Ads by Google Ads by Google

Tala o Fa’amasinoga

MALIU SE TAMA I SE FA’ALAVELAVE TAU TA’AVALE

O le taeao o le aso Toonai na te’a nei na tula’i mai ai se faalavelave i Nuuuli ma i’u ina maliu ai se tama matua pe a ma le 70 tausaga le matua o lona soifua.

O le a  mafai ona maua mai se atoaga atoa o lenei faalavelave i le isi a tatou ripoti o le vaiaso nei, ae na pau faamatalaga na tuuina mai i le Samoa News e uiga i lenei faalavelave na taua ai, o le tama ua maliu sa galue muamua o se leoleo o le malo i le Matagaluega o Leoleo.

O le taeao o le aso Toona’i na te’a nei, aso 25 Aokuso na tulai mai ai le faalavelave ina ua taia o ia e se taavale i luga o le auala.

Ina ua logo tala uo ma aiga i le faalavelave na tupu, na lolofi atu ai loa le toatele i le falemai i Fagaalu. O le itula e 9:00 i le taeao na faataunuuina ai se sauniga faaleaiga mo lenei tama, ma toe taoto atu ai loa lona tino maliu i le maota gasegase i Fagaalu e faatali ai fuafuaga a le aiga.

Na faamaonia mai e le Sui Komesina o Leoleo le faaauau lea o suesuega a le matagaluega e uiga i lenei faalavelave.

E oo mai i le taimi nei e le o mafai ona faamaonia mai le mafuaaga tonu o le faalavelave sa tupu, pau faamatalaga na taua e nisi molimau ae le’i faamaonia mai, o le tama na so’a e se taavale a’o savali i le vaveao i Nuuuli.

TETE’E SAVAII MATAGI I ONA MOLIAGA

O le masina fou lea ua tolopo i ai le uluai iloiloga a Savaii  Matagi i luma o le faamasinoga maualuga, ina ua ia teena moliaga faasaga ia te ia i le aso Faraile na te’a nei.

O Matagi o loo tuuaia e le malo i le moliaga mamafa e tasi, o le ia te ia lea o se ta’ifau feau ua mafua ai ona oo manu’a i se isi tagata. O le moliaga ua tuuaia ai Matagi na afua mai i se faalavelave na tulai mai i Vaitogi i le masina o Iuni, ina ua osofa’i e le ta’ifau a le ua molia se teineititi e 7 tausaga le matua ma manu’a tigaina ai lona vae ma se vaega o ona foliga, e pei ona taua i faamaumauga a le malo.

O loo tumau pea poloaiga a le faamasinoga o loo tatala ai Matagi i tua e faatali ai le taimi lea ua faamoemoe e faataunuuina ai lana uluai iloiloga. O se tasi o ia tuutuuga e aofia ai le aua lea ne’i misi se aso e valaauina ai lana mataupu, ma ia auai i nisi lava taimi e poloaina o ia e le faamasinoga e oo atu ai.

Ua faasa foi ona ia toe taumafai e faafesootai le aiga o le teineititi na aafia, sei vagana ai lana loia.

MOLIA I LE FASIGA O LONA TO’ALUA

O le tama talavou lea o loo tuuaia i lona fasiina lea o lona to’alua, na taofia e leoleo i le vaiaso na te’a nei ma tulai ai i luma o le faamasinoga faaitumalo i le aso Faraile na te’a nei.

Na teena e lea alii le moliaga mama o le faatupu vevesi i totonu o lona aiga ua faia faasaga ia te ia, peitai na taua e le itu a le malo, o le a mafai ona manino pe i ai nisi moliaga e ono toe tuuaia ai lenei alii, pe afai ae maea suesuega a leoleo o loo faia e uiga i le faalavelave na tulai mai.

E tusa ai ma faamaumauga a le faamasinoga e faapea, o le vevesi i le va o le ulugalii na afua mai ina ua fesiligia e le fafine lona toalua e uiga i se la ata sa pueina ma se isi fafine, ae avea ai ma itu na ita ai le ua molia ma ia poina ai loa foliga o si ona toalua, e pei ona tuuaia ai o ia e le malo.

Na folafola e le fafine i lona toalua, e toe pa’i atu loa lona lima ia te ia ona ia telefoniina loa lea o leoleo, peitai e lei uma atu le tala a si fafine ae aapa atu loa le ua molia ma titina lona ua, ma mafua ai loa ona vili e le fafine leoleo ma mafua ai loa ona loka le ua molia i le aso lea.

Ina ua fesiligia e leoleo le ua molia e uiga i le mea sa tupu, sa ia ioeina ai lona faia o gaioiga e pei ona tuuaia ai o ia e le malo faasaga i lona toalua.

Ua toe tatalaina i tua le ua molia i lalo o tuutuuga, ua faasa ona ia toe taumafai e faafesootai lona toalua poo nisi o lona aiga i soo se taimi, a ia saili se isi nofoaga e nofo ai mo le taimi nei, sei vagana ua tuuina atu se isi poloaiga a le faamasinoga.

Ua faasa o ia ona ia toe soli se tulafono, pe taumafai foi e sola ese ma le atunuu, a ia avea o ia ma tagatanuu lelei e tausisi i tulafono uma a le malo, ma ia tuuina atu foi ona pepa malaga e taofi e le malo, sei vagana ua maea lana mataupu ona faatoa toe tuuina atu lea o ona pepa malaga ia te ia.

FAATULAGA LE ULUAI ILOILOGA A LINNEA SAMATUA

O le masina fou lea ua faatulaga e fofogaina ai le uluai iloiloga a le tina o Linnea Samatua, ina ua ia teena moliaga mamafa e lua ua tuuaia ai o ia e le malo i le aso Faraile na te’a nei, i luma o le faamasinoga maualuga.

O Samatua o loo tuuaia i moliaga o lona tuuina atu lea o ni siaki i se kamupani ma lona iloaina lelei lava, e le o toe i ai se tupe i totonu o lea teugatupe, atoa ai ma le moliaga o le gaoi.

O moliaga ua faia faasaga ia Samatua na afua mai ina ua talosagaina e le pule o le kamupani a le MHJ Development Corporation se fesoasoani a le ofisa o leoleo, i se auala e toe totogi atu ai e le ua molia se vaega tupe o loo ia nofo aitalafu ai i le latou pisinisi, ona o siaki sa ia sainia ma tala i le masina o Mati i pamu kesi e lua o loo i lalo o le vaavaaiga a le kamupani, peitai ua toe faafoi uma atu e le faletupe siaki nei ona e le o i ai se tupe o i ai i totonu o le teugatupe.

O loo taua i faamaumauga a le faamasinoga e faapea, ua maea ona totogi e le ua molia le $200 agai i le kamupani, toe $585 le tupe o loo ia nofo aitalafu ai.

E $3,000 o loo tatala ai i tua Samatua e faatali ai le aso lea ua faatulaga e fofogaina ai lana uluai iloiloga.