Ads by Google Ads by Google

TALA MAi SAMOA

TOATOLU PAGOTA SOSOLA MAI TAFAIGATA

 

E toatolu ni pagota o lo o tau sailia nei e leoleo na sosola mai le toese i Tafaigata. O se tasi o ia pagota o le alii o Nazario Chong Nee o Aleisa, Tuanaimato, Vaitele-uta ma Palisi, na sola ese mai le toese i le Aso Toonai, Iuni 22, 2013.

 

O Chong Nee o le tagata muamua lea ua molia i Samoa i le moliaga o le gaoi e faaaogaina ai se auupega (armed robbery), i le gaoiga o le lala o le faletupe o le Westpac i Vaitele i le 2010 lea sa latou faatinoina ai lea solitulafono ma nisi taulelea. O Chong Nee sa ia faasiilima se tamaitai faigaluega o le faletupe i se laau malosi ao faatino le latou gaoiga.

 

O le isi pagota o Samaoso Luamanu o Salelologa ma Vaitele-uta lea na sola ese mai le toese i le Aso Lua, Iuni 25, 2013.

 

O le pagota lona tolu ua sola o le tamaitai pagota o Punaotala Sakai o Salelavalu lea na sola i le Aso Sa. E lei faailoa mai e le Komesina Lagolago ia Fauono Talalelei pe na faapefea ona sosola ese Nazario Chong Nee ma Samaoso Luamanu, ae na ia faaalia, o le a saunia se pepa o faamatalaga mo le au tusitala o le a i ai uma faamatalaga o lenei mataupu.

 

Ua fautuaina e leoleo le atunuu lautele ina ia aua nei faatalanoaina pe taumafai e taofi ia pagota ae lipoti vave i se ofisa o leoleo o lata ane pe a i ai se faamatalaga e uiga ia i latou.

 

MALIU SE ALII TALAVOU INA UA SIPAKA I LONA AIGA I PUIPA’A

 

Ua lipotia mai le maliu o se alii talavou e 19 tausaga le matua o le afioaga o Puipa’a, ina ua sipaka i se uaea eletise i lona lava aiga I le amataga o le vaiaso nei. E le o mafai ona faamautu mai e le Matagaluega o Leoleo ma Falepuipui le faalavelave na tupu. Peitai ua faailoa mai e le maota gasegase i Motootua le faanatinati o lea alii talavou, ae ua maliu o ia.

 

E le o mafai foi I le taimi nei ona tuuina mai se faamatalaga mai le aiga o lea alii, I le mafuaaga tonu o le faalavelave ona o le tulaga faafuasei na tupu ai atoa ai ma le mafatia o le aiga ona o le motusia faafuasei o le mafutaga ma le atalii. Ua fautuaina e leoleo ma faataua o le saogalemu o le atunuu lautele aemaise tupulaga talavou, e pei ona tulai mai ai foi se isi faalavelave I le vaiaso nei lava, lea na maliu ai se isi alii talavou ina ua pa’u mai le fogafalelua o le fale o lona aiga I Tulaele.

 

O le alii talavou ua maliu nei mai Puipa’a sa aoga I le Kolisi a le Ekalesia Aso Fitu o le Toe Afio Mai I Lalovaea ma o lona tausaga faauu lenei.

 

MOLIA I LE FAIAIGA MA LONA LAVA AFAFINE MONI

 

Ua toe tolopo nei mo le aso 23 o iulai le faamasinoga o se tama e 55 tausaga le matua e le o mafai ona faalauiloaina lona igoa, o lo o molia i moliaga e fa – lua moliaga o le mataifale ma le isi lua moliaga o le faaoolima mataga, i lona lava afafine moni.

 

Na maua e le Faamasinoga i taualumaga o lea mataupu, e pepelo le tamaitai sa tagi i le taimi o lana molimau, faapea se tasi o ona tausoga lea sa la molimau faatasi i le aso Lulu ma ua faaleaogaina ai a la molimau. Ua tuuina atu nei i laua i lalo o le vaavaaiga a leoleo i le toese. O le a toe tulai i laua i luma o le Faamasinoga i se aso o i luma, ae i le faaiuga o le faamasinoga lea na lauina i le aso Lulu, ua faaleaogaina ai e le Faamasinoga moliaga e tolu seia vagana ai le moliaga e tasi o le faaoolima mataga lea ua faamaonia, o le a faasalaina ai lea tama.

 

Na saunoa le afioga Faamasino Pierre Slicer, e maualuga masalosaloga na faatinoina e le ua molia solitulafono na molia ai o ia. Peitai, e le lava molimau ma mau maumaututu e faamaonia ai. O lenei mataupu na mafua mai i le faaiuga o le 2011 i le masina o Setema na faatoa fetaui ai lea tamaitai ma lona tama moni, ma sa ia nofo ai loa. Peitai i totonu o le fa masina, na alia’e ai ia solitulafono ina ua masalomia e le toalua o lea tamaitai o lo o faia se mafutaga faaulugalii a lona toalua ma lona tama. Ua tete’a nei lea tamaitai ma lona toalua. O le aso 23 o iulai o le a lauina ai le faasalaga o lea tama.

 

TALEPE FALE MA GAOI LE $24,000 AE TOE TUU I AI LE AVANOA

 

Ua faasalaina nei i le faanofovaavaaia mo le lua tausaga se alii e 18 tausaga o Kose Foaisiva mai Leauvaa ma Faleula-tai, ina ua faamaonia ona moliaga o le talepe fale ma le gaoi. O le faaiuga lea a le afioga Faamasino Vui Clarence Nelson na tuuina atu ma fatuaga ma tuutuuga e tatau ona ia usitaia e lea alii talavou, ona o popolega i le afaina o lona olaga tuputupu a’e pe a faasalaina i le toese.

 

O lo o molia lea alii ma nisi i lo latou osofaia o le ofisa tutotonu o le kamupani o le Silva Transport Ltd. i Vaitele-uta lea sa latou faigaluega ai, ma toesea mai ai se tinoitupe e pe a ma le $24,000. Peitai e ui i le ogaoga o le solitulafono ua faia e lea alii talavou, na oo atu lava le pule o lea kamupani i le Faamasinoga, ma talosaga faapitoa ina ia tuuina se isi avanoa i lea alii. Na matua faatauaina e le Faamasinoga lea tulaga ma ua poloaina ai lea alii talavou e toe foi e galue i lea kamupani ma ia aua nei toe suia lana galuega mo le isi lua tausaga.

 

Ua faatonuina foi o ia e faatinoina galuega olelei mo le manuia lautele mo le 150 itula. Na fautuaina foi e le alii Faamasino lea alii talavou ina ia faaaoga lelei lea avanoa taua ua tuuina atu mo ia.

 

Saunia: Lilomaiava Andrew Fa’asau, Naenae Productions