MALIU INA UA TAUAI I MAA

E 27 tausaga o se tama na oso i le sami i le maketi o i’a i Savalalo ao ia taumafai e sola ese mai ni alii sa latou feeseeseai, ua maliu ona o ni manua tuga i lona ao. O le alii o Holani Toso o Leone i Apia ma Vaimoso, o se alii faifaiva i se tasi o vaa fagota e taula i le maketi o i’a i Savalalo, ma faatoa taunuu ifo le latou faiva i le te’a o le lua i le aoauli o le aso Toonai na te’a nei, ona fai ai lea o se latou inuga pia ma nisi o alii e pe a ma le toafitu. Na iu ina pisa lea inuga ma faapea ona fasi faamo’amo’a e ia alii le ua maliu. Na faaalia e le tama loto faavauvau o Toso Fata e faapea, na mafua ona puna lona atalii i le sami ona o lona taumafai e sola ese aua ua le mafai ona ia tali atu i alii e toafitu sa latou fasia faamo’amo’a o ia. Na taua e le tama, e ui ina puna o ia i le sami, ae sa tauai i maa e i latou sa tuliloaina o ia ma o lo o masalomia o le tuga o manua i lona ao na faapea ona maliu ai o ia. Na faaalia e le tama le nutimomoia o lona loto i le maliu fasia ai o si ona atalii. Fai mai a ia, o Holani o le ulumatua o lana fanau e toafitu, e faiava o ia i Vaimoso ma e toatasi lava si ona afafine. O lo o tau sailia nei e leoleo i latou na faaooina le maliu i lea alii.

TAUMAFAI TAMAITITI 11 TAUSAGA PULE I LE OLA

Na semanu e toe faaopopoina foi le fuainumera o i latou e pule i o latou ola pe ana le vave maua se tamaititi e 11 tausaga mai Satapuala ua taumafai e pule i lona ola. Na faaalia e lona tina e faapea, sa ia faatonuina lea alii tamaititi e alu e aumai ni polo feu e fai ai le latou meaai, ae musu o ia. Sa faapea loa ona fasi e le tina o ia. E lei umi se taimi ae maitauina e le tina e le o i ai lana tama i le fale ma sa ia faatonuina lana fanau matutua e o vaai o ia. Na foi ane uso matutua o lea tamaitIiti ma sa’esa’e ane o ia ma le faaupuga e faapea, sa latou maua atu ua ia faaaogaina lona ie aoga e sisi ai lona ua.

E ONO TUUFAATASI OFISA E LUA O LE MALO

E ono tuufaatasia le Ofisa o le Komesina o Faiga Palota ma le Ofisa o le Fono Aoao Faitulafono, ao lei aulia le faiga palota lautele a le atunuu i le tausaga fou. O lenei fuafuaga a le malo o se fautuaga na tuuina atu e le komiti faapalemene ma folasia i luma o le Palemene, ma ua talia aloaia e le afioga i le alii palemia, le susuga Tuilaepa Sailele Malielegaoi. O le Ofisa o Faiga Palota na tuueseese ma le Ofisa o le Fono ina ia saga tutoatasi ai le ofisa i le faatautaia o faiga palota lautele a le atunuu. Na saunoa le alii palemia i tauaofiaga a le Palemene i le vaiaso ua tuanai e faapea, o le a silasila le malo i lea fautuaga ma talanoaina lea mataupu ona toe lipoti atu ai lea i le Maota mo le soalaupuleina ma toe faia i ai se faaiuga.

FAAALIGA O OLOA A SAMOA E LUA

O le aso 15 ma le 17 o le masina fou o Aperila o lo o fuafua e faatautaia ai se faaaliga o oloa i le va o Samoa e lua, i se vaega o le polokalama mo le faamanatuina o le aso o le fu’a a Amerika Samoa i lenei tausaga. O le faaiuga o le vaiaso na sei mavae atu nei sa faia ai se fonotaga i le teritori aua tapenaga mo lea faamoemoe. O lea faaaliga o oloa na afua mai i se maliega ina ua maea talanoaga masani i le va o taitai o faigamalo ma matagaluega a malo e lua, lea sa talimalo ai Samoa i le 2012. O le tausaga na te’a nei na faia mai ai i Samoa lea faaaliga o oloa ma sa toatele nisi o le au faipisinisi mai Amerika Samoa sa auai mai. O sui mai Samoa ma Amerika Samoa faatasi ai ma sui mai faalapotopotoga tumaoti a le malo o lo o gafa ma tapenaga mo lea faamoemoe i le masina fou.

FAALEAOGA MOLIAGA O LE ALII LEOLEO

Ua faaleaogaina e le Faamasinoga Faaitumalo ia moliaga faasaga i se alii sa avea ma leoleo, sa tuuaia i lona fesoasoani e faasola se alii pagota sa tuli lona faasalaga i le toese i Tafaigata. O lenei mataupu na tulai mai i le aso valu o le masina o Iuni o le tausaga na te’a nei, lea o lo o masalomia na fesoasoani ai le alii o Anamani Sigapoa e faasola lea pagota mai le toese i Tafaigata. O le aso 8 o Iulai o le tausaga na te’a nei lava na faamalolo ai loa lea alii leoleo mai lana galuega ona o ia tuuaiga. Ua maea ona iloilo e le Faamasinoga Faaitumalo ia molimau uma ma o lea la ua faia ai le faaiuga e faaleaoga uma moliaga faasaga i le alii leoleo. E tulai mai lea mataupu ma faamalolo ai lea alii, ua atoa le lima tausaga talu ona galue o ia i le Matagaluega o Leoleo ma Falepuipui, o se tasi o malu o le malo i le toese i Tafaigata. Na talosaga le tamaitai loia sa tulai mo le na molia, le susuga Papalii Rosela Viane, i le Faamasinoga ina ia tuuina atu le avanoa e toe faigaluega ai lea alii i lana galuega.