IOANE TUUMALO

O le alii aoga mai le Aoga Maualuga a Tafuna lea na molia na maua ai ni sikaleti mariuana, i totonu o le lotoa a le aoga i le vaiaso na te’a nei, ua fa’atulaga lana uluai iloiloga i le Aso Tofi o le vaiaso nei.

Na te’ena e le alii o Ioane Tuumalo le moliaga o le umia faasolitulafono lea o ni mariuana ina ua tulai i luma o le faamasinoga faaitumalo i le taeao ananafi.

I fa’amaumauga a le fa’amasinoga o lo o taua ai e faapea, na maua e le Pule Lua a le aoga le alii o Tuumalo o ula sana sikaleti i le taimi o le malologa, ma mafua ai ona sailia lona tino atoa ma maua  ai i le isi taga o lona ofu sa fai, se taga pepa o lo o i ai sikaleti e 3 i totonu. Sa faia e le alii leoleo o Det. Paselio se suega i sikaleti ia e tolu ma fa’amaonia ai, o sikaleti mariuana.

Ina ua fesiligia e le alii leoleo o Cpt. Paulo Leuma le ua molia e uiga i sikaleti mariuana na ia taua ai e faapea, ina ua alu e fa’aaoga le fale ta’ele a le aoga, sa tau ai lana va’ai i se taga pepa lanu mumu o lo o taatia i luga o le fola o le fale, ma ina ua ia pikiina i luga, sa ia va’aia ai sikaleti se fa o lo o i ai i totonu, ona ia ulaina lea o le sikaleti e tasi.

E $10,000 le tupe lea ua faatulaga e le faamasinoga e totogi ona faatoa mafai lea ona tatala Tuumalo i tua.

SAUSAULELE SIUA

O le alii lea o lo o tu’ua’ia e le malo sa ia fa’ao’olima i se tamaitai ina ua musu le tamaitai e sogi atu ia te ia, o le taeao nei lea ua fa’atulaga e amata sailia ai se vaega iloilo iuga latou te iloiloina mau e uiga i le mataupu o loo tuuaia ai o ia.

E le gata i le molia o Sausaulele Siua, i le moliaga mamafa o le fa’a’o’olima i le tulaga lua fa’apea ai ma lona ave fa’amalosia o se tagata i se isi nofoaga, ae o lo o tu’ua’ia foi o ia i le moliaga mama o le fa’atupu vevesi i nofoaga faitele.

I fa’amaumauga a le fa’amasinoga o lo o taua ai e fa’apea, sa i ai fa’atasi Siua ma le tamaitai na a’afia i se pati i se taimi o le masina o Aperila 2010, ae ina ua o’o i le taimi e momoli ai lenei tama’ita’i i lona aiga, ua le alu le ta’avale i le fale o le tama’ita’i, ae ua ese le mea na alu aga’i ai le ta’avale.

E le gata, ua ta’ua i fa’amaumauga a le fa’amasinoga, le taumafai o Siua e kisi i le tama’ita’i, ae musu le tama’ita’i, ma faia ai loa se la tauiviga.  Na taumafai lenei tama’ita’i e sola ese, ae tu’i e Siua ma matapogia ai lenei tama’ita’i.

Na te’i a’e le tamaitai ua leai Siua. Fai mai le malo, e fai lava si matuia o manu’a na a’afia ai le ulu o lenei tama’ita’i, ma mafua ai loa ona manaomia filo e 12.

O lo o tatala i tua Siua e fa’atali ai le fa’agasologa o lona fa’amasinoga autu i le vaiaso nei.

FUAFUA FAAMASINOGA O ALII TUUAIA FASIOTI TAGATA

O le Aso Tofi o le vaiaso nei lea ua fa’atulaga e tatau ona mautu ai le aso ma le taimi e fa’ataunu’u ai le fa’amasinoga autu o alii e toatolu ia o lo o tu’ua’ia i le moliaga mamafa o le fa’ao’olima i le tulaga lua, ona o le fa’alavelave lea na mafua ai ona maliu le alii o Sio Faumui i le masina o Iuni 2011 i Malaeimi.

O se tasi o tamaitai loia o lo o tulai mo le isi o alii e toatolu nei ua faamoemoe e taunuu mai i le atunuu i le vaiaso nei, mai se malaga o loo faatasi atu ai ona o  tulaga tau i aoaoga faaloia.

O i latou o lo o tu’uaia i lenei mataupu e aofia ai Raponi Siaulaiga, Migo Misa ma Neemia Poamo, lea o loo taofia uma i latou i le toese i Tafuna i le taimi nei, ina ua le mafai ona o latou totogiina le tai $100,000 na faatulaga e tatala ai i latou i tua.