FA’ATAUA TUI ATUA LE LOTO MAUALALO

I le saunoaga a le Ao mamalu o le malo o Samoa e fa’alauiloa ai le feau o le kerisimasi o lenei tausaga mo Samoa atoa, sa fa’aautu ai lana saunoaga i le taua lea o le loto maualalo mo lenei kerisimasi, e pei fo’i ona molimauina i matua fa’aletino o Iesu ia Iosefa ma Maria.

Na taua e le afioga a Tui Atua Tupua Tamasese Efi i lana saunoaga e fa’apea, o le pulu naunau o Iosefa ma Maria ia maua se nofoaga lelei e fanau mai ai le la pepe, na mafua ai ona la natinati e saili se nofoaga talafeagai mo i laua, ma la maua ai le fale o manu, o se nofoaga fa’atauva’a na soifua mai ai le pepe o le kerisimasi, le Mesia na valoia. Na taua e Tui Atua le tele o lesona eseese e mafai ona aoaoina e tagata Samoa uma mai le tala ia Iesu, lea e tatau ona avea ma fa’ata’ita’iga lelei mo le atunu’u atoa i le vaitau fiafia lenei o le tausaga ua tatou i ai.

Na faaiu le saunoaga a Tui Atua i lona fautuaina lea o le atunu’u atoa, ina ia tumau pea i le loto maualalo, alofa ma le naunau e fa’afetaia fa’amanuiaga a le Atua ua sasa’a mai i o tatou tagata.

TOFU UMA PAGOTA E TO’A 476 MA MEAALOFA KERISIMASI

Na tofu uma ali’i ma tama’ita’i o lo o tuli a latou fa’asalaga i le falepuipui i Tafa’igata e to’A 476, ma nai meaalofa laiti na foa’i atu e se ulugali’i mai fafo e galulue i totonu o Samoa. O le komesina o Leoleo a Samoa na ia tauaaoina lenei uta o meaalofa mai le ulugali’i agalelei, faapea ai ma isi meaalofa e pei o mea faigaluega e fa’aaoga i galuega a pagota i aso o le vaiaso.

E le i mananao le ulugali’i e fa’alauiloa o la igoa, peita’i sa la taua lo la naunau ina ia fai ni meaalofa mo pagota i Tafa’igata, ina ia latou silafia ai e le o tu’ulafoaina i latou e le Atua. O se po fiafia na tapena e le ulugali’i lenei, lea na la fa’aaliina ai se ata tifaga ae lafo tupe atu i ai tagata o le atunu’u, ma mafai ai ona aoina se vaega tupe e tusa ma le $1,000, ma fesoasoani ai loa lea tupe i le fa’atauina o meaalofa mo nai pagota, e pei o fasimoli, pulumu, paste, ma nai isi meaalofa laiti e fesoasoani ai mo i latou ao tuli ai a latou fa’asalaga. O mea faigaluega sa foa’i mo pagota na mafai ona foa’i ane i nisi o kamupani i le atunu’u.

AUTU KERISIMASI I FAIGA MEAALOFA

E leai se isi mafua’aga na ala ai ona tumutumu le taulaga o Apia i fa’atauga o le kerisimasi, ua na o le sailiina lea o meaalofa e fai meaalofa atu ai le isi i le tasi. Na taua e le to’atele o matua e faapea, o le kerisimasi e faatatau i le tuuina atu o meaalofa atoa ai ma le loto faamagalo o le isi i le tasi. Na vaaia le tumutumu o faleoloa eseese i le taulaga i le toatele o le atunuu na lolofi atu i ai mo le faia o faatauga.

O ni isi o matua sa ave la latou fa’amuamua i meataalo mo le fanau ae o isi na manatu e faamuamua laei mo le fanau, o meaalofa ia e sili atu ona taua ma aoga toe umi. O le itu taua e pei ona faaalia e ni isi o matua, sa lava pea le faasoa i le itu tau tupe, lea na mafai ai ona tali manaoga o aiga ma nai fanau. O ni isi o matua na maua a latou tupe faamomoli mai aiga i Tutuila, Niu Sila, Ausetalia ma Amerika, ae o isi sa faaputuputu lava nai seleni aua faatauga o le kerisimasi o lenei tausaga.

