SESE FAAMATALAGA LIPOTIA E LE AU TUSITALA

Na faaalia atugaluga o le ofisa sili o pulega o le Matagaluega o le Soifua Maloloina i se feiloaiga ma le au tusitala ananafi ona o le sese o faamatalaga ua lipotia e se tasi o vaega faasalalau i luga o le upega tafailagi. Na saunoa le susuga Leausa Toleafoa Dr. Take Naseri e faapea, o se lipoti a le vaega faasalalau tala fou o le Talamua i luga o le upega tafailagi na taua ai le faamaonia o se gasegase e toatasi i totonu o le atunuu ua maua i le faama’i o le Dengue Fever.

Fai mai a ia, ua vevesi a latou paaga faalesoifua maloloina i atunuu i fafo aemaise o totonu o le Pasefika, ina ua latou maua lea lipoti a le Talamua, ma ua fesiligia ai lona ofisa pe aisea ua le lipotia atu ai lea gasegase. E le gata i lea, na saunoa foi le alii faatonusili, ua ia maua foi lipoti e faapea na taua i Tala Fou a le TV1 e faapea, ua faamaonia foi le maua o le teineititi e 14 tausaga na taofia mo togafitiga i le falemai i Motootua, mo auga e tali tutusa ma auga o le Dengue Fever. O lea teineititi sa asiasi atu i Amerika Samoa i le masina na te’a ma o lo o masalomia na pisia mai o ia i le Teritori i le faama’i o le Chikungunya, lea ua silia ma le to’a selau i latou ua pisia ai i Amerika Samoa.

Na faamalamalama e Leasua e faapea, o lo o talia le vaega o le toto o lea teineititi na auina atu i fafo mo suesuega i potu suesue faapitoa po o Laboratory, ma seiloga lava e faamaonia mai i iuga o ia suesuega, faatoa faamaonia le maua o lea teineititi i le faama’i o le Chikungunya. Na ia fautuaina le au tusitala ina ia faamautinoa muamau le sa’o ma le moni o a latou lipoti faatoa faasalalau ai.

FAATAUTO LEOLEO FESOASOANI E TO’A 240

O le amataga o le vaiaso nei na faatautoina ai ia leoleo fesoasoani  (auxiliary police officers) e to’a 240 ua faafaigaluegaina e fesoasoani i leoleo i le lua vaiaso o le a faagasolo ai le fonotele a atumotu laiti tau atia’e o le lalolagi lea o le a talimalo ai Samoa i le masina fou.

O le afioga Faamasino Vaepule Vaemoa Vaai sa faatautaia lea faatautoga i le Faamasinoga Faaitumalo, ma na ia fautuaina i latou ina ia faamaoni i tiute o le a faatonuina i latou e faatino. “Ua faatautoina outou e fesoasoani i leoleo ma le atunuu ma e tatau ona outou galulue ma le faamaoni ma le faaaloalo,” o a Vaepule lea. “E le faigofie ma e tele lu’itau o le a tou faafeagai ai.” O le fonotaga aupito i tele lea ua talimalo ai Samoa i lona tala faasolopito ma o le a faagasolo faatasi lava ma le vaiaso o le Teuila o lenei tausaga.

E silia i le to’a fa afe tagata o le a auai i lea fonotaga faapea i latou o le a malaga mai e maimoaina le vaiaso o le Teuila, ma e le taitai ona gafatia e le aofai o leoleo o lo o i ai nei ona puipuia le saogalemu ma faamalosi le tulafono, o le mafuaaga lea o le faafaigaluega o ia fesoasoani. O le aso 23 o Aukuso o le a amata faigaluega ai leoleo fesoasoani ua maea ona faatauto.

FAAMASINO LE ALII NA TIPOTI MAI SEATTLE

Na tulai i luma o le Faamasinoga i le aso Gafua le alii lea na ia faia ni uiga mataga faafeusuaiga i ni teineiti e toalima e i ai manaoga faapitoa sa aooga i le aoga mo tamaiti e i ai manaoga faapitoa sa faiaoga ai o ia. Na sola le alii o Leaoga Leatuvao i Amerika ina ua alia’e lea solitulafono, ae na toe tipoti mai o ia ina ua maua e le leoleo i le aai o  Seattle ua uma le aoga o le visa sa malaga atu ai o ia, ma o lo o nofo faasolitulafono ai o ia i totonu o Amerika.

Sa toe tipoti mai lea alii i Samoa nei ma sa tulai i luma o le Faamasinoga mo le lauina o ona moliaga. O Leatuvao sa faiaoga i le gagana e faaaoga e tagata e logonoa toe gugu, lea e faaaoga ai lima, ma sa ave taavale ai foi i lea aoga mo le fanau e i ai manaoga faapitoa. Ina ua maea ona lauina ona moliaga, sa toe tolopo le mataupu i le aso 18 o Aukuso ma ina ua savali mai o ia i fafo, sa vaaia le pupuni o ona foliga i se ie lavalava. O le 2012 na sola ai lea alii i Amerika i se visa e ono masina ma o lo o masalomia e i ai ni tagata maualuga sa fesoasoani ia te ia.