Ads by Google Ads by Google

TALA MAi SAMOA

MAUA FAAMANUIAGA E 3% MO LE AU FAI SAOFAGA A LE NPF

 

O le aso Gafua o le vaiaso fou o lo o faamoemoe e maua ai le faamanuiaga e 3% o tului mo le au fai saofaga a le NPF. O le vaega mulimuli lea o le 7% o faamanuiaga o tupe tului o saofaga na pasia e le malo e faamatuu i tua e fesoasoani ai ia i latou na aafia i le afa o Eveni.

 

O le vaega muamua e 4% na faamatuu i tua i le amataga o le tausaga ma sa tuuina sa’o iteugatupe a le au fai saofaga i faletupe eseese i totonu o le atunuu. Na faaalia, o le vaega mulimuli e 3% o lea faamanuiaga o le a le tuuina sa’o i teugatupe a le au fai saofaga, ae o le a fafaga ai saofaga o lo o i le NPF. I se pepa o faamatalaga mai le NPF na faaalia ai e faapea, o le a agavaa uma le au fai saofaga i lea faamanuiaga sei vagana ai i latou o lo o I ai a latou aitalafu i le NPF po o isi faletupe i totonu o le atunuu.

 

FAAFETAIA MALO SIVA AFI MO LE FAATAUAINA O LE AILAO AFI

 

Ua momoli le faamalo ma le faafetai a le afioga i le sui palemia, le tofa Fonotoe Nuafesili Pierre Lauofo, i le sao a le kamupani o le Siva Afi i le faatinoga ma le faatauaina o le ailao afi ma atili uunaia ai le atinae o tagata tafafao maimoa mai fafo. O le saunoaga a le alii sui palemia sa avea ma lauga autu o le tatalaga o le tauvaga ailao afi lea e faia i tausaga taitasi e le Siva Afi ma o le lona 12 ai lea o tausaga o lenei tauvaga.

 

O le kamupani o le Siva Afi e pulea e le susuga Leota Lene Leota ma lona faletua ia Claire, ma e le gata i le gaosia o oloa eseese e pei o lavalava o lo o lolomia ai le suafa o Samoa ma isi tusitusiga faasamoa, ae ua la faatautaia foi se aoga e aoaoina ai le ailao afi po o le siva afi i so o se tasi e fia auai aemaise le tupulaga lalovaoa. O lo o tauvaga o lo o faagasolo nei e aupito i umi i le Pasefika, ma o lo o i ai nisi mai Hawaii o lo o tauva ai.

 

 FALEPUIPUI LE ALII TALEPE FALE MA GAOI

 

E ono masina i le falepuipui ua faasalaina ai nei e le Faamasinoga Faaitumalo ia le alii o Mose Lava mai Vaitoloa, ina ua faamaonia le moliaga o le talepe fale ma le ave faagaoi o ni mea totino a se aiga. Na faaalia i faamaumauga a le Faamasinoga e faapea, o lenei alii e aoga i le Iunivesete Aoao o Samoa i le Papaigalagala i mataupu faafaiaoga. Na fesiligia e le tamaitai faamasino pe alagatatau ona avea  o ia ma faiaoga e aoaoina alo ma fanau o le atunuu i le lumanai, ao lenei ua molia i ia moliaga faapenei.

 

E le gata i lea, e i ai foi ona moliaga muamua o le faaoolima. O faamaumauga a le Faamasinoga na iloa ai na toesea e lea alii ni mea totino a se aiga latou te tuaoi i Vaitoloa.

 

 FESOASOANI FAALAPOTOPOTOGA ADRA MA LE EU MO E MAFATIA AFA O EVENI

 

E silia ma le 100 aiga i itumalo Safata, Siumu ma Fagaloaua faamanuiaina i fesoasoani i lalo o le polokalama fesoasoani a le faalapotopotoga o le ADRA (Adventist Development and Relief Agency), o le faapotopotoga fesoasoani a le Ekalesia Aso Fitu o le Toe Afio Mai lea ua ave la latou faamuamua mo i latou sa lagatia i le afa o Eveni.

 

O lea polokalama o lo o galulue faatasi ai le ADRA ma le faalapotopotoga a atunuu Europa po o le EU, tauala mai i fesoasoani o le puipuiga o le manuia lautele o tagata ma o lo o latou faatupeina atoa ia fesoasoani. Ua mafai nei e aiga na matua faaleagaina o latou maota ma laoa ona maua le fesoasoani e le gata i totoga uma e toe fausia ai o latou fale, ae faapea le fesoasoani a sui o nei faalapotopotoga i le faatinoina o galuega.

 

 FAALAUILOA ALOAIA LE CD MA LE DVD A LE EKALESIA METOTISI I PAPAUTA

 

O le vaiaso nei na faalauiloa ai le CD lona lua ma le ata pese a le aufaipese ma le autalavou a le Ekalesia Metotisi I Papauta, aua le saili fesoasoani i le totogiina o le aiatalafu o lo o totoe o le latou malumalu talu ona faaulufaleina i le amataga o le tausaga nei.

 

Na faaalia e le peresetene o le autalavou, le susuga Tagaloa Taimalieutu Palemia Vailala Mataupu, e 10 viiga o le Atua o lo o i totonu o le CD faatasi ai ma le DVD ua maea ona pueina ai ia ata o le faatinoina o taga ma le lagiina o ia viiga e ala i siva faaevagelia. O ananafi na faatinoina ai se sauniga faapitoa i le maota o le ekalesia e le susuga i le Tausi Matagaluega, le susuga ia Leusoalii Laki Afua.

 

O viiga o le Atua ua maea tapenaina o ni fatuga fou o pese fatu lava a le Metotisi ma sa aoina e le faipese, le afioga Sala Leota Opetaia Lauina, o ia foi o lo o taitaia ma faauluulu i ai le failipu a leoleo a le malo.

 

Saunia: Lilomaiava Andrew Fa’asau, Naenae Productions