FILIFILIA SUI TUAI MANU SAMOA TAITOAFITU

Ua toe filifilia e le faiaoga ulu a le Manu Samoa Taitoafitu, le susuga Fuimaono Titimaea Tafua, ia nisi o sui tuai sa aofia ai i le au na siamupini i le taamilosaga lakapi taitoafitu faavaomalo a le IRB i le 2010, i le au ua faasauni nei mo le amataga o le taamilosaga o le 2014-2015 i Gold Coast i Ausetalia i le masina fou. Ua toe filifilia nei le alii o Lolo Lui, o se tasi o sui faamoemoeina o le au i le itu tau kiki kolopu i le pou, faapea le uigi saoasaoa o Fautua Otto lea sa taalo foi i lea tulaga i le Manu Samoa taito’a 15.

Na saunoa le susuga Fuimaono, e tele le lakapi o lo o totoe ia Lolo Lui e ui ina matua ona tausaga. O isi sui iloga o le au ua toe filifilia e aofia ai le susuga Afa Aiono lea sa avea ma kapeteni o le au i le isi vaitaimi, Alatasi Tupou ma Reupena Levasa, o se tasi foi sa tauaveina le tofi kapeteni o le au. O le lisi la lenei o tama taaalo ua filifilia i le au taitoafitu a le atunuu o lo o sauniuni atu nei mo le taamilosaga i Gold Coast, Ausetalia. Lio Lolo, Afa Aiono, Tofatu Solia, Faalemiga Selesele, Afioa’e Maiava, Alatasi Tupou, Lolo Lui, Fautua Otto, Siaosi Asofolau, Tom Iosefo, Samoa Toloa, Tila Mealoi.

Faaleoleo e le malaga; Foma’i Ah Ki, Tulolo Tulolo, Arnold Meredith, Reupena Levasa. Faiaoga Ulu; Fuimaono Titimaea Tafua. Taitai malaga; Galumalemana Rudolph Moors. Fofo; Mathew Amituanai.

SAUNOA TUILAEPA I MALO AUFAATASI

O le taua o faiga faapaaga mausali ma le mafana i le atinae o tamaoaiga o atumotu laiti tau atiae o le lalolagi, na toe faamamafa e le afioga i le alii palemia, le susuga Tuilaepa Sailele Malielegaoi, i lana lauga i le fono i mataupu tau malosiaga a Malo Aufaatasi i Niu Ioka i le vaiaso nei.

O lea faatasiga sa ia faailoa aloaia ai se polokalama faapitoa ua faaigoaina o le falevaai, ua lagolagoina e le Vaega Faavaomalo mo le Malosiaga e mafai ona Faafouina, mo se fuafuaga alu mamao e vave faatulaga ma faatino ai le gaosiga o le malosiaga mai sosia e mafai ona faafouina e pei o le savili ma ave o le la, ae mataitu ma le toto’a aafiaga e ono aafia ai tagata soifua.

Na saunoa Tuilaepa, o le malosiaga o se tasi lea o poutu autu mo le atinae e gafataulimaina ma e fesoasoani tele foi i taumafaiga e tali atu i aafiaga o le fesuiaiga o le tau, e pei ona taua i le taiala ua faaigoaina o SAMOA po o le SAMOA Pathway, lea na tuufaatasia i le fono tele na talimalo ai le atunuu. Fai mai a ia, ua faaopopoina manaoga a atumotu laiti ona o le faatupulaia o le faitau aofai o tagata o lo o alala ai, ma o le faalagolago i le malosiaga e gaosia mai le suauu ua tulai mai ai faafitauli tau tupe ona o le taugata tele o le suauu, ae le gata i lea, ua faaleagaina ai le siosiomaga ma’ale’ale o atumotu laiti.

Na ia faaalia, na o le pau le fofo aupito i talafeagai, o le malosiaga e gaosia mai i sosia e mafai ona toe faafou, ma ua tatau ona vave faatino loa ona ua faateteleina aafiaga o fesuiaiga o le tau.

TEINEITITI SA FAAMAMA LE TOTO

Na toe te’a I tua mai le falemai faamama toto i Motootua i le aso Lua o le vaiaso nei le teineititi e 16 tausaga lea ua faamama lona toto ona o le faaletonu o ona fatuga’o. Sa faataotolia le tamaitai o Lei’a Misa o Nofoalii mo ni nai vaiaso ona o le vaivai o lona tino ma e foliga mai ua manuia togafitiga sa fai. Na faaalia e le peresetene o le Toomaga mo e Puapuagatia, le susuga Lina Chang e faapea, e lima paina toto na mafai ona ofoina mo Lei’a e le poloketi fesoasoani a le Toomaga o le Life Line, ina ua manaomia ao faagasolo ona togafitiga.

“E ui i le tele o togafitiga o lo o faatinoina i lona tino laititi, e faaalia lava ona laufofoga ataata e pupuni ai le tiga o lo o ia faalogoina i lona tino vaivai,” o le saunoaga lea a Chang. Na ia faafetaia foi le alofa tulai o nisi o le mamalu o le atunuu e ala i fesoasoani eseese e lagolago ai le aiga o lenei teineititi loto tele. Na momoli foi le faafetai faapitoa a le tamaitai peresetene i le susuga Namulauulu Sami Leota, o le aufaigaluega a le kamupani o le Federal Pacific Finance ma se fomai e le o manao e faailoa lona suafa, lea o lo o auina mai a latou fesoasoani tau seleni i vaiaso taitasi.

“E faafetai atu foi i le mamalu lautele o le atunuu o lo o telefoni mai ma ofo mai la latou fesoasoani, faapea foi nisi ua ofoina mai o latou fatuga’o mo Lei’a,” o a Chang lea.

ASO FAATAUA AUFAIGALUEGA A LE MALO

O le aso Faraile ananafi na faamanatu ai le aso faapitoa mo le aufaigaluega a le malo, le PSC Day ma na amata le polokalama o le aso i le solo tele a aufaigaluega a matagaluega ma ofisa a le malo mai le nofoaga o le fui mu agai mai i luma o le maota o le malo i Matagialalua. Ina ua maea ona lagiina le vii o le saolotoga ma sisiina le tagavai o le atunuu, sa amata le faatasiga i le sauniga lotu puupuu.

O le afioga i le alii minisita o le Matagaluega fou o Faalapotopotoga Tumaoti a le malo, le afioga Lautafi Selafi Purcell, sa saunoa i le saunoaga autu o le aso e fai ma sui o le alii palemia, le susuga Tuilaepa Sailele Malielegaoi, lea o lo o malaga e auai i fonotaga a le Faalapotopotoga a Malo Aufaatasi i Niu Ioka. Na momoli le faamalo ma le faafetai a le afioga Lautafi i le aufaigaluega a le malo mo le tautua matavela, aemaise ai le tauleleia o le taligamalo a Samoa i le fonotele a Malo Aufaatasi sa usuia i Tuanaimato.

Na taualuga polokalama o le aso i le faaaliga o tautua a matagaluega ma ofisa eseese a le malo i le maota o Tui Atua Tupua Tamasese Efi ma sa faapea ona maimoa ai alo ma fanau aoga e faamasani ai i latou i galuega eseese e fia faigaluega ai pe a iu a latou aoaoga.

Saunia: Lilomaiava Andrew Fa’asau, Naenae Productions