AMATA FA’AMASINOGA ALII TUUAIA FAAMALOSI LONA TOALUA

O le alii lea o lo o tuuaia e le malo i lona faamalosia o lona toalua faaipoipo la te faiaiga, e ui sa musu ai le fafine, ua faamoemoe e amata i le taeao nei lana faamasinoga iloilo i luma o le alii faamasino sili lagolago ia Lyle L. Richmond.

E le o mafai e le Samoa News ona faalauiloa le igoa o lenei alii, ona o puipuiga i si ona faletua o lo o aafia i lenei mataupu.

E faalua ona taumafai le malo e tuuina atu se ofa i le ua molia, peitai na fofogaina e le ua molia i luma o le Fa’amasinoga Maualuga e fa’apea, e i ai lona talitonuga e le tatau ona molia o ia e le malo i le mataupu lenei, leaga o ia na taumafai e taofi uiga faa Sotoma o lo o faia e lona toalua, ae ua aafia ai fua o ia i le tulafono.

O le mataupu lenei na afua mai ina ua masalomia e le ua molia lona toalua, o lo o faia sa la faanunumi ma se isi tamaloa,  Na o’o lenei alii i le fale faigaluega a le fafine ma i’u ina vala’au ai e le fafine le ofisa a leoleo.

Na tuu atu e le Ofisa le fafine e alu e nofo i lona aunty  i Fagatogo, ae peita’i, na o’o lava i ai le alii lenei ma ia taumafai ai e faamalosi le fafine i totonu o le fale o le ‘aunty’.  Na fai foi le ua molia i le fafine, e la te o i le la aiga e talanoa ai ma taumafai e toe faalelei le la ulugalii.  O luma o le faletupe a le ANZ na faatu ai e le ua molia le taavale a sana uo ma taumafai e una’i faamalosi i ai le fafine i totonu o le taavale.  Na lagona mai e ni isi na latalata mai, le taualaga a le fafine, ma logo ai loa le ofisa a leoleo.

O lo o tuuaia le ua molia i moliaga e aofia ai le faiaiga faamalosi, tagofia o itutinosa o se fafine, faaoolima mataga, atoa ai ma lona taumafai e taofi faapagota se tagata i se auala e le tusa ai ma le tulafono, ma o lo o tumau pea ona teena tuuaiga ua faia faasaga ia te ia.

SAUNI SAMATUA E TALI I ONA MOLIAGA

Ua maea ona tuuina atu e le malo sa latou ofa ia Linnea Samatua, ina ia tali ioe i nisi o moliaga o lo o tuuaia ai o ia, ae solofua isi moliaga ma faamuta ai loa lana mataupu.

Na talia e le Faamasinoga Maualuga talosaga a le ofisa o le loia fautua mo tagata lautele, ina ia toe tolopo le fofogaina o le maliliega a Samatua ma le malo i le vaiaso fou, ona o lo o gasegase lana loia, ia Michael White.

O lo o tuuaia Samatua i lona sainia o ni siaki ma tuu atu i le kamupani a le Airport Way Gas Station faapea ai ma le Haleck’s Serivice Center, e ui sa ia iloa lelei e le o i ai se tupe i totonu o le teugatupe o lo o saini mai ai le siaki.

E $745 le aofai o le tupe sa tuuaia ai Samatua sa ia aveina mai siaki sa ia sainia, peitai i faamaumauga a le faamasinoga o lo o taua ai, ua maea ona ia toe totogia le $200, ae toe $545 le tupe e tatau ona ia totogia atu.

I faamaumauga a le faamasinoga o lo o taua ai, na fiu le kamupani e tulituli Samatua ina ia toe totogi atu tupe nei, peitai sa le maua sa latou feiloaiga, ma iu ai loa i le faila e le kamupani o le latou tagi i le ofisa o leoleo.

Fai mai le malo, e 7 siaki na saini e Samatua ma tuuina atu i le kamupani i le va o le aso 16 ma le 25 o Iulai 2012.

FA’AI’U FA’AMASINOGA FE’ESEESEAIGA MAFUA MAI FANUA

Na faaiu i le faamasinoga se feeseeseaiga i le va o ni alii se toalua lea na mafua mai i se fanua o latou aiga i Malaeimi, ina ua taofia e leoleo le alii o Laau Fanene i le faaiuga o le vaiaso na tulai ai i luma o le Faamasinoga Faaitumalo i le taeao ananafi.

Ua molia e le malo Fanene i le moliaga o le faatupu vevesi i nofoaga faitele ma le faaoolima i le tulaga tolu, ma ua tolopo lana mataupu e toe fofogaina i le masina fou.

O le vevesi na tulai mai ina ua faaoolima Fanene i le isi alii, e mafua mai i le fanua e pei ona tuuaia ai o ia e le malo, ma laga atu ai loa nisi sa i ai ma taumafai e vaovao, ae o le taimi foi lea ua logoina ai leoleo mo se fesoasoani.

Ua poloaina e le faamasinoga le ua molia ina ia aua nei ona toe taumafai e faafesootai le alii na aafia i lenei mataupu, ma ia tausi le filemu i totonu o la aiga.