Ads by Google Ads by Google

TALA MAI SAMOA

OSOFA’I E PAGOTA SE TAMAITAI TUSITALA

 

O pagota e toalua o lo o taofia nei i le toese i Tafaigata ona o ni soligatulafono tuga ma ua silafia e le toatele o le atunuu ona o le faasalalauina faalauaitele o la ata ma faamatalaga ina ua sosola ese mai le toese, sa la osofaia le tamaitai tusitala o Pai Mulitalo Ale i fafo o le Maota Faamasino i Mulinuu i le aso Gafua o le vaiaso nei. Na lipotia e isi tusitala sa molimauina lea tulaga e faapea, na asu e le alii pagota o Faigame Vaitoelau ia ni vai sa i totonu o se apa inu, i le tamaitai tusitala o le nusipepa o le Samoa Observer, ae oso ane le isi alii pagota o Lauititi Tualima agai i le tamaitai tusitala ma ia togiina o ia i se faguvai e lei tatalaina. Na misi lana togi ma sa tau taofiofi o ia e leoleo ma tulei i totonu o le taavale a leoleo. Na tupu lea osofaiga ao taitai ane e leoleo e pe ma le toalima, ia pagota sa tulai i le Faamasinoga i lena taeao i le van a leoleo e toe ave ai i Tafaigata, ma na pueina uma e le tsuitala o le nusipepa o le Newsline ia gaioiga a pagota i lana mea pueata. O Vaitoelau o lo o tuli lona faasalaga o le gaoi ma le talepe fale, ao Tualima o lo o nofosala i le toese ona o le faiaiga faamalosi. E lei faamanu’alia Pai i lea osofaiga ae na ia taua lona agaga popole ona o le faatinoina e ia pagota o se osofaiga faapea i le ao teatea ao i ai leoleo. “Ua iloa ai lava le vaavaa o ia alii pagota,” o a Pai lea. “Ua le toe kea pe soli le tulafono pe leai.” O le aso 14 o Mati ua faatulagaina e Faamasino Vui Clarence Nelson e lauina ai faasalaga o ia pagota.

 

FALEPUIPUI SE TINA 38 TAUSAGA I LE GAOI

 

Ua faasalaina i le 18 masina i le falepuipui se tina e 36 tausaga ina ua faamonia e le Faamasinoga ona moliaga o le gaoi ao avea ma tagata faigaluega. O lea faasalaga na tuuina atu e Faamasino Vui Clarence Nelson ia Samantha Tavita ina ua ioe o ia i moliaga e lua faasaga ia te ia. O le ua faasalaina nei sa faauluulu i ai le vaega o Faatauga ma Maketi (Sales & Marketing) a le kamupani gaosi ava malosi o le Vailima Breweries ma sa tuuaia o ia i lona aveina faagaoi o le tinoitupe e $12,960 a le kamupani. Na finau le loia a le ua faasalaina o Leota Tima Leavai, e lei gaoia e Tavita lea tupe, ae sa leiloa le tupe ao ia taofia, ma o le va o le taimi na tuuina atu ai le tupe ia te ia ma le ofisa, na leiloa ai lea tinoitupe. Na ia faaalia foi, ua maea ona toe totogi e Tavita le $12,000 i le kamupani ma o lo o ia fuafua e totogi le $960 o lo o totoe i le vaiaso fou. Na finau le tamaitai loia, e tatau ona faavasegaina le solitulafono o lo o molia ai Tavita i le vaega o soligatulafono laiti ona e lei faaaogaina e Tavita se vaega o lea tupe. Peitai na faauilavea Faamasino Vui, e le mafai ona talia e le Faamasinoga lana finau. “Sa tatau ona teena e ia ona moliaga ona aloaia ai lea o lau finau,” o a Vui lea. “Ae o le mea na tupu, ua talitualimaina e le ua molia le faatuatuaga a le pulega o le kamupani sa tuuina atu ia te ia, e ala i lona gaoia o le $12,960, o se tupe tele.” Fai mai a ia, ua faatupulaia lea soligatulafono i Samoa aemaise lava i tina talavou ma na o Tafaigata lava lona iuga.

 

FAITIOINA E PALUSALUE UAFU FUAFUA I VAIUSU

 

Na faitioina malosi e le taitai o le vaega faaupufai o le Tautua Samoa, le afioga Palusalue Faapo II, le fuafuaga a le malo e fausia se uafu faavaomalo I gataifale o le afioaga o Vaiusu. Na faaigoa e Palusalue lea fuafuaga, o se atinae le fuafua lelei o le a faaleagaina ai le siosiomaga o le afioaga aemaise o soifua o tagata o le afioaga e faalagolago I i’a ma figota o le sami e maua ai se alagatupe aua le tausiga o aiga. Na saunoa Palusalue, o le tiute o so o se faigamalo o le faia o atinae tetele nei aua le faaleleia o le atinae ma le tamaoaiga o le atunuu. “A ia fai fuafua lelei,” o le faamamafa lea a Palu. “Mo se faataitaiga, o le uafu fou faavaomalo lea ua fuafua le malo e fausia i gataifale o le afioaga o Vaiusu. Ae silia ma le $40 miliona tala Amerika o le a fesoasoani mai ai le malo Iapani i le faafouina o le uafu i Matautu-tai. Ao le mea aupito sili ona matautia, o le afaina ai o gataifale o Faleata faasolo atu ai i Tuamasaga. O le taimi lenei a e malaga atu i le auala, o le matua tele o tau i’a, fagu sea, fole, tugane ma so o se ituaiga figota. Ae a taunuu le fuafuaga lea a le malo, e te le toe maua ia mea uma, ma o le a e alu i le maketi e faatau ai au i’a ma figota. E faapefea la ona faatusatusa le uafu i le soifua o tagata o alala ma papa aao i ia afioaga? Le mea o lo o maua ai le latou alagatupe e tausi ai o latou aiga? A tulai mai le Tautua Samoa, e leai se uafu e faia i lea vaega o le atunuu ae ave i Savaii. O le mea lena matou te fai atu ai pea, ina ia fuafua lelei le faiga atinae. Fua i luma fua i tua.”