Ads by Google Ads by Google

TALA MAI SAMOA

FILIFILIA SUI FOU O LE MANU SAMOA 7’s

 

E toafa sui o le au a le Malisi Sagato Iosefo Aukilani lea na siamupini i le taamilosaga taitoafitu faavaomalo a le Vailima Malisi i le faaiuga o le vaiaso na te’a nei, ua filifilia nei i le Manu Samoa Taitoafitu o le a tausinio i vae e lua o le a sosoo ai nei o le taamilosaga taitoafitu a le IRB I Las Vegas ma Vancouver i Kanata. O i latou ia e aofia ai le alii na sikoa silia I le taamilosaga taitoafitu a le Vailima Malisi, le susuga Eddie Fidow, o Alex Samoa, Savelio Ropati ma Alamanda Motuga. O le lelei o le taaalo a ia alii i le aso muamua o le taamilosaga i le aso Tofi na te’a nei na filifilia ai i latou e le alii faiaoga ulu a le Manu Samoa 7’s, le susuga Damien McGrath ma o le aso Faraile na faalauiloa aloaia ai e le Iuni Lakapi le lisi o tama taaalo e to’a 12 ua filifilia. O le susuga Tele’a Seumanutafa o le au a Malisi Sagato Iosefo Samoa le isi sui fou. O i latou la nei ua filifilia; Faalemiga Selesele (kapeteni), Alefosio Tapili, Alamanda Motuga, Belgium Tuatagaloa, Tele’a Seumanutafa, Savelio Ropati, Phoenix Hunapo-Nofoa, Tila Mealoi, Alex Samoa, Samoa Toloa, Eddie Fidow, Tomasi Alosio. O le faaiuga o le vaiaso nei e faagasolo ai le taamilosaga i Las Vegas.

 

FUSU PARKER MA TAKAM SAILI LE E LU’I I LE FUSI

 

Ua faatonuina e le faalapotopotoga o fusuaga faavaomalo, le International Boxing Federation (IBF) lea e faamautu i New Jersey, Amerika, le faia o se fusuaga pa’u ma nofo i le va o le alo o Samoa ia Laauli Lupesoliai Joseph Parker ma le alii o Carlos Takam mai Cameroon i Aferika e saili ai le numera tasi o le paga mamafa a le IBF. O le tagata e manumalo i lea fusuaga, o le a maua le avanoa e lu’i ai le fusi o le lalolagi a le IBF. Na faaalia i se imeli mai le IBF, o Parker ma Takam o tama fusu ua aupito i maualuga i le faatulagaga o tama fusu o le paga mamafa ma ua tatau ona faia loa se la fusuaga e saili ai po o ai o i laua o le a lu’iina le fusi o le lalolagi. Ua tali ia pulega a nei alii fusu e faaalia lo latou malilie i lea fuafuaga, ma e tolu vaiaso ua tuuina atu e feutagai ai mo tuutuuga o lea fusuaga. Peitai i lalo o tulafono a le IBF, e le mafai e Parker po o Takam ona toe faia se isi fusuaga i le taimi nei ae lei oo i le aso o le la fusuaga. O lona uiga, ua le taunuu le fusuaga a Parker lea sa tuu e fai i le aso 16 o Aperila i Christchurch. O le aso 9 o Aperila, 2016 e lu’i ai e le alii fusu o Anthony Joshua o Peretania le fusi o le paga mamafa a le IBF lea o lo o ia Charles Martin o Amerika. I lalo o tulafono a le IBF, afai e manuia le puipuiga e Martin o le fusi, e tatau ona toe fusu e puipui le fusi ma se isi o Parker po o Takam ae lei oo i le aso 16 o Ianuari 2017. Ae afai e manumalo Joshua, o lona uiga e fetaui ma se isi o Parker po o Takam ae lei oo i le aso 9 o Ianuari, 2017. O le alii o Takam o Cameroon e 36 tausaga, ua 33 manumalo, lua faiaina, ae tasi le tutusa, ma o lona umi e 6 futu tolu inisi. O Parker e 24 tausaga, ua 18 manumalo, leai se faiaina leai se tutusa, ma o lona umi e 6 futu fa inisi.

 

MANUMALO MALISI AUKILANI TAITOAFITU A LE MALISI

 

Ua malaga atu nei le ipu a le taamilosaga taitoafitu faavaomalo a le Vailima Malisi i Niu Sila mo le taimi muamua talu ona amata mai lenei taamilosaga i le 28 tausaga talu ai. O le manumalo ai o le au a le Malisi Sagato Iosefo Aukilani I le aso Toonai na te’a nei i le au a le afioaga o Vaiala i le suega siamupini o le ipu autu o le taamilosaga, na avea ai le Malisi Sagato Iosefo Aukilani ma au muamua mai Niu Sila ua siamupini i lenei taamilosaga faavaomalo. E le gata i lea, o le taimi muamua foi lea ua leai ai se ai a se au e taaalo i le suega siamupini ina ua manumalo le Malisi Sagato Iosefo Aukilani i ai e 33 i le leai a Vaiala. E lima sikoa na latou maua ma e lua sikoa a le alii na sikoa silia i le taamilosaga, le susuga Eddie Fidow. Na faaalia le agaga fiafia o le alii kapeteni, le susuga Orion Keil ma na ia faaalia, o le a latou toe malaga mai i le tausaga fou e puipui le ipu. Na manumalo le Malisi Sagato Iosefo Aukilani ia Moataa i le semi-final, ae manumalo Vaiala ia Malisi Sagato Iosefo Samoa. Na sue e Moataa ma le Malisi Sagato Iosefo Samoa le tulaga tolu ma le fa ma manumalo ai Moataa e 21-7. O le ipu mafolafola (Plate) na manumalo ai Laulii ia Vailele e 10-7, o le ipu faaofuofu (Bowl) na manumalo ai Saasaai ia SCOPA e 10-0, o le talita (Shield) na manumalo ai Vaitoomuli i le Afaluko mai Solosolo e 10-5, ao le Sipuni (Spoon) na manumalo ai le Vailima Marist Saints ia Magiagi e 34-7.