Ads by Google Ads by Google

TALA MAi SAMOA

TAAVALE FUIMU E TOLU MAI AUSETALIA

 

E tolu taavale fuimu na foai mai e le malo Ausetalia na tauaao aloaia i le malo i le aso Tofi i se sauniga sa auai taitai o le malo ma sui o malo mai fafo. O le afioga i le sui palemia, le afioga Fonotoe Nuafesili Pierre Lauofo, na saunoa faafetai e talia aloaia lea meaalofa taua mai le komesina maualuga o le malo Ausetalia, le susuga Sue Langford. Na faailoa e Fonotoe e faapea, o taavale fuimu e lua o ia taavale e tolu, sa faameaalofa mai e le malo Ausetalia i lalo o le faiga faapaaga ma le malo Samoa mo polokalama atinae e faatino ai galuega mo le puipuiga o vaomatua mai le aafia i mu ona o aafiaga o le fesuiaiga o le tau.

 

O le tau aofai o ia taavale tinei mu e lua e $44,000 tala Ausetalia po o le pe a ma le $90,000 tala Samoa. O le isi taavale e tasi sa tauala mai i le faiga faapaaga a le Pulega o le Tinei Mu a Samoa ma le Pulega o le Tinei Mu a le aai o Melepone ma na taua e Fonotoe, o le lona fa ai lea o ia ituaiga taavale fuimu o le Scania ua tuuina mai mo Samoa i lalo o lea polokalama fesoasoani. Na Langford ma sa ia faaalia, o ia taavale fuimu ua foai mai e lona malo o le faailoga vaaia lea o le galulue faatasi o malo e lua. Fai mai a ia, e malamalama lelei lona malo i le taua ma le fita o le galuega a le vaega tinei mu i le puipuia o mea totino aemaise o soifua o le lautele o le atunuu mai aafiaga I mu ma isi faalavelave.

 

60 TAUSAGA TAMA FALEPUIPUI I LE FAAOOLIMA

 

E 60 tausga o se tama mai Faleula ma Tanugamanono ua tuuina atu i le falepuipui ina ua faamaonia lona moliaga o le faaoo manua tuga ma i si moliaga o le faaoolima i se alii talavou e 20 tausaga lona matua. O le vevesi na tulai mai i le va o le ua molia, o Unasa Farani Obrien, ma se tasi o tina o le latou lava aiga o lo o o latou nonofo faatasi i se fanua o le latou aiga i Faleula, na mafua ai ona tulai mai le vevesi.

 

Na faaalia i faamaumauga a le Faamasinogae faapea, na faateteleina le taugaupu a le ua molia ma le tina na tagi, na mafua ai ona osofai ma le alii talavou lenei po o le tama a le tina na tagi, lea la na faaaoga ai loa e le ua molia se uamea ma faaoo ai se manua tuga i lona ao. Na faamautu mai e fitu ni filo na manaomia e su’i ai le manua i le ao o le na aafia. O se soligatulafono matuia tele lenei fua u le lipoti a le fomai, ma e le ‘alo ai lava le faamasinoga.

 

E i ai i si moliaga eseese na molia ma faamaonia faasaga i lenei tama, peitai e tuli faatasi uma ia faasalaaga, ma e iva masina na totoe mai le faaiuga a le Faamasinoga, lea na amata fua mai i le lua tausaga.

 

SAUNIA VAITELE SOI E FUSU

 

Ua faamautu mai le fusu ai lea ole alii o Vaitele Soi i se fusuaga tele faavaomalo aloaia ua faagioaina ole Sky Arena Super 8 Promotion. E pei foi ona lipotia mai i nusipepa i Niu Sila, o le a faalauiloa aloaia i se taimi le fusu ai o lenei alo o Samoa, o se tasi o paga aloaia mo lenei fusuaga, le Super 8 i le masina fou. O le taimi nei e lei malolo le alii oVaitele Soi i ana fusuaga faapolofesa, ma o le a maualuga ai lea po i paga fusu, lea e aofia ai nisi o alii fusu faapolofesa lauiloa a Ausetalia faapea Niu Sila.

 

O lea po, o le a faapea ona faia ai se fusuaga tele a le alii Niu Sila lauiloa o Shane Cameron i le paga mamafa ma se tasi o siamupini o le lalolagi, o Kali Meehans. O lo o i Samoa nei le alii o Vaitele ma o le a feiloai ma sui o le malo i se taimi ae lei tuuvaa atu mo lenei fusuaga tele. Ua faailoa mai lipoti, o lo o koleni lava lenei alii i Samoa nei, ma ua atoa nei le 10 masina e lei toe i ai lava sana fusuaga aloaia faapolofesa ua faamauina. Ae ui lava i lea tulaga, o lo o maualuga lava le taofi o le pulega o lenei alii o le a sologa manuia taumafaiga i lea po.

 

Ma e le pau ai foi lea o se fusuaga aloaia mo Soi i le Super 8 aua ua maea ona ia sainia le maliega ma le Sky Arena faatasi ai ai ma le siamupini a Niu Sila i le paga lava lenei o le cruiserweight. O se avanoa lelei tele lenei mo Soi, e pei ona faailoa mai e lana pulega. O Soi e mai le afioaga o Vailele lea o lo o umia ai le suafa matai o Satiamaalii.

 

AVE TAAVALE FAASUA’AVA LE SUI O LE L.T.A.

 

Na tulai i luma o le Faamasinoga Faaitumalo se tasi o le aufaigaluega a le Pulega o Felauaiga i Luga o le Laueleele (L.T.A.) e tali i le moliaga o le ave taavale faasu’ava, ma na toe faamanatu i ai e le afioga Faamasino Tafaoimalo Leilani Tuala-Warren, le ogaoga o le ave taavale ao faasua’ava i le ava malosi.

 

“E te faigaluega i le L.T.A. ma o lona uiga o lo o e malamalama lelei lava i le ogaoga o lau solitulafono ua faia,” o a Faamasino Tafaoimalo lea. Na faaalia i faamaumauga a le Faamasinoga e faapea, e 91 micrograms o le ava malosi sa faamauina i le masini feula, ao le 40 e faagata ai le tele o le ava malosi. Sa faapea ona faasala Faamasino Tafaoimalo ia Tautua Saulo i le sala tupe e $590 ma o le ta o le itula e fa i le afiafi o le aso lava lena e faagata ai le totogiina o lea sala. A leai e taofia i le falepuipui mo le ono vaiaso.

 

Lilomaiava Andrew Fa’asau, Naenae Productions