MAUA LE AU TALEPE FALE, TOE TOATASI O LO O TAU SAILI E LEOLEO

E toalua ni alii ua tuuaia nei e le malo i le faalavelave lea na osofaia ai e nisi le faleaoga a le Aoga Tulaga Muamua a Pavaiai i le vaiaso na te’a nei, ae o loo taumafai pea leoleo e saili le tagata lea o loo taua na autu i ai le osofaiga.

I le faaiuga o suesuega a leoleo, na taofia ai le alii o Sal Pou ma se alii laititi i lalo o le tulafono, ma molia i le faaleaga meatotino.

I faamaumauga a le faamasinoga o loo taua ai e faapea, o le ofisa autu o le aoga na ulufale atu ai le au talepe fale, ina ua tatala se faamalama ma latou faatinoina ai loa ni gaioiga faasolitulafono i totonu o le ofisa o le aoga.

O mea o loo tuuaia e le malo na gaoia e aofia ai moli uila, o se pusa o loo i ai maa moli uila faapea ai ma isi mea aoga e faaaoga e le aoga,

Ina ua fesiligia e leoleo le alii o Pou sa ia taua ai e faapea, o le alii laititi lea ua maua ma lana uo na faaosoosoina o ia latou te osofaia le faleaoga.

MOLIA I LE AVE TAAVALE A’O SE’I LE LAISENE

Ua molia nei e le malo le alii o Pulemau Pa’aga i le moliaga o le ave taavale a’o se’i lana laisene ave taavale.

O le faaiuga o le vaiaso na te’a nei na taofia faapagota ai e leoleo Pa’aga ao ia faafoeina se taavale a le malo, ina ua masalomia o loo ‘ona o ia.

O Pa’aga, o se tagata faigaluega a le malo, lea na maua o ia faafoeina le taavale numera #P09, ma taofia ai loa e leoleo le taavale i lalo o le latou vaavaaiga, ae taofia Pa’aga i le taimi na maua ai o ia.

Na tausala e le faamasinoga faaitumalo le alii o Pa’aga i le moliaga o le ave taavale ‘ona, ma se’i ai loa lana laisene ina ua faanofovaavaaia o ia. I le taimi na lau ai le faasalaga a Pa’aga i luma o le faamasinoga faaitumalo, sa faailoa i ai e le faamasinoga e faapea, afai ae toe maua o ia o ia faafoeina se taavale, o le a molia o ia i se moliaga mamafa, ma afai ae faamaonia, o le a poloaina o ia na te tuliina aso e 90 i le toese i Tafuna, ona o loo faatulaga mai e le tulafono.

Ua faagasolo nei taualumaga o le mataupu e pei ona tuuaia ai Pa’aga e le faamasinoga faaitumalo.

SOLA ESE MA LEOLEO ONA O LE FEFE

O le alii lea na tuli ma leoleo i le faaiuga o le vaiaso ina ua fiu leoleo e taofi lana taavale ina ua molimauina le alu saoasaoa i luga o le alatele, ua molia nei i le sola ese ma leoleo, ave taavale faatautala, faapea ai ma le faaaoga o le laisene o le isi taavale e faapipii i le taavale sa ia aveina.

Ina ua fesiligia o ia e leoleo i le mafuaaga na sola ese ai, ae na taua e le ua molia, na mafua ona sola ese ona ua fefe i le sese o laisene o loo faaaoga i le taavale sa ia aveina.

I faamaumauga a le faamasinoga o loo taua ai e faapea, ao tiute leoleo i se vaega o Pavaiai, sa o latou vaaia ai le taavale a le alii o Wayne Motu o loo alu atu i le saoasaoa e 39 maila i le itula, ae o le saoasaoa faatulafonoina i le vaega lea o le alatele e 25 maila i le itula.

Na tuli e le taavale a leoleo le taavale ma Motu, e ala i le faaee o sailini ma faaaoga le sipika e valaau ia e afe i tua lana taavale, peitai sa faaauau pea ona alu saoasaoa le taavale a le ua molia.

Fai mai faamaumauga a le faamasinoga, e i le va o le 61-62 maila i le itula le saoasaoa na alu ai le taavale a leoleo faatasi ai ma le taavale a Motu i le taimi o le tuliga, ma maea ai le tuliga ina ua fetoai le taavale a le ua molia ma se fa’i i Malaeloa.

Na oso i fafo Motu ma alu i le atoa ma le mafai ai e leoleo ona pu’e o ia, peitai i se taimi o le po o le aso lava lea, na alu atu ai loa Motu i le ofisa o leoleo ma faailoa atu i ai le mea sa tupu.

Na taua e leoleo i le latou ripoti e faapea, na laga i tua tagata mai le auala i le taimi na latou tuliina ai le taavale a le ua molia, ina ia taofia ai le ono aafia o se isi i se faalavelave