Ads by Google Ads by Google

Tala o Fa’amasinoga

Na te’ena e se ali’i talavou mai Vailoa tu’uaiga a  le malo fa’asaga ia te ia o lona fa’aleagaina o meatotino a se isi aiga...

ma ua fa’atulagaina ai seisi ona iloiloga mo le masina o Tesema.

I fa’amaumauga a le fa’amasinoga o lo o taua ai, na aga’i atu le ali’i o Fa’afouina Muliaga i le fanua o le isi aiga o le latou nu’u ma gaoi mai ai se aufa’i.

Ua fa’asa e le fa’amasinoga lenei ali’i ona toe tu i le fanua o lea aiga, pe toe taumafai e fa’afeso’ota’i tagata o le aiga.

FASI A’O TAELE I LE SAMI

O tama’ita’i e to’atolu ia o lo o tu’uaia i lo latou fa’ao’olima i se isi tama’ita’i a’o faia se auauga a le latou aiga i Fatu ma Futi, ua poloaina e le fa’amasinoga ina ia aua ne’i o latou toe taumafai e fa’afeso’ota’i le tama’ita’i na a’afia i lenei mataupu.

O tama’ita’i e to’atolu o lo o a’afia i lenei mataupu e aofia ai Serrah Mauga, Evelyn Mauga ma Le’alai Mauga.

O lo o tu’uaia i latou e le malo i le moliaga o le fa’ao’olima i le tulaga tolu, ma o lo’o latou teena uma lea tu’uaiga.

I fa’amaumauga a le fa’amasinoga o lo’o taua ai, a’o fa’amalu le tama’ita’i na a’afia ma nisi o lona aiga i le aso 24 Novema i Fatu ma Futi, na fa’afuase’i ona valaau atu ni tama’ita’i se to’atolu ia te ia e tope ae alu ese mai ma le sami.

Na taua i fa’amaumauga a le fa’amasinoga le aga’i atu o le isi o le to’atolu lea ma toso mai o ia mai le sami ma una’i aga’i atu i le oneone, ona oso atu loa lea o Serra ma tatu’i o ia, sa fa’apea fo’i ona fesoasoani i ai isi tama’ita’i e to’alua.

Ua tatalaina uma i tua i latou nei e fa’atali ai le isi a latou iloiloga lea ua fa’atulaga e le fa’amasinoga, ma ua poloaina i latou ina ia aua ne’i o latou toe taumafai e fa’afeso’ota’i le tama’ita’i na a’afia i lenei mataupu, pe latou te toe solia fo’i se isi tulafono a le malo.

TU’UAIA SE ALI’I I LONA FA’AFEFE O LONA TO’ALUA

O le ali’i lea na ia fa’afefeina lona to’alua ina ua fai atu i ai le fafine o le a ia viliina leoleo, ua fa’asa e le fa’amasinoga ona ia toe taumafai e fa’afeso’ota’i le fafine ma lana fanau, se’i vagana ua tu’uina atu se isi poloaiga a le fa’amasinoga ona mafai lea ona toe maua se isi a latou feso’otaiga.

O le po o le aso Tofi na te’a nei na tula’i mai ai lea fa’alavelave i Tafuna, ina ua ‘ona atu le ua molia ma fasi lona to’alua e aunoa ma se mafuaaga tatau. Na fai le fafine i le ula lea o le a ia telefoni i le ofisa o leoleo e logo i ai lana mea ua fai, peita’i sa fai i ai le ua molia, o le taimi lava na te viliina ai leoleo, o le taimi fo’i lea na te fasiotiina ai o ia.

Na avea le fefe o le fafine ma itu na toe fo’i ai loa ma toe moe, peita’i ina ua ia fa’alogoina le moe gase o lona to’alua, o le taimi lea na ia viliina ai loa leoleo, ma aga’i atu ai loa leoleo ma loka mai le ‘ona a’o moe.

O le vaiaso fou lea ua fa’amoemoe le malo e toe valaauina ai lenei mataupu, o iina fo’i e iloa ai pe i ai ni moliaga fa’aopoopo e ono faila fa’asaga i le ua molia pe leai fo’i.

Ua fa’atonu e le fa’amasinoga le ua molia e alu e nofo i Aua i le uso o lona tama, se’i tau fa’ato’a filemu le vevesi na tula’i mai i le va o ia ma lona to’alua.

Ua fa’asa fo’i ona ia toe tagofia se ava malosi, pe na te toe taumafai fo’i e fa’amata’u pe fa’afefe lona to’alua.

Ua tatala i tua le ua molia e fa’atali ai le aso lea ua toe tolopo i ai lana mataupu.