FASI LE TAMA TOE SUSUNU LANA TAAVALE

O se vaaiga matautia le le taupulea na molimauina i le po o le aso Tofi ao sauniuni le atunuu e faamanatu puapuaga o lo tatou Alii Faaola, i le aso Faraile Lelei i le faaiuga o le Vaiaso Paia na sei mavae atu nei. O ia tulaga na tulai mai i le uafu i Salelologa ina ua fasi faamo’amo’a toe tauai i maa e tupulaga o Salelologa se alii mai Salelavalu, toe susunu lana taavale. Na faaalia e se alii leoleo i Savaii e faapea, o lea faalavelave na tulai mai i vaeluaga o le po ina ua tapunia falekalapu i Salelologa, ma na mafua ina ua tau soso’a e le taavale a le alii mai Salelavalu le pikiapu a se tasi mai Salelologa. Fai mai a ia, sa faatu e tupulaga le taavale a le alii na aafia i luma o le uafu ma latou fasia toe tauai o ia i maa, toe susunu ma lana taavale. Na mafai ona sola ese lea alii ma sulu i le sa o le Lady Samoa II lea sa taula i le uafu ma sa laveaia o ia e seila o le vaa. Na taunuu atu matai o le afioaga ma latou vavaoina i latou sa faia lea soligatulafono ma sa taunuu atu foi ma leoleo ma o lo o masalomia o lo o aafia ai ai se tasi o pagota sa aso Sa mai i tua mo le Eseta, ia i latou na faatinoina lea solitulafono. Na faaalia e se tasi sa molimauina lea faalavelave, o se vaaiga matautia sa faapea  ia nao atunuu i fafo e tupu ai ao lea ua vaaia foi i Samoa. O lo faaauau suesuega a leoleo.

TOFIA MINISITA LAGOLAGO O LE KAPENETA

O le aso Tofi o le vaiaso na tea nei na faalauiloa ai e le alii palemia, le susuga Tuilaepa Sailele Malielegaoi, ia suafa o minisita lagolago ua ia filifilia, ma faatauto ai lava i se sauniga puupuu na faataunuuina i le maota o le malo i Matagialalua. O le tulaga na faateia ai le toatele, ona e lei aofia ai foi le alii faipule sa avea ma sui palemia i le paeaiga ua mavae, le afioga Fonotoe Nuafesili Pierre Lauofo. O minisita lagolago la nei ua filifilia e le alii palemia. Matagaluega a le Palemia ma le Kapeneta, o Peseta Vaifou Tevaga, Matagaluega o Punaoa Faalenatura ma le Siosiomaga, o Taefu Lemi Taefu, Matagaluega o o Fefaatauaiga, Atinae ma Leipa, o Tuifaasisina Lisati Lelelisiuao, Matagaluega o le Soifua Maloloina, o Salausa Dr. John Ah Ching, Matagaluega o Leoleo ma Falepuipui, o Amituanai Fagaivalu Samu, Matagaluega o Tupe, o Mulipola Leiataua Laki, Matagaluega o Tina ma Tamaitai, Nuu ma Aga Fesootai, o Tofa Li’o Foleni, Matagaluega o Faatoaga ma Faigafaiva, o Faasootauloa Pati Taulapapa, Matagaluega o Fesootaiga ma Faamatalaga Tekonolosi, o Lealailepule Rimoni Aiafi, Matagaluega o Faamasinoga, o Lenata’i Victor Tamapua, Matagaluega o Tupe Maua, o Sooalo Feo Mene, Matagaluega o Galuega, Felauaiga ma Galuega Tetele, o Seiuli Ueligitone Seiuli, Matagaluega o Aoga, Taaloga ma Aganuu, o Alai’asa Sepulona Moananu.

POPOLE FAAMASINO I LE FAATUPULAIA O LE AISA

Ua faaalia popolega o le afioga Faamasino Vui Clarence Nelson ona o le faatupulaia o i latou e tulai i le Faamasinoga Maualuga i moliaga o le umia o fualaau faasina mamafa e pei o le aisa. O se alii na tipoti mai i Hawaii ma o lo o alala nei i Samoa, o Panama Tevaga, na faasalaina i le vaiaso na te’a nei i le 12 masina i le falepuipui ona o moliaga tau fualaau faasaina e aofia ai le umia o le fualaau faasaina o le aisa. Ua fai si leva ona mataituina e leoleo lea alii ae sa faafaigata ona latou moliaina o ia ona o le leai o ni molimau maumaututu, atoa ai ma le fesuisuiai o nofoaga e nofo ai lea alii.  Peitai o le vaveao o le aso 22 o Aukuso, 2015 na osofaia ai loa e leoleo le fale sa nofo totogi ai o ia i Ululoloa ma latou maua ai le 3.2 kalama o le aisa, o mariuana faapea paipa tioata e ula ai le aisa. Na saunoa Faamasino Vui, o tausaga ua te’a, o le mariuana lava sa tele ina molia ai tagata i le tulafono. Fai mai a ia, o le mariuana e vasegaina i le vaega ‘B’ o fualaau faasaina, ae o le tulaga ua ia maitauina i lenei vaitau, ua matua faatupulaia lava le fuainumera o tagata e molia atu i fualaau faasaina mamafa lea e i le vaega ‘A’ e pei o le aisa ma le cocaine. Na saunoa le alii faamasino, o le mafuaaga lea ua faatuina ai le Faamasinoga o Fualaau Faasaina ma le Ava Malosi, faapea le faaluaina e le malo o le faasalaga mo le umia o le mariuana mai le 7 i le 14 tausaga i le falepuipui.