaga a le Bumble Bee ona ua tele tausaga o asiasi mai sui o i si kamupani gaosi apa i’a e pei o le StarKist ma faaalia lo latou manao ina ia faatuina sa latou fale faamama i’a i Samoa, “ae leai lava ma se mea na taunuu.” Na saunoa foi le alii palemia i le manao a nisi o faipule ina ia faatuina lea fale faamama i’a i Savaii.

Fai mai a ia, o le faalavelave o lea manatu, ona o le a tele le tupe alu a lea kamupani e alu i le tau la’uina o mea e faatino ai galuega mai Upolu i Savaii. “E le valea foi sui o le Bumble Bee,” o a Tuilaepa lea. “Ua latou iloa lelei lava e tele foi le latou tupe alu pe a ave i Savaii lea fale faamama i’a.”

MAFUAAGA UA TALIMALO AI SAMOA I LE FONO

Ua faamalamalama ma faailoa e le alii palemia, le susuga Tuilaepa Lupesoliai Sailele Malielegaoi, le mafuaaga na manumalo ai le finau a Samoa e talimalo i le fonotaga lona tolu a le Faalapotopotoga a Atumotu Laiti Tau Atia’e o le Lalolagi (Small Island Developing States), lea o le a usuia mai i Samoa i le faaiuga o le masina o Aukuso. Na saunoa Tuilaepa, sa latou talanoa ma taitai ma amepasa o i si atunuu o le Pasefika ae lei amatalia le fono a Malo Aufaatasi i Niu Ioka ina ia latou potopoto muamua e soalaupule ma su’e se tasi i le atunuu o le Pasefika e talimalo i lea fonotaga faavaomalo.

Peitai, ina ua oo i le taimi e saunoa ai le taitai o le malo Fiti, sa ia faailoaina i le saofaiga o taitai o atunuu o le lalolagi e faapea, ua sauni lona atunuu e talimalo i lea fonotaga. “Ina ua ou tulai, sa ou faailoa atu i le fono a Malo Aufaatasi, e i ai le mafuaaga taua e tatau ai ona usuia atu i Samoa lenei fonotaga, ona e i ai le tala lelei o lo o matou mananao e faatalalelei ai le lalolagi,” o a Tuilaepa lea. “Sa ou faamatala i ai le tulaga sa i ai muamua Samoa ma lona atinae ma ou fai i ai, ua suia nei le tulaga o Samoa i le faatulagaga o atunuu tau atia’e o le lalolagi, ona o le lelei ona faaaoga o fesoasoani mai ana paaga mai fafo.

O le mafuaaga lena e tatau ai ona fai atu i Samoa lea fonotaga, ina ia outou molimauina ai le tulaga e oo i ai se atunuu sa mativa, a ua laalaa i luma lona atinae ona o le faaaoga lelei o fesoasoani mai i si atunuu aemaise Malo Aufaatasi.” Na saunoa Tuilaepa, sa faia le palota mulimuli ane ma fulisia ai loa sui ina ia talimalo Samoa i lea fonotaga.

VEVESI TUPULAGA MOATA’A MA LAULII

O le amataga o le vaiaso nei na faataalise atu ai leoleo i le faasiusiuga o le afioaga o Moataa tuaoi ma Fagalii-tai, ina ua lipotia atu e se i si le masii mai o tagata mai le afioaga o Laulii e fai le taua ma tagata Moata’a sa tauaia le pasi a Laulii i le pitonuu o Moata’a lea e lalata i le Apia Park. Na taofia e leoleo ia tagata Laulii i le tuaoi o Moata’a ma Fagalii-tai ma sa faataga na o matai o le afioaga e o atu e talanoa ma matai o Moataa e tau sailia ai se fofo o lea faafitauli.

O lea feeseeseaiga na amata mai i le vaiaso talu ai ina ua fasi e ni tupulaga Moata’a ia tupulaga Laulii i le faleoloa o Fagu Schuster lea e faafesagai ma le Apia Park. Sa toe foi atu ia tupulaga Laulii i se pikiapu ua uma ona la’u i ai I luga maa, ma faapea ona latou tauaia ai le faleoloa ona fai mai i latou, o le alii e ona le faleoloa sa faaosoosoina tupulaga Moata’a e fasi i latou. Na matua faaleagaina le faleoloa ma sa fai ai ma tauaiga maa. Na lavea ai se alii Laulii i lea tauaiga maa ma faapea ona auina atu i le falemai.

O le taeao o le aso Gafua o le vaiaso nei, na tauai ai loa e tupulaga Moata’a i le pitonuu lea e lalata i le Apia Park ia pasi a Laulii. Sa tali mai Laulii i le masii mai o lana au tau i lena taeao e fai le taua. Peitai, sa taofia e leoleo ma sa fono faatopetope ai ma matai o afioaga e lua i lena taeao ma toe fofo ai le mataupu.

Saunia Lilomaiava Andrew Fa’asau, Naenae Productions