Ads by Google Ads by Google

TALA MAi SAMOA

MAEA TALANOAGA A SAMOA E LUA

 

O le aso Faraile na sei mavae atu nei na maea ai talanoaga faaletausaga i le va o faigamalo a Samoa ma Amerika Samoa lea sa talimalo ai Samoa i lenei tausaga. O lea fonotaga sa faataunuuina i le maota fono o le maota o Tui Atua Tupua Tamasese Efi i Sogi ma na o tusitala mai Amerika Samoa sa faatagaina i totonu o le fono.

 

 I le maea ai o le fono, sa saini aao le alii palemia o Samoa, le susuga Tuilaepa Lupesoliai Sailele Malielegaoi ma le Lutena Kovana o Amerika Samoa, le afioga Lemanu Peleti Mauga, i le lisi o fanua e faaaogaina e malo e lua i totonu o atunuu e lua. E tutusa le tetele o ia fanua ma o le fanua o le a lisiina e le malo Amerika Samoa I Samoa o lo o i Vailima, ae o le fanua o le a lisi e le malo Samoa i Amerika Samoa, o lo o i Petesa i le nofoaga sa i ai le fale o le Goodwill Store. O le umi o lisi o ia fanua e 9 tausaga, 11 masina ma le 29 aso.

 

LE TALIA E LEVAOPOLO LE FAATOESEGA A LE TV1

 

E le o taliaina e le alii faipule o le itumalo Gagaemauga Numera 2, le tofa Levaopolo Talatonu Vaai, le faatoesega aloaia a le TV1 sa faasalalauina i nai vaiaso ua tuanai atu. Na faaalia e Levaopolo i le au tusitala e faapea, ua ia teena lea faatoesega ona o nisi o tulaga faaletulafono. Fai mai a ia, ua maea aso e 24 na tuuina atu i le TV1 e pei ona ia logoina ai le kamupani i sana tusi, e totogiina atu ai le tinoitupe e oo atu I le $300,000 ae lei oo le mataupu i se tulaga faapea.

 

Na saunoa le alii faipule, na uma lelei lava aso e 24 e lei tali atu lava le pulega o le TV1 ma na ia faamautu mai ai e faapea, e lata I le tasi le miliona tala le aofai o lana tagi ua faaulu faasaga i le TV1. O le aso 6 o Iulai na ia faaalia, o le a valaauina ai lea mataupu i luma o le Faamasinoga. O lenei mataupu e mafua mai i le faamasinoga i le va o Levaopolo ma le Ofisa o le Tiute lea na tuuaia ai lana kamupani la’u faamomoli i lona faaulufaleina mai i le atunuu o se oka o fagu malosi i ni pepa tau faasese.

 

FAASA NISI PISINISI TAAVALE RENTAL

 

Ua autasi nei sui o le Faalapotopotoga o Taavale Totogi Aso (Rental Car Association) e le toe talia le faaulufaleina mai i totonu o le atunuu o se i si pisinisi taavale totogi aso. O le faaiuga lea na autasi i ai sui o le asosi i le latou fonotaga sa usuia i le vaiaso na te’a nei, e faatalatalanoaina ai se tusi na auina atu mai le Matagaluega o Fefaatauaiga, Alamanuia ma Leipa o lo o tapa ai so latou  finagalo i le mataupu pe tatau ona toe faauluina mai i le atunuu nisi pisinisi faapea mai fafo.

 

Na saunoa le peresetene o le asosi, le susuga Samoa Roy Lee, e tolu lava ni vala na tuuina atu latou te soalaupuleina e uiga i lenei mataupu. Peitai na autasi lava finagalo o sui ina ia faasa le toe faauluina mai o pisinisi taavale totogi aso mai fafo, ae ua lava pisinisi ua i ai nei. Na faaalia e Samoa, o le manatu laualuga, ina ia puipuia pisinisi laiti a tagata o le atunuu ua i ai nei ina nei ulufale mai kamupani tetele latou te faoa uma pisinisi i totonu o le atunuu.

 

OLOA TAUFAASESE I NIU SILA

 

Ua tuuina atu nei le talosaga a le malo Samoa e tauala i le Matagaluega o Fefaatauaiga, Alamanuia ma Leipa, i le malo Niu Sila, ina ia tagataga’i ma le toto’a i nisi o oloa o lo o faaulufaleina atu i lea atunuu, o lo o manino ai le solitulafono o kamupani mai isi atunuu o lo o gaosia ia oloa. O le talosaga a Samoa ua mafua ona o apa pe’epe’e o lo o faatauina i totonu o supamaketi i Niu Sila na gaosia mai nisi o atunuu Asia, ae o lo o faaaogaina ai upu Samoa ma ata o Samoa, ina ia faatosina ai tagata Samoa ma isi atunuu o le Pasefika o lo o alala i Niu Sila e faatau ia oloa.

 

Na saunoa le ofisa sili o pulega o le Matagaluega o Fefaatauaiga, Alamanuia ma Leipa, le susuga Auelua Samuelu Enari, ua latou talosagaina le malo Niu Sila ina ia aveesea ia oloa taufaasese mai fata o lo o faatau ai i totonu o faleoloa ma supamaketi i lea atunuu, ma ia faatino ni a latou suesuega ina ia maua ai kamupani ma atunuu o lo o faatinoina lea solitulafono.

 

Saunia: Lilomaiava Andrew Fa’asau, Naenae Productions