PESETA: “E TELENOA LE SAOLOTOGA”

E telenoa le saolotoga o le au tusitala i Samoa, ma e avea loa le pili taufaaofi o le Fono Faatonutonu a le Au Tusitala 2014 ma tulafono, o le a ia tuuina atu ai laei ua leva ona moomia mo lea saolotoga. O le finagalo faaalia lea o le alii faipule o le itumalo Faasaleleaga Numera 4, le afioga Peseta Vaifou Tevaga, i felafolafaoiga a le Palemene i le vaiaso na tea nei, ao iloiloina lea tulafono taufaaofi.

O lo o taua i le gagana o le pili e faapea, o le faavaeina o se fono faatonutonu mo le au tusitala ina ia “uunaia ai le aloaia o le faatinoina o le galuega ma ia aofia ai faiga taualoa ma le faatuatuaina i le galuega faatusitala, ao usitaia aia tatau i lalo o le vaega lua o le Faavae.” O lenei pili taufaaofi na faaulu e le alii palemia, le susuga Tuilaepa Sailele Malielegaoi. Na faaalia le faanoanoa o le afioga Peseta i nisi o lipoti e faatatau ia te ia sa lomia ma lipotia e le au tusitala. “O lea e momoli lau faafetai i le alii palemia ona o laei ua saunia e lea tulafono taufaaofi mo le saolotoga o le au tusitala. O lea saolotoga o le saolotoga o le mea moni.” Na saunoa Peseta, o ia o se tasi o tagata e toatele o lo o tele ai tupe a le au fai nusipepa, ae na te lei faailoaina po o a ia nusipepa. “Na matua ou manua a ma aafia ai ma lo’u itumalo,” o a Peseta lea.

“E lelei pe ana faapea sa lolomi i totonu o le nusipepa, ae o lo’u ata na lolomia i le itulau muamua.” Na saunoa foi le alii faipule o le Itu Agai, le afioga Lealailepule Rimoni Aiafi ma faaalia lona lagolago i lea pili tau faaofi. Peitai na ia faaalia foi ona atugaluga ina nei aafia ma le sa’o le faatinoga o galuega a lea fono faatonutonu ona o le malo. Na tulai le alii palemia, ma ia faamalamalama, o totino o le fono faatonutonu e filifilia lava e le au tusitala ma o a latou faaiuga ma faiga filifiliga, e faatinoina lava e le au tusitala. “E leai la se aia a le malo i lea fono faatonu ae o lo o talosagaina e le toatele o lo o lagolagoina lea pili taufaaofi, le tatau ona faatupe e le malo o lea fono faatonu.

AVE E IUNI PASEFIKA LE I.R.B. I LE FAAMASINOGA

Ona o le suia e le IRB o tulafono e mafai ai ona sui le au e taalo ai le tagata, a ua maea ona tuuina atu ni talosaga se ono mo tama taaalo sa fiafia taaalo mo Samoa, ua lu’i ai e iuni lakapi mai atunuu e tolu o le Pasefika ia le IRB i le Faamasinoga ona o le suia o lea tulafono.

Na faaalia le faanoanoa o le alii faiaoga lagolago o le Manu Samoa, le susuga Namulauulu Alama Ieremia, ona o le faaleaogaina o le tuutuuga sa i ai e mafai ai ona sui le au a le tagata o lo o talosaga, o le taalo lea mo le au taitoafitu a le atunuu o lo o fia sui i ai, mo le vae e tasi o le taamilosaga taitoafitu faavaomalo a le IRB o lo o faagasolo nei. Ua toe sui nei e le IRB lea tuutuuga mai le tasi i le fa vae o le taamilosaga o lo o faagasolo nei. O lea suiga i le tuutuuga e le taumate o le a matua faigata i tama taaalo o lo faakonekarate i kalapu i fafo, ona o le faigata o le o ese mai a latou konekarate. Na faailoa mai e Namulauulu e faapea, ua sauna iuni lakapi a Samoa, Toga ma Fiti e ave lea mataupu i le Faamasinoga.

O le toalua o le toaono na talosaga mo suiga sa manaomia e taaalo mo le Manu Samoa Taitoafitu i le vae na faia i Gold Coast i Ausetalia, o le isi toalua sa tuu e taaalo i Dhubai, ao le isi toalua sa tuu e taaalo i le vae i Las Vegas. Na faaalia e Namulauulu, o le toalua mai lea toaono ua maea ona filifili mo le malaga taamilo a le Manu Samoa i Europa i le masina fou. Fai mai a ia, o lo o i ai lava le faamoemoe o le a iu manuia lea mataupu.

TOATELE ATU TAGATA NAI LO O LE FONO O LE SIDS

E toatele mamao le aofai o tagata o le a asiasi mai i Samoa ia Iulai o le tausaga fou mo le taaloga a le Manu Samoa ma le Olopeleki, nai lo o le aofai o tagata na malaga mai mo le fonotele a atumotu laiti tau atiae o le lalolagi lea sa talimalo ai le atunuu i le masina na tea nei. O le finagalo faaalia lea a le susuga Tuigamala Vaaiga Tuigamala, lea asiasi mai i le atunuu i le vaiaso na tea nei e faalauiloa ia fusuaga a alo o le atunuu ma nisi o tama fusu iloga mai isi atunuu o le Pasefika, lea ua fuafua mo le aso ono o le masina nei.

E pei ona silafia, o le susuga Tuigamala o sa taalo muamua mo le Olopeleki faapea foi le Manu Samoa, ma o loo ia pulea nei le kamupani faalauiloa o le Pound-4-Pound Fight Promotions lea o lo o tuufaatasia lea faamoemoe. Na saunoa Tuigamala i se feiloaiga ma le au tusitala e faapea, o lo o i ai lana fuafuaga e tuufaatasia ni fusuaga i le va o ni tama tuai o le Olopeleki e toalima ma ni tama tuai o le Manu Samoa e toalima. Fai mai a ia, e mautinoa lava le faatumulia o lea faamoemoe e le gata i fusuaga aemaise foi le taaloga lakapi i le aso e sosoo ai.

PIANO MO MATAGALUEGA KATOLIKO

Ua taunuu le miti a le aufaipese Katoliko a le Matagaluega Tamaitai o le Mauga i Lalovaea ua faaaoga piano fou e lua ua faameaalofa i ai e le mafutaga a tama fanau a Lalovaea i Apia, o lo o aumau i Aukilani i Niu Sila, lea na talosaga atu ai i le mafutaga ia Aperila o le tausaga nei. E le taugofie foai faapenei ae na saili tupe le mafutaga ma faatau ai piano, o le i si e mo viiga o le Atua i taimi o sauniga ao le i si e mo le ao'ina o pese aua le sauni ai i sauniga eseese ua masani ai le Ekalesia Katoliko. O le aso Sa na mavae atu nei, na tauaao atu ai e le sui o le mafutaga le afioga Tofilau Sefo Amoa o le pelesetene o le mafutaga, le foai e tusa ai o le talosaga a le matagaluega ma lana aufaipese.

Saunia: Lilomaiava Andrew Fa’asau, Naenae Productions