SUSUNU LONA IA LAVA USO

E 38 tausaga o se alii mai le afioaga o Lotofaga, Aleipata e ono molia i le moliaga o le fasioti tagata fa’amoemoeina, ona o le maliu ai o lona uso laititi e 25 tausaga le matua. O le po o le aso Lulu o le vaiaso nei na tulai mai ai lea fa’alavelave i lo latou aiga. Na saunoa le sui sooupu o le Matagaluega o Leoleo, le susuga Su’a Muliaga Tiumalu, sa fai se inuga pia a lea auso ma se la tausoga ma sa iu ina vevesi ma faaoolima ai le uso laititi i le tausoga. Sa ita ai loa le uso matua ma faapea ona ia fasi i lona uso laititi. Na faaalia, sa lafo e le uso laititi ni fa’amatalaga e lei fiafia ai lona uso matua, ona alu ai lea moe i lona faleoo e lalata ifo lava i lo latou fale tele. Peitai, sa alu atu le uso matua ma se fagu penisini ma sasaa i le fale ma faapea ona ia susunuina ai le fale o lo o moe ai i totonu lona uso laititi. Sa mafai ona aveese mai le uso laititi ma auina atu i le falemai i Lalomanu. Peitai e lei mafai ona togafitia ai ma sa faapea loa tili ane i le falemai tele i Motootua. Na molimau i latou sa aumaia lea alii, e aumai lava o tata lona fatu, ae oo mai i Motootua, ua maliu o ia.

MALIU LEAFA VITALE

O le vaiaso nei na fa’ailoa mai ai le maliu o le alii sa avea muamua ma sui o le Kapeneta i tausaga ua mavae, le tofa Leafa Vitale. E pei ona silafia, sa seei lea alii i le tofi minisita o le Matagaluega o Galuega Lautele faapea le minisita o le Matagaluega o Tina ma Tamaitai i tausaga ua tuanai. O Leafa Vitale ma le tofa Toi Aukuso sa molia ma fa’asalaina i le solo atoa i le falepuipui ina ua fa’amaonia lo la taupulepule e tagatavaleina le alii minisita o Galuega Lautele sa i ai i le 1999, le tofa Luagalau Levaula Kamu. E pei ona lipotia e le au tusitala ma le au fa’asalalau i lena vaitaimi, o le atalii o Leafa, le alii o Eletise Vitale, lea sa ia tagatavaleina le tofa Luagalau i se laau malosi, i le hall a le Kolisi o Sagato Iosefo i Alafua ao faia se fa’atasiga a le vaega faaupufai O le HRPP. E 10 tausaga sa nofosala ai Leafa i le falepuipui seia oo ina tatala mai i tua i le palola i le masina o Iuni o le 2010, ona ua faaletonu lona soifua maloloina. O lo o lagomau o ia i lona aiga i Malie.

MAUA ATU E LEOLEO O ULA MARIUANA

E toa lua ni alii faigaleuga i se kiliva a se tasi o kamupani supamaketi i Apia sa la ioeina i taimi o suesuega a leoleo, lo la umiaina o le laau faasaina o le mariuana. Na maua ia alii i Faleolo ina ua lipoti e nisi o le mamalu o le atunuu i leoleo ma sa i ai ma se isi alii sa latou faatasi. Na faaalia, sa alu atu le kiliva a ia alii afe i se nofoaga i talaatu o le malae vaalele i Faleolo faafesagai ma le malae tapolo i Mulifanua, ma fai ai se latou ulaulaga mariuana. E lei iloa e ia alii ua lipoti i latou e se tagata sa pasi ane i le Ofisa o Leoleo i Faleolo ma fa’asino tonu i ai le nofoaga o lo o fai ai le ulaulaga mariuana a ia alii. Na alu atu sa’o lava le taavale a leoleo ma maua atu ai ia alii i le nofoaga na faasinoina ma sa faapea ona sue ai e leoleo le taavale ma maua ai se lala mariuana ma se sikaleti mariuana e tasi. E toalua ua ioe i lo la umiaina o le laau faasaina o le mariuana ma ua tatala nei i laua i tua e faatali ai lo la fa’amasinoga i le aso 6 o Iulai.

TUUAIA LEOLEO I LE NANA O MARIUANA

O le teena e se tasi o leoleo e toatolu o lo o faamalolo nei o faamaumauga o mea na tutupu i le mataupu o lo o tuuaia ai i latou, ua toe tolopo ai nei le lauina o o latou faasalaga i le aso 6 o Iulai. Ua faatonuina e Faamasino Sili Patu Tiavaasue Falefatu Sapolu ia loia a ia leoleo, ina ia faia se latou maliega autasi i faamaumauga o faamatalaga o mea na tutupu lea ua faamalolo ai ia leoleo. Na faaalia e Patu, e toatasi le leoleo o lo o tetee i se vaega o faamaumauga ma e le mafai ona faaauau lea mataupu pe a leai se maliega autasi i faamaumauga o mea na tutupu. O i latou o lo o aafia i lenei mataupu e aofia ai Satini Sinia Atonio Tausili, Constable Heta Wilson ma Corporal Luisa Lotolau, lea o lo o molia i le faalavelave i molimau vaaia, ma o le vaega o faamaumauga o lo o teena e le toatasi o i latou ia, e faasino lea i le nofoaga na maua ai le sikaleti mariuana. O le isi toalua sa aofia ai i se vaega sa suesueina se soligatulafono ma na la aumaia ai ni mariuana sa maua i lea soligatulafono, i le ofisa o leoleo i Faleata. Peitai na faaalia, sa feutagai le na taofia ma leoleo sa suesueina le mataupu ma sa maua ai se maliega ina ia fofo i tua le mataupu, o lea sa faatonuina ai e le alii Satini Sinia se tasi o leoleo ua molia, ina ia tatia’i ia mariuana. O lo o finau le loia a se tasi o leoleo ua molia, sa tia’i ia mariuana e pei ona faatonuina.