TETE’E AVE PASI ONA MOLIAGA

O le masina fou o Setema lea ua faatulaga e faia ai le ulua’i iloiloga o le mataupu o lo o tuuaia ai e le malo le alii ave pasi o Reino Esera, ina ua ia teena moliaga faasaga ia te ia i luma o le Faamasinoga Maualuga i le taeao ananafi.

O lo o tuuaia Esera i le faalavelave lea na maliu ai Malele Notise Forsythe, ina ua so’a e lana pasi ao kolosi o ia i le laina kolosi o lo o i luma o le CBT i Nuuuli i le taeao o le Aso Toona’i na te’a nei.

O lo o taofia pea Esera i le toese i Tafuna ina ua le mafai ona ia totogia le $15,000 ua faatulaga e tatala ai o ia i tua.

Na talosaga lana loia o Karen Shelly i luma o le faamasinoga faaitumalo e faaitiitia le tupe taofia mo ia.

Na taua e lana loia, o Esera o se tagatanuu lelei, e toalua lana fanau laiti o loo tausi i le taimi nei, peitai na finau foi le loia a le malo e faatumau le tupe ua maea ona faatulaga e tatala ai le ua molia i tua, lea foi na talia e le faamasinoga.

FAATALI SE FAAIUGA FAAMASINOGA TALOSAGA MALO

Ua taoto atu nei i se faaiuga a le Faamasinoga Maualuga le talosaga na faaulu e le loia a le malo, e solofua ai le tagi na faaulu e le loia a Punamai Tuitele o Mark Ude, i le maea ai o le mataupu lea na saili ai e leoleo lona fale ia Aokuso 2010, i lalo o se poloaiga a le faamasinoga.

Na taua e le loia a le malo o Bensy Benjamin i lana talosaga i le faamasinoga, e le o i ai ni mau faamaonia e lagolagoina ai le tagi a Tuitele faasaga i le malo, ona o ana mea totino fai mai sa faaleagaina ina ua sue e leoleo lona fale.

Fai mai le malo, e le gata e le o manatua e Tuitele po o a mea totino o lona fale sa faaleagaina, ae na te le o iloa foi pe na faapefea ona toe faaleleia mea sa faaleagaina, ae fia foi le tupe na toe faaleleia ai mea na faaleagaina.

Na taua e le malo e faapea, e foliga mai o lo o i ai se mea o lo o masalomia i lenei mataupu, pe afai e le o iloa tonu e le alii o lo o tagi mea sa faaleagaina o lona fale ina ua agai atu leoleo ma saili.

E $3,000 le tupe o lo o finau lenei alii e tatau ona totogi e le malo, ona o le tupe lea sa tatau ona totogi e se tagata e mautotogi i le fale i le masina, peitai fai mai le malo, e faapefea ona mautotogi le fale pe afai sa faaleagaina ina ua maea ona saili e leoleo.

Ae na taua e Ude e faapea, ua tusa nei ma le lua tausaga talu ona tuanai le taimi na saili ai e leoleo le fale, ma, atonu foi ua galo ia Tuitele mea sa faaleagaina i lona fale.

O le afioga i le alii faamasino sili lagolago ia Lyle L. Richmond ma Faamausili Poumele o loo iloiloina se faaiuga o lenei mataupu.

EMANUEL ULBERG

O le alii lea o lo o tuuaia i lona taumafai e totogi tupe le leoleo na taofia lana taavale, i le po lea na maua ai o lo o ia faafoeina le taavale a’o ‘ona, ua toe tolopo lana uluai iloiloga i le aso 24 Setema e toe fofogaina ai, ina ua talia e le faamasinoga maualuga talosaga a loia e tuu atu se isi 30 aso e toe faaauau ai talanoaga ma feutanaiga o lo o faia.

O le alii o Emanuel Ulberg o lo o tuuaia i le moliaga mamafa e tasi o lona taumafai e totogi tupe se tagata faigaluega a le malo, atoa ai ma moliaga mama e tolu e aofia ai le ave taavale ‘ona, o lona taumafaina o se pia i totonu o se taavale a’o alu i luga o le alatele, atoa ai ma le ave taavale faatamala.

O tuuaiga faasaga ia Ulberg na alia’e mai ina ua taofi e leoleo lana taavale i luma o le Stadium i Tafuna i le po o le aso 15 Aperila 2012, ina ua vaaia e leoleo le tifa o lana taavale i luga o le auala.

O lo o tumau pea poloaiga o loo tatala ai le ua molia i tua e faatali ai le aso lea ua toe tolopo i ai lana mataupu.