MAUA PARADISE RESORT FA’AILOGA MAUALUGA I FALETALIMALO

Ua fa’amanuiaina le fale talimalo o le Paradise Resort i le faailoga o le faletalimalo pito sili ona toatele tagata e nonofo ai, lea e tele naua talosaga sa faaulu i luga o fesootaiga tau initaneti mo ni avanoa e nonofo ai tagata tafafao mai itu eseese o le lalolagi, sa fia malaga mai e asiasi i Samoa. Mai faletalimalo e tusa ma le 560,000 i le lalolagi, o le Paradise na filifili mai i faletalimalo e 24 e filifili mai ai se faletalimalo na te maua lenei fa’ailoga taualoa. O le taimi nei la, ua tulaga 23 nei le Paradise i le faatulagaina o faletalimalo ua mafai ona filifilia i lenei faailoga, ma ua lotolotoi ma isi faletalimalo tetele i le lalolagi.

LEAI NI FAALAVELAVE MATUIA I SAMOA I LE KERISIMASI

E leai ni faalavelave matuia na tutupu i le aso o le Kerisimasi i Samoa, ao alo atu le atunuu e faamanatu le aso fiafia o lenei tausaga. I ripoti mai le ofisa o leoleo na taua ai e faapea, e leai ni faalavelave tetele na tutupu i le aso kerisimasi, e leai foi se soifua na maimau, pe a faatusatusa i isi kerisimasi ua mavae atu, lea sa i ai faalavelave matuia na maimau ai soifua o ni isi o le atunuu. Pau le faalavelave matuia lea na tulai mai i Samoa i le vaiaso na te’a nei, o le faalavelave lea na manu’a ai se leoleo i se tauga fana ma ni alii sa fa’aaupegaina. E ui o lea ua maea le aso kerisimasi o lenei tausaga, ae o lo o fautuaina pea e le matagaluega o leoleo le atunuu aemaise i latou o lo o tagofia le ava malosi, ina ia aua nei tagofia le ava malosi ma feoa’i i taavale i luga o le alatele, ina nei maimau se soifua i ni faalavelave tau taavale e tutupu mai ai.

FIAFIA TIM NANAI-WILLIAMS UA TAALO MO SAMOA

Ua fa'aalia e le alii lakapi mai Niu Sila ia Tim Nanai-Williams lona fiafia tele ina ua maua lona avanoa e taalo ai mo le au taitoa 7 a Samoa i taamilosaga e lua sa faia i Aferika i le tolu vaiaso talu ai, e ui o se tulaga faaletonu ma le maualalo na ausia e le au a le atunuu, ina ua le maua se avanoa e tausinio ai i le sailiga o le Ipu autu e pei ona masani ai i le tele o ta'amilosaga.

Na taua fo'i e Tim e faapea, e le o se lagona lelei ia te ia le toe taalo faasaga tau i le 'au sa taalo muamua ai, le au malosi mai Niu Sila, lea na filifilia i ai o ia i le 2008-09. O le avanoa ua maua e Tim e taalo ai mo le au taitoa 7 a le atunuu, o le taumafai lea ina ia fa'amalie se vaega o le tulafono a le IRB, i le mafai lea ona taalo se tama taalo o lo o kalapu i atunuu i fafo i le au taitoa 15 a lona atunu'u mo le ipu o le lalolagi i le tausaga fou, pe afai e taalo muamua i ni taamilosaga o taaloga taitoa 7 se tolu. O le faanaunauga o le susuga a Tim, o le fia maua lea o sona avanoa e taalo ai i le au taitoa 15 a le Manu Samoa mo le ipu o le lalolagi i le tausaga fou.

fa’aliliu AF